الموضوع
:
من وحي تجربتي اطعمة ومشروبات تفقدك 20 كيلو في 3 شهور
عرض مشاركة واحدة
كتبت : شيمـو
-
من وحي تجربتي اطعمة ومشروبات تفقدك 20 كيلو في 3 شهور
السلام عليكم يا حبيبات ريجيم
طبعا زي مانتوا عارفين الحياة مليانة انواع اكل ومليانة كمان عقاقير طبية ومليانة اعشاب ومشروبات
منها اللي بيتخن ومنها اللي بيخسس و منها اللي جاب نتيجة مع ناس ومنها اللي مجابش
بس احنا مانقدرش نقول ان كل حاجة بتجيب نتيجة
بمعني ؟؟
بمعني ان مش معني الوصفة مجابتش معاكي نتيجة يبقا هي مش صح او مش مظبوطة ولكن هي مش مناسبة ليكي انتي ومناسبة مع غيرك
وده يثبتلك ان فيه قاعدة مهمة جدا وهي ان كل حاجة ربنا خلقها ليها فايدة ولكن المهم اننا نختار الانسب لينا منها لان كل جسم غير التاني
ولان جسمك بيختلف عن جسم اي وحدة تانية حتي لو كانت اختك شقيقتك
ودي حاجة تخليكي ما تيأسيش
بس ده مايمنعش ان في ثوابت برضه وان في اكل معين بيخسس اي حد ومناسب لاي جسم
زي ايه مثلا ؟؟
زي مثلا : التفاح - الكمثري - الفراولة - الشوفان - القمح الكامل - البرتقال ... الخ
ومابين الاكلة دي والصنف ده والفاكهة دي ونوع الاعشاب ده بيفضل هناك سر ؟؟؟!!! ايه المناسب ليكي ولجسمك
علشان كده قررت اني اكتبلكم من وحي تجربتي الشخصية ايه اكتر اطعمة كانت دايما بتساهم في نزول وزني وايه اكتر وصفات كانت ليها الفضل ده بعد الله يمكن ولعل وعسي انها تفيد اللي فنفس جسمي ونفس مواصفاته بس استحملوني شوية بقا حد وراه حاجة ؟ طاااايب
بصوا بقا صلوا عالنبي
انا وزني كان 130 وطولي 173 وشكل جسمي زي الكمثري بس دراعاتي برضه مليانين
المهم عملت ريجيم الاربع شهور اللي فاتوا وحاليا وزني اصبح 106 بسم الله ماشاء الله ولسة طبعا بكمل
اكيد طبعا دي مش اول مرة اعمل فيها ريجيم وعملت ريجيم كتير قبل كده من الاعدادي وانا بعمل ريجيم بس اللي لاحظته فكل مرة ان اكتر حاجة كانت بتخسس جسمي هي نوعيات الاكل دي
1 . التفاح الاخضر :
التفاح ده بجد بيشبع ومكانش بيخليني اكل كتير وفنفس الوقت كان بيفضل في المعدة فترة فبيساعد الجسم انه يحرق علي سعرات قليلة جدا
2 . الزبادي اللايت :
اللايت بالذاااات ومش العادي ونوع معين بالاخص الي كان بيجيب معايا نتيجة اخر جزء من اسمه ( تيل ) وكانت بتعمل اعلاناته نانسي عجرم هههههههههه مش عايزة اكتبه عشان مش عرفة ممنوع ولا لا بس بجد الوحيد الي بيجيب نتيجة سريعة خصوصا لما تاخديه وقت الفطار .
3 . البيض :
رهييييييب وبيساعد في بناء الكتلة العضلية يعني مش هايخلي جسمك مترهل مع التخسيس وكان بيشبعني بجد بيضة مع ربع رغيف وترانشتين طماطم وخيار .
4 . الفراخ المشوية :
طبعا غنية عن التعريف ومين مايحبهاش ؟؟ لزيزة ومشبعة ومغذية كمان وهي كمان بتساعد في بناء الكتلة العضلية والحرق .
5 . البرتقال :
وما ادراكي ما البرتقال طبعا مش محتاجة اتكلم .. شبع طويل وحرق سريع و سعرات منخفضة ده غير ان طعمه لزيز والكل بيحبه
فعلا الخمس حاجات دول انا عشت عليهم ست شهور متواصله كغذاء اساسي وفي اليوم الفري كنت باكل كل حاجة عادي باي كمية وصدقوني كنت خسيت كل الوزن وقربت اوصل للمثالي اكتر من مرة ولكن عارفين طبعا شيطان النفس واغراءات الاكل
المهم ماعلينا الوصفات بقا الوصفة الوحيدة الي جربتها فعلا وجابت معايا مفعول من اول اسبوع والي مازلت مواظبة عليها
المشروب الحارق حبيبي
وهو يتكون من ( ملعقة جنزبيل + ملعقة قرفة + ملعقة كمون + نصف ليمونة بالقشر )
والله ساحر بجد وبيضيع الكرش خالص والانتفاخات وبيحسسك انك خفيفة وبيساهم بدرجة كبيرة في انتظام الدورة الشهرية وتنضيف الرحم
مش عايزة اقلكم اتبعوا الحاجات دي لمجرد الكلام وخلاص بس نصيحة مني بجد الحاجات دي مفيدة اوي واكتر حاجات بتساعد مع المواظبة
دعواتكم ليا و للكل
بحبكم في الله