السلام عليكم ورحمه الله

رجعتلكم بعد غياب بس رجعه ميمونه ترا هههههه

حبيت احكيلكم تجربتي يالي كنت راح انتحر فيها بس ربنا لطف المهم يا طويلات العمر انا اقسمت باني لو نحفت راح ابلغ كل يالي بحالتي عن اي تجربه تنفع معي

ورجعت بعد انجاز وبانتصار كمان حاسه حالي بمعركه

شوفو يا الغالين حابه افيدكم وباذن الله تستفيدو متلي وربي يحقق امانيكم جميع -----------اخلصي هلكتينا


الحلوه يالي هو انا يعني اول ما دخلت المنتدى كنت ما شاء الله حاله ميؤوس منها وقلت ادور تشجيعات ولفيت ببالمنتدى وقرات تجارب البنات وتحمست كتير

خاصه اني بتجربه تحدي ومنافسه قويه والله يا بنات كنت ما احب اخرج مع زوجي لاي مكان بسبب الاحراج يالي كنت اواجهه وكتير كانو يفكروني امه او اخته الكبيره
حسيت حالي صباح الشحروره وهو فادي ههههههه
غير انه كان دايما يعايرني ويحرجني كتير قدام اهله ويئول انا بخجل امشي معك وصلت الحال اني سبت لاله البيت ورحت بيت اهلي وهون بلشت على القرار اللي لازم اتخده وئلت لحالي خلاص يا بنت بيكفي لا البيتزا ولا الكنتاكي راح ينفعك خلاص المساله بدها حزم ورحت الصيدليه وتوزنت كان وزني 98 بالزبط وقررت الانتحار البطيء صح اولها تعبت بس والله يا بنات ما في احلى من فرحه انك تحسي نفسك انتصرت رجيم كان قاسي علي كتير ومشي وشغلات المهم بالنهايه حققت حلمي مع انه ماما وتاتا ئديش فرحو لالي بس كانو خايفين علي

وحبيبه ئلبي تاتا كانت دايما تئول اصلا انت خساره فيه والله عند خفه دم تسوا اهله هههههههه على بالها انا يعني ههههاي
المهم نزلت وهلا صار وزني 75 بعرف لسه بدي بس والله يا بنات مبين في كتير

وقبل يومين طلب زوجي يشوف الاولاد عند اهلي حتى ما كلف خاطره يسال عني وقلت ماشي انت البادي وانت الاظلم كان موعده يجي عنا الخميس روحت الكوافيره صبغت شعري وعملت ميش انا هاي مهنتي بس ما بئدر اسحب شعري لوحدي المهم وعملت وجهي وما خبي عليكم طول الشهر وانا عند اهلي وانا شغاله بحالي من اقنعه لكريمات وبتاع كله حتى تغيرت 90 درجه وطبعا قصيت شعري وسشوار ولبست يالي شاريته ولاول مره بعد ما تخنت بلبس جنز لسه باين اشياء ومقدمات بس حلو ههههههه
واجا اليوم الموعود وقلت لبابا انا بدي اطلعلو عشان تعرفو لما المراه تحت الرجال بمخها ههههههه ولبست الاولاد طبعا اكسسوارات وعطور وانتو تعرفو الباقي طبعا هو جالس بالصالون ينتظر بابا يجيب الاولاد وطلعت انا بوجه زي عفريت العلبه والله ثم والله يا بنات حسيت انه ما عرفني للمره الاولى لحتى ركز فيني لما عرف مين وكان راح يغمى عليه مو مصدق نفسه معئول هاي زوجتي طبعا انا مو داخله الا لحتى افرجيه كيف الاصرار دخلت الاولاد وطلعت وهو المسكين لسه مصدوم ومبارح اتصل على بابا قال راح يجي وصار يتكلم كلامه المعسول طبعا حضرتي تعززت ولسه
يا بنت اختصري

المهم يا صبايا حابيت اوصل لالكم شي مهم انه اهم شي الاراده والاصرار وانسي الاعشاب والادويه كل الامور بحاجه لرجيم ورياضه ومشي وركزي على الاشياء المهمه وطبعا في اعشاب بس مو مضره او غريبه الاراده ثم الاصرار هاد الشي الوحيد يالي راح تنحفي عليه راح تتعبي بس بنتيجه
طولت عليكم بس والله حبيت افيدكم ادعولي بالتوفيق وعقبالكم صبايا