هاي بنوتات
بأذن الله ع العيد تصيرون أحلى رشيقات

نصيحتي لكم من خبرة سنوات بالدايت

الأكل الصحي + الرياضة = أسهل و أظمن طريق للرشاقة

يعني لا أحد يكذب عليك و يقول آيس كريم دايت !!
مكرونة بالجبن دايت !!

الله يستر لا يقولون لقيمات دايت !!
شوفي ..القضية مو النوعية و بس ...القضية نوعية الأكل و كميته

يعني عادي لو تاخذين صحن صغير مكرونة أي نوع تحبينه ---بس صحن صغير مع سلطة
انتي كذا تحكمتي بالكمية ..و النوعية حسنتيها بالسلطة لأن المكرونة بالبشاميل نشويات و بروتينات و كالسيوم و اضفتي كل اللي ناقص بالسلطة ..
و بما أننا برمضان ... الله يتقبل منا و منكم خواتي الغاليات
بعد التمر و الماء ..و الصلاة .
1 حبة سمبوسة بالفرن + 1 حبة فطاير بحشوة صحية بدون زيوت +صحن صغير شوربة أي نوع + سلطة
يعتبر افطار صحي جداً و مستحيل يسمنك ..

بعد التراويح اشربي ماء أو شاي أخضر و سوي رياضة مشي ساعة - هرولة -جهاز اذا عندك

بعدها بساعة أو نصف ساعة خوذي لك حبتين فواكة اللي يعجبك -يكفي انها مليانة فيتامينات و معادن و جسمك و بشرتك محتاجها و بقوه ..
غير ان الفواكة أفيد و اسهل للهضم اذا أكلتيها على معده فاضية ..

اذا جعتي بأمكانك تبكرين السحور ..
أو تاخذين شي ع السريع ,,,زبادي مع 3 تمرات
أو
حبة بسكوت صغيرة
أو
حبة معمول مع قهوة
أو
حبة فطاير مع شاي

السحور نفس الطريقة اي شي صحي خفيف مع سلطة عشان تملا بطنك و تزودك بالحديد و تنحاشين عن فقر الدم
(-:

سحوري غالباً بما أني فاشلة بالمطبخ ( و لا فخر )
(-:
آخذ 2 توست بر أو شريحة تورتيلا بر مع أي شي بالثلاجة (بيضة _ملعقتين فول_ بقايا حشوة السمبوسة _ صوص البيتزا ....الخ ) + سلطة و أكرر سلطة خليها صديقتك بعد الوجبات برمضان و غيره ...

الرجيم أكل صحي متنوع ملون لذيذ غني بالفوائد عشان يساعدك على الرياضة و يطرد من جسمك المواد السامة اللي تحببك بال Junk Food و الأكلات اللي ضررها أكثر من نفعها ..
الا اذا استهبلتي و مديتي ايدك على الحلويات ...
و مصختيها بزيادة ...و أكلتي 3 او 5 قطع !!

انا اللي دايماً اللي اقنع فيه نفسي اذا اشتهيت شي حالي أو دسم أقول طوووول عمري أزط بهالأكل و ما فادني
)-:
شحوم و مغثة و جسم بايخ و شهور يالله نزلتها ... بعدين رمضان أسهل فرصة للرجيم و أسرع لأنك طووول اليوم صايمة و لو اضفتي شوية تمارين تنزلين كيلوات محترمة بآخر الشهر ...

لا أوصيكم ...قبل الفطوب بساعة أقل شي تمارين لمدة نصف ساعة الى 45 دقيقة و اذا ودك خليها ساعة ,,,وش خسرانه ؟
شوية شحوم ؟ خليها تروووح

احنا بنات و رانا عيد و كشخة و حياة بنعيشها بثقة و ملابس حلوة
(-:
بالنسبة لي..

نظامي من العام و اللي قبله نوعين تمارين
قبل الفطور دراجة 20 دقيقة + 10 دقايق أوربترك
+
تمارين شد لجميع مناطق الجسم

بعد التراويح مشي ساااااااعة

تمنياتي للجميع بأوقات عامرة بذكر الله و عبادته و شكر نعمته و من ظمنها الجسم السليم و الأكل الخفيف

و لا تنسوا قول الرسول صلى الله عليه و سلم ( نحن قوم لا نأكل حتى نجوع ...و اذا أكلنا ...( لا نشبع )

لو نطبق معادلة عدم الشبع بكل أكله تدخل أفواهنا كان مستحيل نسمن ...بس مشكلتنا ال over -eating
الأكل فوق الحاجة و كأن الأكل بينقرض ...

وفقكم الله ..و حقق أمنياتكم ..