كفتة الأرز من مطبخي وطبعا يالصور
مجتمع رجيم / وصفات اللحوم
كتبت :
يويا 268
-
حبيباتي
جايبة لكم اده وصفة مصرية للكفتة وهي كفتة الأرز
المقادير
لكل كيلو لحمة مفرومة
-2ونصف كوب أرز مصري مغسول ومنقوع علي الاقل ساعتين ومصفي تماما
-ربطة صغيرة من ال: كزبرة الخضراء-البقدونس-الشبت مغسولة جيدا طبعا
-بصلة كبيرة
-ملح وفلفل وبهارات
كل ده علي بعضه في الكبة(مفرمة اللحم المنزليه) او عند الجزار لو هتعملي كمية وده اللي انا باعمله وعشان كده مش مصورة الخطوة دي
النتيجة هتكون كده
انا باعمل كمية عند الجزار واشيلها في اكياس في الفريزير بالشكل ده اما تفك من التلج تبداي تشكليها صوابع او ممكن كورات
ثم تحمر في زيت ساخن كده
انا عملت شوية في الفرن عشان حلم الرشاقة الابدي بتاعي
وانت بتحمري تضربي طماطم في الخلاط (علي حسب كمية الكفتة) انا استخدمت 4 مع معلقتين صلصة وعليهم 5 فصوص ثوم مفروم وملح وفلفل وشوشة بهرات و5 معالق زيت ذرة وتسيبهم علي النار
اما الطماطم تتسبك خالص تكوني خلصتي تحمير وطلعتيها في المصفاة عشان الزيت تنزليها علي الطماطم وتزودي ربع كوب ماء وتغطي وتسبيها تغلي
ملحوظة هامة: لا تطولي الغلي عليها لانها هتنفش وتطري قوي وتكون وحشة وعشان كده تزودي الماء قليل بقليل عشان تستوي صح
وده شكلها اما استوت
وقدمتها مع ارز ابيض وممكن مع الخبز المصري بتكون روعة بردو
زوووم
زووم اكتر
وبس كده
يا رب تعجبكم
