مجتمع رجيم - عرض مشاركة واحدة

كتبت : يويا 268

انا هتخيل ان في حد بيكلمني واتكلم معاه
انا زهقانه قوي وحاسة اني لوحدي خايفة اكون بقيت باستعزب الاحساس ده بس انا بجد زهقانه
حياتي فاضية ممنوع الخروج وممنوع الصداقات لانها هاتيجي منين انا ولا باروح في مكان ولا اعرف حد ولا باشتغل عشان اعمل صداقات كل اما اعوز اتكلم بس عشان احس اني باستعمل فمي باطلب ماما في التليفون ارغي معاها في اي حاجة
انا قاعدة لوحدي صبح وليل جوزي بيشتغل ويجي يقعد علي الكمبيوتر لغاية ما يدخل ينام ولو حتي جه قعد معانا شوية بيجيبه معاه ويفضل بردو يكتب عليه
وانا اكلم نفسي ولو كلمته بيرد عليا وهو باصص فيه
انا اتكلمت معاه كتير جدا واتخانقنا كذا مره واخر مره اتخانقنا قالي انا كده وخلاص يعني اذا كان عاجبك
الموضوع ده من زمان بس زاد قوي بجد انا لوحدي خالص في كل حاجة لوحدي
وبعدين بعد تفكير قلت طيب انا احاول اشغل نفسي في اي حاجة واتاجهله وخلاص هو حر بس دورت مش لقيت الشغل علي النت او اي نشاط مش هاقدر لان عمر مش بيخليني اقعد علي النت براحتي
دايما يشدني ويغلس ويفضل يدوس علي الزراير وانا ازعقله وبيصعب عليه لانه هو بردو زهقان ومش في حد يلعب معاه غيري فباسيب اي حاجة باعملها واقوم العب معاه. وطبعا ده ينطبق علي اي حاجة تانية زي القراءة او شغل التطريز واي نشاط تاني لازم انزل فيه من البيت وده طبعا صعب جدا مين هيوديني؟؟؟؟
طبعا انا باحمد ربنا علي ابني وربني يحميه ويخليه هو مهون عليا كتيييير بس انا كانسانه كانا وحيدة
واللي يفرس اكتر انه مش بيرضي ابدا اسافر لاهلي اقعد معاهم شوية قبل اجازته او بعدها يقولي اصلي باقلق عليكم وانتم مش معايا واصلي مش باحب تبعدو عني وهو البعد في المسافات بس؟ لو انا باهون عليه الغربة مين يهون عليا انا؟؟؟ اذا كان هو اللي عنده شغله واصحابه ويقدر يخرج ويتحرك زي مايحب عايز اللي يهون عليه غربته انا اعمل ايه؟
انا جوزي عنده حب تملك ودي حاجة انا عارفاها بس ده مع ادمانه للانترنت والكمبيوتر صعب جدا مخليني مكتئبة ومحبطة ومش ليه نفس اعمل حاجة
يا رب عفوك ورضاك
انا باحمد علي كل نعمك ولا انكرها ابدا وباشكرك في كل سجدة علي نعمك الكتيييييير عليا بس هو ضيق النفس اللي مش في بشر يقدر يتحكم فيه
انا مش جديدة علي الغربة دي رابع سنه او يمكن الخامسة كمان بس الجديد عليا هو الغربة اللي حاسه بيها في بيتي ومع جوزي اللي هو الشخص اللي المفروض يكون اقرب وااحد ليه