إحنا بنشتري راجل..!!

مجتمع رجيم / الحياة الأسرية
كتبت : جنه الفردوس ..
-
إحنا بنشتري راجل..!!



راجل..!! PIC-453-1352177102.j

لما يقرر الرجل الجواز فيه ناس بتعتبره انه فى غير كامل قواه العقلية ..ولو قعد أى واحد مع اصحابة وقالهم ( هيييه.. على فكرة يا جماعة انا حتجوز الشهر الجاي ) ..حتلاقى أصحابة المتزوجين منهم والغير متجوزين حيقولوله
( وليه يا بنى كده ما انت كده اشطه) و ( كان بدري عليك عليك بدري) وإلى اخر نوعيات الجمل دى اللى بتحسس الراجل انه موش داخل دنيا جديدة ولكن داخل علشان يدفن سعادته وهناه فى عش الزوجية ..ولكن ليه فكرة إن الراجل لما يعوز يتجوز يشعره اللي حواليه انه داخل على معركة ؟! .. موش عارف ؟! ..أقولك أنا ..اصل الجواز اليومين دول (قطمة وسط ) وخصوصا لو كان الطرف التاني غير متعاون .. وقد قال لى أحد أصدقائي المتزوجين فى مرة من المرات
( أنا أول ما إتقدمت لمراتي أبوها قاللى يا بنى إحنا بنشتري راجل ) ثم وضع صديقي يده على رأسه وقالى فى حسرة ( وبعدين شلت زلط ) ثم وضع نفسه فى مكان العالم ببواطن الامور وقاللى :
( لو اتقدمت لواحدة وابوها قالك احنا بنشتري راجل يباه حتشيل الليلة يا معلمي ) .. أصل كلمة ( بنشتري راجل ) دى لها معنيين وكل واحد ونيته بأه فجايز يكون معناها بنشتري راجل يعنى ميهمناش الفلوس .. وجايز يكون معناها بنشتري راجل يعنى شيل يا عم الحج كله هو انت موش راجل ولا ايه !.. وبصراحة الراجل معندهوش مانع انه يشيل كله بس بيكون فى حالة واحدة بس اللى هى ( على أد لحافك مد رجليك ) يعنى محدش يقوله هات كذا ولا كذا على اد اللى معاه حيجيب لكن الحاصل واللى هو سبب الكلام التهمكي على المقبلين على الزواج
هو التعنت أحيانا ومحاولة تكتيف الراجل بحاجات غريبة فيه منها اللى ميرضيش الشرع وفيه منها اللى ميرضيش الأصول.


وهذه هى بعض طرق تكتيف المرأة للراجل فى عقد الزواج :


1- العصمة فى إيدي
موش عارف سمعتها أول مرة فين فى فيلم عربي كده .. وموش عارف أصلا
الناس اللى إفتكست الجملة دى إفتكستها على أنهي أساس .. فإذا كان الراجل فى
بيته هو العائل وهو المسئول عن اسرة بيكونها وبيحافظ عليها وكله على حساب صحته ..فإزاي تستوى وتستقيم ان يكون هو المسئول عن الاسرة وله حق القوامة وهو لا يملك مصير الاسرة دي علشان مراته ممكن تيجي فى يوم من الايام وتقوله
( يا توتي أنت طالق ) ويضيع كل اللى بناه فى لحظة واحدة ؟!!..مع العلم ان المرأة بتحّكم عاطفتها وموش بتقيس الامور بعقلها وخصوصا لو إتحطت تحت ضغط عصبي.. فأغلب الستات ومع المشاكل الجامدة تقول للراجل ( طلقني ) فيرفض الراجل ولما تتحل المشكلة تقوله الست بعد لما تهدى وتروق ( أنا موش عارفه ازاي قولت الكلمة دي ) .. تخيل لو الست دي معاها حق الطلاق كانت قالت له ( أنت طالق) وإنفض المولد وتعب السنين راح والاسرة اتشردت بسبب كلمة طلعت بدون تفكير ..وبعض الستات اللى نفوخهم ضرب يقولك كده انتوا بتحتقروا عقل المرأة والكلام الحمصي ده ..!! مع ان ده مفيهوش اى تحقير للمرأة لأنه كل ميسر لما خلق له.. لما اقولك انت لا تصلح مثلا لمزاولة الطب لانك موش دكتور هل ده فى تحقير لك ؟! ابدا ..لأنك غير مهيأ وميسر لده والمرأة كده برضه ربنا خلقها رقيقة المشاعر حساسة تحكم قلبها فى الامور وده سر جاذبيتها .. يباه القضية موش تحقير ولا بتاع .. بعدين تحقير ايه؟! وليه شغل العداوة ده اللى الناس الفاضية عماله تزرعه بين الرجل والمرأة وكأنهم موش محتاجين لبعض ؟! .. ففيه ناس عماله تهرتل والبعض ماشى وراهم .. فحكاية العصمة فى ايدي دى ضد قوامة الرجل وضد كرامته برضه والبديل عند المرأة لده هو ( الخُلع ) اللى ممكن تستخدمه ولكن الفرق هنا إن القاضي موش بيحكم لها بيه إلا لو كان السبب وجيه للخُلع ..وأنا لا اظن ان الست تشترط على الرجل حكاية العصمة فى ايدي دي وهو شرط باطل إلا
إذا كانت فى بداية الزواج موش مأمنه للراجل ده أو حاسة من ناحيتة بغدر وبالتالى متتجوزوش أحسن .


