تعالوا اقولكم كيف نحافظ على بقايا الطعام
مجتمع رجيم / الاطباق المتنوعة
كتبت :
امال الاسلام
-
عمللكم انهارده موضوع مهم جدااااااا وهو بواقي الاكل نعمل بيها ايه وطبعا احنا شطورات
مبنرميش اى حاجة
أولا عشان ميبقاش حرام علينا ثانيا عشان نقتصد في المنزل ونستفيد من كل حاجة
همشى معاكم واحدة واحدة
واللي عندها حاجة زيادة على اللي هقوله يبقى ياريت تفيدنا
واللى عاوزة استفسار عن اى حاجة تقولى وان شاء الله هجاوبها لو عرفها
يلا بقى نبتدى وبلاش رغى
1)الارز
- لو اتبقى عندك شويه رز مترمهمش حطيهم عادى في الثلاجة وياريت يكونوا متغطيين وبعدين لما تيجى تعملى رز تانى جديد تخليه
- بعد ما يتشرب وتوطى عليه بتحطي الرز المتبقى عليه بس من غير متقلبي وبعدين بعد ما يستوى الرز الجديد تقلبي الرز على بعضه
- وهيطلع زى الفل مش هتحسي بطعم الرز البايت خالص ان شاء الله
2)الشعرية أوالمكرونة المحمرة
لما تحمرى شعريه او مكرونة وغصب عنك نزل أزيد من احتياجك تحمريهم عادى جدا وبعدين شيلى الزيادة في طبق قبل متحطى عليهم حاجة يبقوا متحمرين بس تسبيهم يبردوا وبعدين تحطيهم في الثلاجة لوقت تانى لو احتجتيهم ومتقلقيش مش هيحصلهم حاجة ان شاء الله
3)المكرونة المسلوقة
- لو بردوا جيتى تحطى مكرونة ونزل غصب عنك اكتر من اللازم بتسلوقيها عادى لكن قبل السوى الكامل بتخدى شويه مكرونة وتصفيهم لوحدهم وتشطفيها بالميه وتحطى عليهم نقطة زيت وتسبيها تبرد وبعدين تحطيها في شنطة عاديه وتربطيها وتحطيها في الفريزر ده لو مش هتسخدميها في خلال يوم او يومين
- لكن غير كده حطيها في الثلاجة وهى في الكيس بردوا عشان لما بتسبيها كده بتفر وبتنشف اما لو حتطيها في الفريزر بطلعيها قبل الاستخدام بساعتين وبعدين بتشطفيها بميه دافيه وهتطلع معاكى ان شاء الله مفلفله ورائعة
- لو اتبقى منك محشى مستوى ومش عاوزة تكليه تانى يوم بتحطيه في فويل او اى طبق وبعدين بتغلفيه وتحطيه في الفريزر ووقت اما تعوزيه طلعيه من الفريزر ورصيه في صنيه وبعدين تحطي شويه شربه صغيرين وتحطيه جوه الفرن وبعدين توطى عليه او فوق البتوجاز بس تغطيه هيطلع كأنك لسه عملاه
- لكن لو المحشي لسه نى لازم تسويه وتعمليه زى مقولت كده لان الرز وهو نى هيبوش في الفريزر
5)البصل المتحمر
- بردوا البصل لو طلع كتير وانا بحمره او اتبقى من تقليه الكشرى بخليه يتحمر عادى جدا وبعدين بخده في طبق لغايه لما يبرد وبعد احطه في كيس واحطه في الفريزر ولما اجى اعمل طبيخ اطلعه لغايه لما فك وبعدين احط عليه الطماطم او زى ماتستخدميه
6)الصلصات
- كلامى على اى نوع صلصه زى صلصة المحشى او الطبيخ او المكرونة اذا كانت الحمرا او البيضاء زى البشاميل لو اتبقى مننا اى كميه بنخليها تبرد وبعدين نحطها في كيس وبعدين على الفريزر ولما نستخدمها نطلعها تفك وخلاص كده
- اما بالنسبة للبشاميل انا شايفة انها تتفرز بدون بيض افضل
