الطريقه
انتي هتشتغلي الوحدات الاول وبعدين تبني عليها البلورو
الوحده هتتعمل كالاتي
اشتغلي 5 سلاسل واقفليهم ثم اشتغلي 18 عمود واقفلي السطر
ثم اشتغلي فوق كل عمود عمود وسلسلتين لاخر السطر واقفليه
ثم اشتغلي في السلسلتين 3 عمود وفوق العمود عمود لاخر السطر واقفليه
كده تكون الوحده خلصتا اقطعي الخيط
تاني وحده وانتي بتشتغلي السطر الاخير اشتغلي بعد العمود 4 سلاسل وامسكيها في الوحده الاولي بمنزلقه
ثم 4 سلاسل ثم كملي و اشتغلي 3 عمود ثم تاني سلاسل وامسكي بيهم الوحده الاولي ثم 3 عمود و4 سلاسل امسكي الوحده الاولي
يعني تمسكيها 3 مرات فقط
اعملي وحدات كتير بطول الوجه والضهر معا يعني تشبكي الوحدات وتضعيها بالمناصفه فوق كتفك علي الوجه والضهر الي ان تصلي بالبلورو للطول المطلوب
البلورو المطلوب
تشتغلي قدهم مره كمان للناحيه التانيه من البلورو بنفس الاطوال
وتاني تشتغلي نفس الوحدات بس اقل ودى تعمليهامن اخر البلورو الي تحت الباط فقط وانتي بتشتغليها تعملي سلاسل تمسكي بيها الوجه والضهر معا كل وحده 3 مرات
بس المره دى الوحده هتمسكي بيها وحدتين من الجمب اليمين والشمال
وبرضه تشتغلي للناحيه التانيه
بعد كده هنشتغلالسلاسل وده الجزء الاسهل وهيكون بعرض الوحدات
هتشتغلي 5 سلاسل كطول عمود ثم 10 سلاسل وتمسكي بيها اول سلاسل تمر بين الوحده الاولي والتانيه بعمود بلفتين ثم 10 سلاسل وتمسكي بيهم الوحده التانيه بعمود بلفتين ايضا
ثم سلسلتين وفي تالت عمود من الوحده تشتغلي عمود بلفتين ثم سلسلتين تاني ثم في تالت عمود عمود بلفتين ثم 10 سلاسل ثم الوحده اللي بعدها تبتدى تاني تشتغلي عمود بلفتين ثم سلسلتين وهكذا تعيدى اللي عملناه
لاخر السطر
ثم ترجعي تشتغلي علي السلاسل اللي عملناها غرز حشو لاخر السطر
السطر التالي تشتغلي في وسط ال10 سلاسل 10 سلاسل تاني وتشبكيهم في وسط السلاسل العشره التاليين وهكذا لاخر السطر
ثم السطر اللي بعده غرز حشو
وهكذا لمدة 7 سطور سلاسل سطر ثم السطر التاني حشو
اشتغلي الجزء التاني بنفس الطريقه
من ناحية الضهر امسكي اخر غرز حشو مع اخر غرز حشو من الجزء التاني وانتي بتشتغليه
يعني تخلصي جزء وتعملي الجزء التاني وانتي بتشتغلي خامس غرزة حشو امسكي بمنزلقه بين 5 و 6 غرزه من الحشو من الجزء الاول
هتلاقي البلورو اتعمل
تبتدى تعملي الحليه اللي هي سلاسل ثم ورده في وسط اخر سلاسل اتعملت اخر البلورو
وطبعا لو عاوزه فستونات مكان الياقه اعملي واعملي علي الكم اما فستونات او سلاسل اخرها ورده
ومبروك عليكي ياترى شرحي سهل والا صعب
لو وقفت امامك اى خطوه قوليلي اوضحها لك ربنا معاكي