2- الشقة بإسمي
ودى من غرائب الحاجات اللى ممكن واحدة تطلبها من رجل قبل الزواج وهى بحنية وفى قعدة صفاء تقوله ( الشقة إكتبها بإسمي يا حبيبي ) ..ومفيش مشكلة إن الرجل يكتب الشقة بإسم زوجته فى بداية الزواج كنوع من الهبة منه لها.. هو حر فى قراراته ولكن ميبأش مفروض عليه يعمل كده وإلا الجوازة تبوظ .. ولو إعترض الرجل تقوله أنت موش واثق فيا .. وهو منطق غريب جدا لأن مين هو اللى موش واثق فى مين اللى بيطلب شىء غير حقه وجعله شرط للزواج ولا اللى أعطى كل شىء وعايز بس يحتفظ بعش الزوجية باسمه لان ده من كمال قوامته وسيادته على البيت ! .. فأعتقد إن الست اللى تعمل حكاية الشقة بإسمي دى كشرط للزواج هي من الأساس موش واثقة فى الرجل ..وداخلة الجوازة دى بمبدأ
( ضل راجل ولا ضل حيطة ) ..وبالتالى دى الجوازات اللى موش يتدوم .. لأن الجواز الغرض منه هو السكينة والاطمئنان فإذا كانت الثقة موش متوفرة لأحد الأطراف فأعتقد ان الجوازة دي موش حتنجح .

3- المغالاة فى الشبكة .
ودى المفروض هدية من العريس لعروستة والشرع لا يجبره على الشبكة كما يجبره على المهر ..ولكن العرف السائد جعل من الشبكة شىء لابد منه .. ومفيش مشكلة ان الرجل يقدم شبكة لخطيبته وموش هى دي القضية فى الواقع يعنى .. القضية هى المغالاة فى الشبكة وجعلها وسيلة للتباهي والفشخرة بين بنات العيلة .. وتلاقى والد العروسة يقول للعريس (بص احنا نرفع سعر الشبكة شوية علشان تكون بكذا أصل البت اختها جالها شبكة بكذا ) ..طب العريس ماله اختها جلها بكذا ولا بكذا !! ..فكل ميسر لما خلق له .. بعدين لو البنت اتعودت من أولها انها تبص لغيرها يباة حياة الراجل حتكون ( مفقود مفقود يا ولدي )
لأن معلوم ان مستوى الناس المادي موش زي بعض .

4- المغالاة فى المهر
المهر واجب على الرجل ولازم يدفعه للمرأة ..وبعض الرجالة فاكر انه بيدفع المهر علشان العروسة تأسس بيه بيت الزوجية ولكن فى الأصل إن المهر بيتدفع لمجرد الزواج زى ما بيقولوا الناس بالبلدي كده ( حق رقبتها ) .. والمهر حق شرعي للعروسة ملكها وحدها ولا يجوز للأب انه ياخد شىء منه .. لأننا دلوقت بنشوف بعض الأبهات يغالوا فى المهور وياخدوا منه أو ياخدوه كله وده حرام لأن المهر ملك للعروسة .. وده كله شىء جميل طب فين المشكلة بأه ؟! .. المشكلة هى المغالاة فى المهور ظنا منهم إن ده بيغلى البت فى عين العريس وبيرفع من قيمتها ..على الرغم إن قيمة البت موش فى اللى بيندفع فيها ولكن قيمتها فى اصلها الطيب .. ولذلك تلاقى فى الاثار إستحباب تيسير المهر زى أيسرهن مهرًا أكثرهن بركة .

