حبيبتى ام ملك ربنا يتمم حملك على خير و تقومى بالسلامة بس مينفعش تعملى رجيم وقت الحمل لانى الدهون اللى هتنزل من جسمك هتنزل فى الدم و مركباتها سامة و جنينك بيتغذى عن طريق الدم فلازم دمك يبقى نقى عشان لا قدر الله لا يصاب الجنين باى اذى
زى ما عايزين جسمنا يبقى جميل عايزين ولادنا بردو يكونو اصحاء ان شاء الله
و لما تقومى بالسلامة ان شاء الرحمن ساعتها تفضلى معانا هنا فى المنتدى و ان شاء الله تستفيدى من كل الجروبات اللى بتتعمل و تبداى فى انقاص وزنك
و لكن كل اللى عليكى دلوقتى انك تحاولى ما تزيدى اكتر من الزيادة الطبيعية بتاع الجنين و الميه و المشيمة و ده ازاى بانك تبعدى عن كل ما هو غير مغذى و ملئ بالسعرات زى المقليات - الشيبسى - الحلويات - الشيكولاتات - المعجنات - الدهون على اد ما تقدرى
حاولى تعملى الاكل بزيت زيتون و قليل - اشربى اللبن منزوع الدسم بدل كامل الدسم - كلى العيش الاسمر بدل الفينو و العيش المعمول من الدقيق الابيض - لما تكونى عاملة رز و لا مكرونة و لا اى نشويات متجمعيش بين اتنين من النشويات يعنى ماتكليش عيش مع رز و لكن يا اما تاكلى عيش يا اما تاكلى رز - اللحوم ممنوع اللحوم البيضة و جلد الفراخ و ياريت تكترى من السمك - خلى اللحوم مشوية و لا مسلوقة - اكثرى من اكل السلطة و الخضار الطازة و الفاكهة و ان شاء الله ربى يوفقك و يقومك بالسلامة و يرزقك بالجنين المعافى ان شاء الله و اى استفسار انا تحت امرك