طريقة غسل البطاطين بمناسبة دخول الشتاء

مجتمع رجيم / الموضوعات المميزة فى التجارب والحلول المنزلية

كتبت : زهره الاسلام

الشتاء على الابواب ولازم البطاطين على الشتاء تكون نظيفه ورائحتها جميله ومنعشه علشان كده صورت لكم طريقة تنظيف البطاطين

وانا للاسف الشتاء الى فات كنت لسه مش كويسه لانى كنت لسه والده بنوتى فللاسف شلت البطاطين وماقدرت اغسلها
بس الان الجو برد وقلت قبل ما نحتاج البطاطين لازم تكون مغسوله

المهم
نفضت البطانيه كويس جدا
وبعدين مليت البانيوا بالماء الساخن العادى مش بيغلى
وضعت بعد ذلك سائل لغسيل الملابس (علشان يحافظ على الوان البطانيه ولانه مابيعمل رغاوى كتير)ووضعت كلور الوان ووضعت البطانيه

تركت البطانيه عدد من الساعات وبعد كده دوست عليها برجلى مع التبديل كتير كتير لحد ما طلعت كل الاوساخ الى فيها وطبعا الصوره دى ما اتصورت علشان ما تتخضوا من الى طلع من البطانيه

بعد كده صفيت المياه الى مش نظيفه ومليت عليها مياه تانيه نظيفه ووضعت مع الماء دوانى منعم الملابس لانه بيعطى لها رائحه رائعه وبينعمها جدا

بعد كده سبتها تتصفى مره اخيره وبعد كده نشرتها فى البلكونه لحد ماتنشف خالص

اخر خطوه جبت معطر للاقمشه برائحه العود لانى بموت في رائحته رشيته عليها وسبتها تتهوى تانى وطبقتها وشلتها فى الكيس بتاعه لحد ما استخدمها