5- المغالاة فى مؤخر الصداق .
مؤخر الصداق هو المبلغ اللى بيكتب فى العقد وبتاخده المرأة فى حالة طلاقها أو
وفاة الزوج ..وطبعا كالعادة يتم المغالاة فى مؤخر الصداق .. فتلاقى والد العروس يقول للعريس ( بص يا بنى احنا بنشتري راجل المهر المهر 20 الف جنيه والمؤخر 25 ألف جنيه ..) يا نهار أبيض ده مبلغ يجيب أى شاب لسه بيبدأ حياته الأرض وبعض الشباب يقولك يا عم انا اصلا لو معايا المبلغ ده لا حتجوز ولا بتاع وأشغلهم والفلوس تجيب فلوس والجواز بعدين ..وأصلا بعض الستات ينظرن لحكاية مؤخر الصداق كنوع من الضمان ففى إأحدي مواقع المرأة السعودية عملوا إستطلاع للأراء حول مؤخر الصداق ..اللى قالت انه مصدر رزق واللى قالت انه ثمن حرية المرأة واللى قالت ده ضمان من غدر الرجل وإلى اخر الاقوال دي .. ويمكن تفكير المرأة السعودية ميختلفش كتير فى الناحية دى عن الست المصرية او غيرها من الستات فى الوطن العربي ..وكالعادة لما العريس يرفض المغالاة فى مؤخر الصداق تقوله الجملة الشهيرة ( يبأه انت نيتك وحشة ) ... ويا سبحان الله لما تنقلب الأمور ..فمين بأه نيته اللى وحشة؟! هل الرجل اللى جاب الشقة ودفع المهر وتحمل أعباء كتيرة أم الست اللى بتطالبة بتأمين مستقبلها بعد طلاقها منه ؟! .. والسؤال موش محتاج إجابة يعنى .. فعندنا فى مصر فى الفلاحين على وجه الخصوص بيكتبوا على العريس الحاجات دى فى مؤخر الصداق 20 الف والأرقام المبالغ فيها دي .. وفى الواقع ان تأمين المرأة لحياتها مع الرجل موش متوقف بحال على الفلوس .. فتأمين حياتها مع الراجل بيكون بحسن اختيارها له من حيث أدبه واخلاقه وتدينه ومراعاة ربنا فيها .. فإنكسار قلب المرأة بالطلاق وحصولها على لقب مطلقة لا يجبره فلوس الدنيا كلها .. فما قيمة ان المرأة تصبح مطلقة وهى معاها الالوف ؟! فتأمين نفسها لا يكون ابدا بالفلوس لأن الرجل لو كان سىء الخلق والمرأة كاتبه عليه مؤخر صداق كبير وهو عايز يطلقها فموش حيعدم الوسيلة اللى يطلق بيها الست دي وجايز يفترى عليها وهى ضعيفة بين يديه ويدفعها انها تتنازل له عن مؤخر الصداق مقابل
حريتها وياما سمعنا وشفنا حاجات من دي ..يبأه القضية هى حسن الاختيار
هو ده الضمان

6- كتابة القايمة .
القايمة دي عبارة عن ايه للي موش عارف ؟! أقولك عبارة عن ورقه بيتكتب فيها كل العفش الى فى الشقه ودهب العروسه والصينى والسجاد كل اشايه فى الشقه والعريس بيمضى عليها وإتنين شهود عشان لو حصل انفصال العروسه تاخد العفش وهى مروحه .أقولك ان حكاية القايمة دى فيه ناس بتعمل عليها قضية وإن العريس لازم يكتبها ولو مكتبهاش تبأه هو نيته وحشة من وجهة نظرهم ، وفى احد المنتديات عملوا استطلاع على الحكاية دى فتقريبا كل البنات اللى ردوا مؤيدين القايمة دي وبيقولوا (يعنى فيها ايه لما يكتبها دى حاجه شكلية وهو لو نيته سلمية حيكتب ودى حاجه ضمان للمرأة ) نفس الكلام تقريبا اللى اتقال فى مؤخر الصداق ونقول عليه نفس الرد ان اللى بيجبر الراجل عليها هو اللى موش واثق فيه ..وجايز هنا بعض الناس تقول خلاص أنا حكتب لها اللى جابته بس وهكذا نخش فى مواويل على حاجات لا تستحق.. فأنا بصراحة لا مؤيد لها ولا معارض لكنها فى النهاية حاجه شكلية
وحق مدني وممكن بالتفاهم يوصلوا لحل لها لكن غير مقبول ان أى من الطرفين يعرقل الجوازة علشان حاجه زى دي .


اتمني العلم

هل فعلا في النهايه
احنا بنتشري راجل
راجل..!! PIC-737-1352177102.g
جنه الفردوس
كتبت : ~ عبير الزهور ~
-
كتبت : جنه الفردوس ..
-
وانا لا يحرمني من مشاركتك
معي يا اخي الغاليه
كتبت : أمواج رجيم
-
كتبت : أم تتيانا
-

كتبت : جنه الفردوس ..
-
class="quote">اقتباس : المشاركة التي أضيفت بواسطة عطرالفل:

منوره الدنيا يا عسل
يسعدني ويشرفني تواجدك معي في مواضيعي
الصفحات 1 2 

التالي

اول مره اسمع خبر عن الخادمات غير محزن

السابق

احلى 27 طريقه لتعذيب الزوج ...

كلمات ذات علاقة
بنشتري , راجل..!! , هينا

المواضيع و التعليقات المنشورة لا تعبر عن رأي مجتمع رجيم ولا نتحمل أي مسؤولية قانونية حيال ذلك (ويتحمل كاتبها مسؤولية النشر)

الخصوصية وشروط الاستخدام حقوق النشر والتأليف الاتصال بنا

Powered by vBulletin® Version 3.8.7, Copyright ©2000 - 2024, Jelsoft Enterprises Ltd.
Content Relevant URLs by vBSEO 3.6.0