مجتمع رجيم - كيف انزل وزني بسرعة

حلو السؤال
الموضوع يتطلب وقت بطبيعته، النتيجة السريعة تخسرها بوقت أسرع
الإجابة سهلة، تنفيذها يعني ممكن يكون صعب.. فقدان الوزن يحتاج صبر وانضباط خصوصا في البداية
هم حاجتين.. اضبط الأكل واضبط الحركة
يعني لازم تخفف من الكربوهيدرات والدهون.. يعني الرز، المكرونة، الخبز، البطاطس، الزيوت الجبن.. هذي لازم تتخفف.. أما الخضار، البروتين سواء دجاج أو سمك أو سلمون، روبيان هذا اللي لازم تركز عليه أكثر.. اللحم مدهن شوي وهو محسوب على البروتين بس أنا أفضل ما تكثر منه لانه مليان دهون مقارنة بالسمك والدجاج، التونه على فكرة مرة قليلة السعرات اللي فيها يعني لو تستحمل تاكلها رح يكون ممتاز
الأفضل كمان تقسم الأكل خمس وجبات كل ثلاث ساعات.. وكلما حسيت بالجوع حاول تشرب مويه بليمون (مرة منعش على فكرة) أو زنجبيل، شاي أخضر.. فيه عندك الكرفس celery والموز الأخضر (أخضر مو أصفر) أو حتى البطاطس النية لو تستحمل تاكلها هذولا الثلاثه مره كويسين لانه هضمهم صعب فالمعدة تنشغل بالهضم عن الجوع.. والنتيجة انك تجوع أقل..

أول شهر بيروح في التعويد أقصد انك تتعود على قلة الأكل والجوع يا حرام.. طبعا لازم تعطي نفسك إجازة اسبوعية تاكل فيها اللي تبغاه عشان تجدد نشاطك وكمان جسمك ما يتوهم انك في مجاعة ولا حاجة (حالتنا الكسيفة ولله الحمد).. لان الأكل لما يقل الجسم يتخذ اجراءات وقائية ويقلل الحرق تحسبا لأنه فيه فعلا أزمة غذائية.. طبعا هذا الشي احنا ما نبيه لانه نبغى نحرق أكثر..

لازم كمان ما تقطع الكربوهيدرات، يعني في ناس مثلي من الحماس بدؤو الريجيم بدون كربويدرات يعني مرة قطعتهم، الحقيقة هذا جدا خطأ لانه رجعت أكلتهم بشراهة بعدين هذا غير انه الكربوهيدرات مهمة عشان تسهل عملية الهضم وما يصير فيه امساك.. غير انه نسبة الأحماض الأمينية ترتفع لو اعتمدت على البروتين كثير وهذا يضر كمان..

اممم
بالنسبة للرياضة
خليها في حياتك العامه
يعني اطلع بالدرج، ارقص واقفز، لو تقدر تستعمل الدراجه حيكون ممتاز (طبعا احنا الحريم ممنوع القيادة!) اتحرك عموما أكثر..
هذا غير المشي أو الجري
تحتاج نص ساعة والأفضل ساعة مشي

خلاصة الكلام تناسب الداخل مع الخارج ( حرق السعرات)
رياضة وتخفيف أكل

كل حاجة غير كذه كلام فاضي، اسأل مجرب
انا جربت الأجهزة الغبية هذي اللي يبيعونها على التلفزيون، والأعشاب، والحبوب وكانت اخر شي جربته
طبعا هذا على مدى 12 سنة تقريبا
وما في شي فاد معي كثر الرياضة وطبعا صرت اتفاخر بنفسي الطويل لان لياقتي صارت أعلى بكثير :]

إلا لو بتسوي عملية طبعا هذا مجال مختلف تماما وهو للحالات المستعصية

وبس
سلامات تحيات تشكرات
دمتي بحفظ الله ورعايته