سلسه غسيل الملابس ( الملابس الملونه )
مجتمع رجيم / التجارب والحلول المنزلية
كتبت :
dodobaby
-
كيف حالكم خواتي؟؟؟ ان شاء الله الجميع بخير....
اليوم تكملت موضوعنا من سلسله غسيل الملابس
وها الموضوع مخصص للملابس الملونه......
أول خطوه في غسيل الملابس الملونه هو التقسيم...:
والتقسيم مهم جدا" في المحافظه على نوعيه الملابس
وتقسيمي للملابس الملونه يكون بالشكل التالي....:
1. الملابس الفاتحه ( ومعها الداخليه و الشيفونات..)
2. الملابس الداكنه والجينزات ( وممكن يكون معها الشيفونات والحراير لو كانت داكنه )
3. الملابس اللي ممكن تنزل لون سواء كانت جديده أو حتى في أنواع من الملابس تنزل لون مهما انغسلت
4. الفوط
أذا عندج ثياب فيها بقع حطي على البقعه شويه فانيش وخليها شوي
وأذا ما نفعت دعكيها بصابون الوزير بعد ما تنقعينها معا صابون الوزير بالماي
صابون الوزير يابس عشان جي الافضل تنقعينه فالماي كم دقيقه عشان يلين معاج بس مو اطووولين عقب تيين تدورين الصابون ما تلقينه
والصابون متوفر بنوعين مبشور ومكعبات والمكعبات افضل عشان تدعكين به...
الملابس الملونه الفاتحه....
طريقه الغسل..:
اقسم الغسيل قسمين
قسم ينحط بأكياس الغسيل... ويشمل ( الملابس الداخليه بعد تسكير مشكابك الستيانات... الملابس الحساسه والحرير )
والأفضل قبل الغسل انك تسكرين أي سحاب أو أزرار أو مشابك في الملابس قبل غسلها...
أعبي الغساله ماي وأحط في ترس الغطا حق الشامبو 3 أو اربع مرات... وأذا كانت الملابس فيها بقع احط 100 مل من فانيش طبعا"
أنا معاييري كلها بالنظر بس قاعده أحاول اقرب الموضوع
والشامبو في أنواع كثيره تختلف في كثافتها فلو كان الشامبو سايل بزياده لازم تزيدين الكميه
وأنا مع أن غسالتي من النوع اللي أيي فيها مكان لمنعم الملابس معا التشطيف لكني بطلت احط منعم لان فيها عيب انها اتخلي الغسيل يشمع
وهذا عيب من الغساله نفسها...
الملابس الملونه الداكنه...:
تشمل الملابس الداكنه والجينزات و( الحراير الداكنه اللي احطها داخل كيس الغسيل )
غسيلهم ما يفرق عن الفاتحه غير انج تعزلينهم عشان الالوان ما تنتقل لبعض
الملابس اللي تنزل لون أغسل كل قطعه بروحها ... وغسيل عادي مثل اللي فوق
انا في غسالتي في خيار للغسيل الاقتصادي وهو بماي قليل يعني عادي لو اغسل قطعه وحده او ممكن تغسلينها باليد
غسيل الفوط....:
أذا كانت متسخه أغسلها بالشامبو عادي
وأذا كانت نظيفه بس أغسلها عن الأستخدام أو ريحه الماي فأفضل أني اغسلها بالغساله بداوني بس تصير ريحتها حلوه وناعمه
