مجتمع رجيم - جرح ما راح ينمحى من الذاكرة؟

والله انا عندى موقف يمكن بقالة اكتر من 10 سنين و كان من اعز صديقاتى

والله الموقف لو حكيتة محدش هيصدقة

كنت فى ايام الكلية و الكل يشهد لى بالتفوق و كانت اول سنة و ساعته كنت ترتيبى التالت على الدفعة

المهم انى مكنش لى اصدقاء تقريبا غير صديقة واحدة و كانت مثل الاخلاق والدين ويشهد لها الجميع بكل خير ابتدت واحدة من الزميلات التقرب منا هى كانت مستواها اقل مننا علميا بس اخلاقيا لا غبار عليها

المهم ان صداقتنا اتعدت كل الحدود و بقت هى من اهم الناس فى حياتى و اغلى عندى من اخواتى وكل وقتنا مع بعض مذاكرة و اكل و خروج تقريبا زى الاخوات

ومش عايزة اقولك انا كنت بعمل اية علشانها ويمكن كنت باجى على نفسى كتير علشان خاطرها

وجة يوم كانت شكلها غريب و حكتلى انها عيانة بمرض مش كويس وانها هتسافر تتعالج و كان دة قبل الامتحانات على طول

طبعا انا نفسيتى كانت فى الارض مفيش مذاكرة مفيش تركيز كل همى انى اطلعها من اللى هى فية لحد ما قلتلى انها مسافرة تعمل تحاليل برة و هترجع بعد اسبوع

كان اطول اسبوع مر عليا مستنة نتيجة تحاليلها و علشان اطمن على اختى العزيزة

المهم فاتت الايام وانا فى تدهور فى حالتى النفسية وهى قفلت على نفسها مش راضية تكلم حد خالص

وعدت الايام و جة يوم نتيجة السنة التالتة الترم الاول وكانت نتيجتى لاول مرة مقبول وعندى مادة على الرفع يعنى تقريبا كنت هاسقط فيها

وهى خمنو نتيجتها اية ؟؟؟؟؟؟؟؟؟

هى التانية على الدفعة . ساعتها مزعلتش بالعكس كنت فرحانة علشانها كتير و قلت جايز نفسيتها تكون احسن و يكون مساعد لعلاجها.

طبعا كل يوم اتصال بيا وشكوى من مرضها وقصص تانى كتير لو قلتها مش هيكفينى اسبوع احكى علية

بس اغرب حاجة ان بعد التخرج و ربنا اكرمنى بتقدير جيد تمر الايام و تخيلو اعرف اية ان اختى و صديقتى كانت بتكذب عليا فى كل دة

وانها كانت بتتمتع بصحة احسن منى والله و انها كانت بتستغل فترة الامتحانات و الضغط و تزيدة عليا بمشاكلها و دة بيكون بعد اما اسهر معاها و اذاكر لها و تيجى النتيجة و تبين كل شئ

طبعا القصة كبيرة بس انا كدة بكون اختصرتها معلش طولت عليكم بس انتى فكرتنيى باكبر صدمة فى حياتى و الى الان تقريبا بفتكر الموضوع دة و تقريبا برضة معنديش صديقات بسببها

والحمد لله على كل شئ ودة كان درس كبير ليا