مجتمع رجيم - شخصيتك من شنطتك

[FT=smallft][FT=arial][FT=Arial]https://upload.3dlat.net/uploads/3dl...63c107a8e1.gif[/FT][/FT][/FT]

فى أحدى لحظات التأمل و أنا قاعدة فى النادى بضرب مكرونه بالبشاميل على ما الولاد يخلصوا التمرين جاتلى فكرة فظيعة أن أكتر حاجة بتعبر عن شخصيه الست شنطتها قولتولى أزاى
الشنطة الشوال .. دى غالبا للست المسحوله اللى طول النهار بتلف فى الشوارع من المدرسة لكورس الالمانى لتمرين السباحة لدار القرأن للمرسم معنى كده أنها عايشه فى الشارع .. تلاقى فى شنطتها كتب خارجيه و داخليه و شيتات و أقلام و فرشاه و مشط فلايه و كريم و غيار زياده و فوطه و صابونه و كل انواع المناديل اللى خلقها ربنا و ابره و فتله و مقص و بلاستر و دوا كحه و جاكتات يمكن الجو يسقع و كابات يمكن الجو يحرر و شويه ساندوتشات و ترمس نسكافيه و علبه كيك و كنبه ستوديو صغيره لو حد من الولاد حب يمدد شوية .. شنطتها كحلى او رصاصى علشان ميبانش فيها البهدله و هتكون كروس علشان ايدها تبقى فاضيه هى شنطه يتيمه مفيش غيرها بتلبسها هى و الكوتشى و البطلون الجينز و تغير من فوق و لو لاقدر الله فى يوم من الايام جاتلها خروجة تلاقيها متشعبطه فوق دولاب و لا بتزحف تحت سرير بتدو على الشنطه اللى جابتها من 7 سنين علشان تلحق ميعاد كتب كتاب اخوها .. دى ست عمليه جدا و مشغوله اوى اوى و اخر حاجة تفكر فيها المظهر .. صحوبيتها حلوة مفيهاش نم و لا ذنوب و لا معاتبه هى اساسا مش فاضيه تعاتب و غالبا نسيتك و هى قايمة
كلاسيك اسود بنى .. دى موظفة و مكافحة بتجيب الشنطه اللى تليق على كل اللبس و تكون بجيوب من جوه و سوسته من بره علشان تحط فيها المفاتيح و فلوس المواصلات يهمها ان ايد الشنطه تكون بتتعلق على الكتف علشان تعرف تمسك الكرنبه فى ايد و كيس البرتقال فى الايد التانيه .. الست دى مثال الكفاح و التضحيه هى عاوزة يبقى مظهرها مقبول مش اكتر يعنى مش لازم تبقى شيك علشان هى مش هابله و هتضيع مرتبها فى شنط و جزم و خيبه هى بتعمل جمعيات علشان حاجات تانيه اهم بس هى برضه مش عاوزة يبقى شكلها عرة و يقعدوا يتكلموا عليها بتجيب بقى الحاجه المحايدة و لما ربنا يفرجها بشويه فلوس زياده بتجيب شنطه بيج و تلفها فى كيستها فى الدولاب لزوم الانتكه و تفضل مستخسراها تروح بيهاالشغل لا تتبهدل و هى اساسا مش بتروح حته تانيه .. النتيجة ان الشنطه يا موضتها بتبطل يا بتقشر و هى لسه جوة الدولاب و فى الاخر بتحط فيها المشابك .. الستات دى جدعة و صاحبه صاحبتها و تعتمدى عليها بس خدى بالك بتاخد على خاطرها بسرعة
الشنط الملونه .. دى بقا صاحبتها كانت فى يوم من الايام بنوته دلوعه و شيك و مش قادرة تصدق اللى جرالها و أزاى اتحولت من بكيزة هانم فى بيت باباها لزغلول فى بيت جوزها .. تعمل اييييييييه تشترى شنط محاولة انها تسترد انوثتها الضايعة , شنط شنط شنط الوان و اشكال ايشى بشراشيب و ايشى بجليتر شويه مرسوم عليهم و شويه رياضين و حبه كلاسيك .. دولابها فيه شنط اكتر من اللبس حاجة تفكرها باللذى مضى مضيعة فلوسها على الشنط و شويه على الشوزات .. دى بقا غالبا دمها خفيف و كوميدية و عايشه حياتها تريقة على حالها و حال اللى حواليها
الكلاتش و البونى .. الترجمه العربي بتاعه الكلام ده الشنط الصغننه .. صاحبتها بتبقى عايشه دور الليدى .. يا اما لسه مخطوبه و عاوزة تتانتك يا اما مرفهه شويتين يا أما ولادها كبروا و قررت ترجع تعيش حياتها .. دى الرايقه اللبس كلاسيك الشوز عالى الضوافر متظبطه لو مش محجبه شعرها معمول و متسيب و لو محجبه طرحها شيفون و حرير و متشوفيش عندها الجيل و القطن دول اساسا .. دى رااااااااااااااااايق ه و لذيذه و صوتها واطى و ضحكتها عصافيرى و قربوا ينقرضوا خلاص
محفظه و مفاتيح .. دى أكيد بنوته صغيرة كل اللى معاها محفظه صغننه أو جراب الموبايل و دبدبوب قد الفيل الحامل فى خرتيت بتقول عليه ميداليه و لما تساليها يا بنتى ليه كبير كده ده قدك تقولك اصله بيضيع.. بيضيع فين يا بنتى هو انتى معاكى شنطه من اصله .. ما علينا دى بقا دنيتها لسه بمبى بمبى بتركب عجل و بتروح ندوات و بتفكر تجيب موتوسيكل سيبيها تعيش حياتها و زقططى معاها دى هتصغرك
شبكه العيش و البوك .. دول بيرتبطوا ارتباط وثيق بالاسدال لست بيت مكافحة عاوزة تلحق وقتها قبلما العيال يرجعوا من المدرسه .. دى غلبااااااااااااااااا ااانه وصلت بيها ان مش فارق معاها شكلها و لا مين حيقابلها المهم اللى وراها يخلص دى بقا طيبه اوى اوى

الخلاصه ان كل الستات عسل و طيبين و امامير اومال كنتوا فاكرين ايه هو احنا فيه زينا يخرب بيت طعامتنا