من 105 الى 70 اذكري الله وتفضلي
السلام عليكم ورحمه الله وبركاته
طبعا يابنات الكل حاب ينقص من وزنه ويصير جسمه حلو ورشيق
بصراحه انا كان وزني 105 والحين 70 وهدفي اوصل لل65 وقريب احقق هالهدف
وطبعا الوصول مو صعب بالمره ليش
لاني عرفت وش اللي يوصلني لهالهدف من غير تعب وحرمان واكتئاب
والاهم من كل هذا ان وزني صعب يرجع الا اذا مرررره اهملت نفسي وصرت اكل كثير ممكن يزيد بالشهر كيلوو
والله يابنات بعد سنوات من الرجيمات والحرمان عرفت وش الصح ووش الغلط
الرجيم اللي ينزل وزنك بسرعه ثقي مليون بالميه انه راح يرجع وزنك الدبل اول ماترجعي لنظامك الاول
شهر واحد امشي على هالنظام والله خلاص جسمي راح ينزل بطريقه ماتتخيليها وبتلاحظي نفسك جدا خفيفه وانتي راضيه عن نفسك كل الرضا
اول حاجه اقرأي هالمعلومات اللي راح اكتبها واقرأيها زين لين تقتنعي ميه بالميه فيها واذا اقتنعتي صدقيني راح تشوفي كل شي يتغير بحياتك
صدقوني يابنات والله كل شي تغير يالنسبه لي شكلي تغير طبعا للاحسن وجسمي صار مضرب المثل وحتى نظره الناس لي تغيرت مرره والله العظيم حتى بدوامي الكل صار يشوفني غير
ادري طولت عليكم بس هالمقدمه جدا ضروريه عشان تحسون بالاحساس اللي حسيته من نزلت من وزني وترى 35 كيلو ماهي شوي تخيلي كنتي حامله كل هالكيلوات بجسمك اول نقطه والاهم من كل شي ان الفتره اللي نقصت فيها هي سنه يابنات لاتستعجلون وتقولون بشهر والا شهرين لا خلوا بالكم طويل وصدقوني راح تكسبي 3 حاجات مهمه
اللي هي اول شي نفسيتك تكون على طول مرتاحه وهذا المهم
ثاني شي جسمك مايترهل صح يجي شويه ترهلات بس تقدرين بالرياضه توخرينها بكل سهوله
ثالث شي والاهم ان وزنك مايرجع الا بصعوووووبه قسم بالله مااكذب عليكم اني قعدت 3 شهور اكل دسم واغلب العشا من المطعم وقسم بالله ان وزني مازاد الا نص كيلو وهالنص بيومين اقدر انزله
خلصنا من المقدمه وجينا للكلام المهم
اقرأي زين وركزي وراح تشوفي شلون نزول وزنك راح يكون سهل شلون اول شي شوفي هالجدول واحسبي كم سعره يحتاجها وزنك ولاتزيدي عليهااااا
يعني مثلا
1- لينقص وزننا4 ــــــــــ 5 كجم في الشهر ناكل 1000 سعرة حرارية .
2- لننقص وزننا من 3ــــــ4 كجم في الشهر ناخذ 1200 سعرة حرارية .
3- لينقص وزننا من 1ـــــــ 1.5 كجم في الشهر ناخذ 1500 سعرة حرارية .
طبعا انا باالاضافه الى هالسعرات كنت وجبه العشا اتركها باغلب الاوقات او اعوضها بعصير او حبه فاكهه
لكن اذا كان نفسي اكل شي دسم اخليه لليوم كله مثلا اكلت وجبه دسمه من المطعم خلاص طول اليوم مااكل غيرها او اني ثاني يوم اكل فاكه بس عشان ماازيد على جسمي سعرات
اتمنى وضحت هالنقطه
اللي تقول ماعندها اراده ومادري ايش انا اقولك حبيبتي لاتحرمي نفسك ابدا لوان شاء الله اشتيهيتي خروف كوليه عليك بالعافيه بس خلاص لاتزيدين عليه شي نهائي وحاولي ثاني يوم تنزلين السعرات للنص
اهم شي لايزيد اكلك عن السعرات اللي انتي حددتيها لك على حسب النزول اللي تبين
ومعليش يابنات ادري طولت عليكم بس كله لعيونكم تستاهلون وامانه اللي تنقص او تفيد احد مابي منكم الا الدعا ان الله يحقق امنيتي والمؤمنين يارب
والسلام ختام
لاتسون تذكرون الله
ماشاء الله تبارك الله