مجتمع رجيم - عرض مشاركة واحدة

كتبت : azmiralda000

انا كنت كتبتلكم قبل كده طريقة الفتة المصرية عشان انا مصرية
النهاردة بقى ان شاء الله هكتبلكم طريقة الفتة الفلسطينية لأن جوزى فلسطينى و طبعا كان لازم اتعلم من حماتى الاكلات الفلسطينية اللى هو بيحبها

المقادير:

فراخ أو اللحمة
رز مصرى (ممكن بسمتى)
بصلة صغيرة مقشرة
3 فصوص حبهان
ورق لورى (اختيارى)
ملح
فلفل اسود
4 ملاعق كبيرة زيت للقلى
3 فصوص ثوم
4 او 5 حبات فلفل أخضر طويل (حامى)
عصير 5 ليمونات صغيرة او 2 من الليمون الكبير
خبز الرقاق الابيض
لوز مقشر
كاجو(اختيارى)

على فكرة طبعا كمية اللحمة او الفراخ او الرز حسب عدد افراد اسرتك

الطريقة:

اولا نقطع اللحم او الفراخ و نغسله و نحطه فى حلة مع الحبهان و البصلة وورق اللورى و فلفل اسود و لتر ماء و نسيبه على نار لغاية مايغلى
نشيل الزفرة اللى على الوش و نحط الملح و نوطى النار شوية

نغسل الرز و نحط معلقة السمن او الزيت فى الحلة على النار و نقلبه مع الرز دقيقتين و نضيف عليه كوب من شوربة اللحم و نزود الباقى ماء لو محتاج و نظبط الملح
نحمر الكاجو و اللوز فى الزيت و نطلعه على مناديل
نضع التوم و الفلفل الاخضر و عصير الليمون و ملح فى القطعة اللى مع الخلاط اللى بتفرم او فى الخلاط نفسه (دى اسمها الدقة)

التقديم:

نقطع الرقاق قطع صغيرة و نحطه فى صينية التقديم
نحط عليه حواى تلت كوب من مرقة اللحم و نسيبه شوية يشربها
نحط عليه الارز و بعدين نحط عليهم الكاجو و اللوز المحمصين
و عليهم نحط اللحمة او الفراخ (يفضل نحمرها بعد سلقها مع معلقة سمن على النار)
و جنبها بنحط الدقة و ناخد منها نحط على الرز و ناكل بالهنا و الشفا

ممكن كمان ناخد من مرقة اللحم نعمل شوربة لسان عصفور او شعرية
و ممكن كمان نقدم معاها لبن زبادى

يا ريت بقى تبقوا تقولى بس بصراحة مين احلى الفتة المصرية و لا الفلسطينية؟؟؟؟؟؟؟؟؟؟؟