7)الشوربه
- لما يتبقى عندك شوربه اذا كانت فراخ اولحمةاو بط او وز طبعا مترمهاش سبيها تبرد وبعدين حطيها في كيس وحطيها في الفريزر هتلاقي استخدمتها كتير زى عمل لرز والمكرونة المحمرة والمحشى والرقاقباللحمة المفرومة او شوربه خضار وغيرهم
8)الخضار
لما تيجى تطبخى ولقيتى نفسك اشتريتى كميه كبيرة ادامك حلين
- الاول تسوى على قد احتياجاتك والباقى تفرزيه وتستخدميه وقت تانى
- او انك تطبخيه كله وبعدين الباقى تسيبيه يبرد وتحطيه في شنطة وتحطيه في الفريزر ومتقلقيش مش هيجرالوا حاجة ان شاء الله وبالنسبه للكرنب او الورق العنب او القرنبيط اسلقيهم نصف سلقه وبعدين فرزيهم زى اى خضار عادى
- اما السلطة الخضرا لو اتبقت منك حطيها في كيس وسبيها في الثلاجة تاانى يوم ان شاء الله مش هيجرلها حاجة لان الكببجى بيشلها كده لكن لو سبتيها في الطبق هتلاقيها باظت ودى بصراحة فكرة مراة اخويا
9)البطاطس
- لو اتبقى عندك بطاطس متحمرة حطيها في الثلاجة وبعدين عند الاستخدام حمريها تانى هتطلع مقرمشه معاكى بس طبعا متسبيهاش على النار مدة طويله
- لكن لو اتبقى بطاطس مش متحمرة بتحمريها نصف تحميره وبعدين تبرديها وتحطيها في كيس وعلى الفريزر لوقت متحتجيها سخنى الزيت وبعدين حطى البطاطس وهى متجمدة هتطلع زى بتاعة دجاج كنتاكى ان شاء الله
- لو اتبقى عندك لحمه بتخليها تبرد هي والشوربه وتحطيهم في كيس وبعدين على الفريزر وبعدين بطلعيها تفك وتسخنيها ونفس الكلام لو كانت الفراخ مسلوقة بنطلعها وبعدين بعد ما تفك نحمرها
- لكن لو كانت متحمرة بنعملها صوص بالطماطم ونخرط عليها ترنشاط بصل وطماطم وفلفل ونحطها في الفرن
- اما البانيه لو اتحمر نعمله بنفس الطريقة دى لكن لو لسه نى بنتبله ونحطه مع الدقيق والبيض والبقسماط وبعدين نحطه في طبق وحطه في الفريزر لغايه وقت استعماله نطلعه ونحمره على طول
11)السمك او الجمبري
- لو اتبقى سمك او جمبري قبل منحمرهم يعنى لاقيناهم اكتر من اللازم نحطهم في كيس وهما متبلين ونضعهم في الفريزر
-
- بعد ما تستعملى الليمونة مترميش قشرها لان ليها استخدمات كتيرة قوى
- بتستخدميه في تبييض الاسنان وبجد مفعوله سريع جدااا
- بستخدميه كمسك للوجه او في المناطق السوداء في الجسم
- بتستخدميه مع ميه دافيه وشويه ملح كحمام دافئ للقدم
- بتستخدميه كمعطر للملابس يعنى بتحطيه في شويه ميه وبعدين في اخر شطف للملابس بتحطيه عليه بيخلى الهدوم ريحتها ليمون
- بستخدميه مع صابون المواعيه بيخلى الصابون ريحته ليمون
- وبردوا ممكن يستخدم في المخلل يعنى تغيري عليه 3 ايام وبعدين تحطيه في برطمان وطبعا تحطى الحشوة عليه والملح والخل والزيت من فوق وطبعا محدش يستغرب من كده لان احنا اصلا بناكل قشر الليمون المخلل مش القلب
ده كل اللى عندى كتبت على قد مقدرت
بس والله تعبت جدااااا
فياريت لو حد استفاد من موضوعى ده ميبخلش عليا بالدعاء
