عرض مشاركة واحدة
كتبت : شيمـو
-
الحل الامثل لتخسيس منطقة الذراعين

السلام عليكم ورحمة الله وبركاته ياحبيبات ريجيم

عاملين ايه يارب تكونوا بخير كلكم

انتم عارفين طبعا اني كتبت قبل كده عن مشكلتي مع الذراعين وهي بصرحة مشكلة مع ناس كتير اوي وده بيكون حسب توزيع نسبة الدهون في الجسم
والمشكلة في الدراعين ان تلاقي الجسم كله بيخس ودول زي ماهما بيخلوا الواحدة حجمها اكبر منها مع ان ممكن تلاقي جسمها حلو جدا
وانا بقا بتاقبلني المشكلة دي من زمان بتخلي الواحد شكله تخين يعني انا جسمي بيخس الا دول
ومكدبش عليكو يا جماعة انا دوخت السبع دوخات علشان الاقي طريقة اخسسهم بيها ومعرفتش برضه لدرجة اني فكرت اقطع منهم واوزع علي الغلابة الذراعين smile19.gif

بس عشان انا عنيدة بقا ولما بحط حاجة فدماغي لازم اعملها فضلت تلات ايام ادور وابحث عن طرق وحلول لتخسيس الذراعين لحد ماجمعتلكم طريقة بيقولوا يعني انها مجربة وهتجيب من الاخر تعالوا نشوف

الطريقة الاولي :

طريقة الريجيم .
استنوا ماحدش يقول طب ما احنا عارفين . لا الموضوع مختلف شوية . في فعلا نوعيات اكل بتساعد علي شد وبناء عضلات الذراعين ومعروف برضه انها بتساعد علي رفع معدل الايض عموما طب زي ايه ؟ ( البيض - الزبادي - التفاح الاخضر - الخس - اللحوم الحمراء ) .
لو خلينا النظام الغذائي بتاعنا يتضمنه الحاجات دي فده هيساهم بشكل كبير فمنع ترهل الذراعين و زيادة معدل الحرق ومش الذراعين بس الجسم كله كمان .

الطريقة التانية :

هي طريقة غريبة شوية بس سمعت ان ناس كتير جربوها وجابت نتيجة مذهلة وهي :
ناخد ورق الكرنب ( الملفوف ) و نشويه في الفرن نص شوا ونطلعه نلف بيه دراعاتنا لمدة عدد الساعات اللي تحبيها ويكون احسن كل المدة ما تطول
بس استني قبل ماتلفيهم علي دراعاتك هتدهني دراعاتك قبل كده بزيت الزنجبيل للتعرق واللي خلاني اعرف ان الوصفة دي صح ان اختي اغاريد كانت قالتلي علي زيت الزنجبيل ده
وممكن تثبتيهم علي دراعك بكيس نايلون او شراب نايلون قديم .

الطريقة التالتة :

دي بقا خطوة اساسية سواء اتبعتي اي وحدة من الخطوات الي فاتت او لا وهي التمرينات الرياضية
التمرينات الرياضية للذراعين هي اكتر وسيلة بتخسس الذراعين وتشدهم وعلشان الي متعرفش التمرينات دي انا جبتلكم مجموعة من تمرينا شد ترهلات وتخسيس الاذرع
لكن سامحوني مقدرتش الاقي صور مرسومة كلها صور حقيقية علشان كده مقدرتش انقلكم الموضوع مصور الذراعين icon4.gif


تمرينات شد وتخسيس الاذرع :

1 . تمرين تنحيف وشد الزنود :
في التمرين ده هاتمسكي الدامبلز وتخليهم في مستوي كتفك وترفعي ايدك لفوق في خط مستقيم وتنزليهم تاني لحد كتفك والتمرين ده بيتعمل من 6 ل 8 مرات متقمسين علي مجموعتين وطبعا كل فترة ممكن تزودي المرات وممكن كمان تستخدمي بدل الدامبلز ازازتين مية صغيرين .

2 . تمرين دوران الاذرع :
وفي التمرين ده هاتقفي بشكل مستقيم مع ثني الركبتين بشكل بسيط وبعد كده هتحني الجزء العلوي من الجسم للامام وبعد كده تنزلي الذراع الايمن بحيث يكون موازي للارض وبعدين ترفعيه نحية صدرك وتكرري ده في الدراع الشمال وهكذا وده بيتعمل من 10 الي 15 مرة بمجموع نفس التقسيمات .

3 . تمرين الزاوية القائمة لشد الذراعين :
وفي التمرين ده المفروض تنامي بالجزء العلوي بس وعلي ضهرك فوق كرة التمرينات الكبيرة بحيث تكون اكتافك من ورا هي اللي لامسة الكورة وتكون رجليكي علي الارض زاوية قايمة المهم الجزء التحتاني منك مايكونش لامس الارض ويكون جسمك موازي ليها وتبتدي ترفعي ايدك لفوق راسك وبعدين تنزليهم وهما مفرودين لحد بطنك و هكذا برضه من 10 ل 15 مرة وعلي فكرة التمرين ده مش بيشد الدراعات بس ده بيشد المؤخرة كمان و بيساعد علي تخفيف الام الظهر والعامود الفقاري
وممكن برضه تستبدلي كرة التمرينا باي حاجة عندك مراتب صغير فوق بعضها مثلا .

4 . تمرين المروحة لشد منطقة تحت الابطين :
وفي التمرين ده بترفعي ايدك للجنب فنفس مستوي كتفك وتفضلي تلفيها دواير زي المروحة .

التمارين دي كلها لازم تمارس بالدامبلز او ازازتين المية زي ماقلنا علشان التاثير يبقا مضاعف

يارب اكون افادتكم ويااااااارب يجيب نتيجة معايا ومعاكم ياااااارب دعواتكم الذراعين 000003254.gif .