شراهة الاكل .. كيفية التغلب عليها والتخلص منها
مجتمع رجيم / النقاش العام
كتبت :
عبير ورد
-
شراهة الاكل والرغبة في تناول الطعام هو احساس جسدي ونفسي ف نفس الوقت، وفي الغالب احنا بنربط الرغبة في تناول الطعام بعدم استطاعتنا في التحكم في شهيتنا بالرغم أن جسمنا ممكن يكون فعلا محتاج تناول الطعام.
جسمنا طبيعته انه يحمينا من الجوع اللي بنحس بيه لو مخدناش كفايتنا من الاكل او لما ناكل نوع اكل سريع الهضم بيحفز رغبتنا اكتر في الاكل ،مثل السكر اللي بيخلي عندنا رغبه اكبر لسكريات وكربوهيدرات زياده .
وفيه سبب تاني لشراهتنا في الاكل وهو الحالة النفسية فإذا كنا حاسين بالغضب أو الحزن ، أو القلق ممكن نحس بالجوع.
وعلشان كده فيه شوية نصايح ممكن نجربها قبل ما ناكل:
تناول البروتين :
في المرة القادمة، لما تتحكم فيك الرغبة في تناول الشوكولاتة ، جرب تأكل الزبادي قبلها واستنى 20 دقيقة، ولو فضلت الرغبه في الشوكولاتة مستمره خذ منها قطعة صغيرة.
تناول البروتين هيحسسك بالشبع وهيقضى على الرغبة في تناول السكريات، فقد أثبتت الدراسات إن الأنظمة الغذائية لإنقاص الوزن اللي فيها بروتين بتزود الشعور بالشبع لفترة طويلة، وتعزز من إشارات المخ التي بتدي إحساسا بالسعادة.
تنفس بعمق ثلاث مرات :
تمارين التنفس مفيدة جدا، لما تحس برغبة في الأكل، تنفس بعمق ثلاث مرات، واسأل نفسك هل ترغب في الأكل لأنك جائع أم لأنك حزين؟ فمعرفة الدافع لتناول الطعام مهم جدا، العقل هو مفتاح الجسم، ولما نركز على نوع اكلنا وليه بناكله ، هتبدأ توقف الاكل لأسباب نفسية،خصوصا لو بتحاول تقلل وزنك.
التعرف على عاداتك الغذائية
و أسلوبك وملاحظتها هيساعدك على التخلص من شراهة الاكل ، فمثلا انك تقابل صديق اتعودت تخرج معاه لتناول الطعام، ممكن يحسسك بالرغبة في الأكل، بالرغم أنك مش جعان، ولما تركز انه مجرد احساس مش حقيقي بالجوع هتمنع نفسك من الاكل. .
تغيير تفكيرك:
أغلب أفكارنا وخصوصا العاطفيه بتتأثر بطبيعة رؤيتنا للأمور، ولما تتغير طريقة تفكيرنا ورؤيتنا، هتتغير أفكارنا، مثلا لما تشوف حلوياتك المفضلة هتقول لنفسك هجيبها بس ف وقت تاني، هيصدق عقلك الحيلة دي ، ورغبتك في تناول الحلويات دي هتهدى .
الكتابة:
لما تسيطر عليك الرغبة في الأكل بعد نص الليل، اكتب السبب ده في ورقة، مثال لو حسيت بالرغبة في الأكل الساعة 3 صباحا، اكتب في ورقة هل أنا جائع؟ ايه هو السبب الحقيقي؟ وخلي الرغبة دي تختفي واحتفظ بالورقة، لتذكر نفسك أنك سيطرت على الرغبه دي، و يحفزك على تكرار الأمر.
ما الذي سيحدث بعد 20 دقيقة؟
تناول الطعام يقضي على الجوع، لكن لو اكلت لأسباب نفسية كالحزن أو الغضب، ف الوضع مش هيتغير لان الشعور بالحزن منتهاش، علشان كده فكر ايه هيحصل بعد 20 دقيقة، هل الاكل هيقضي على المشاعر دي ولا لأ ؟ وحاول تفكر في تناول طعام صحي ، ده ممكن يساعدك المرة الجايه، فالدراسات اثبتت أن التفكير في نوع طعام يجعلك تنجذب له.
قضاء وقت لنفسك
لو كنت تأكل لأسباب نفسية مش بسبب الجوع فالأفضل أنك تقضي وقت للترفيه عن نفسك مثلا لو كنت متوتر ممكن تاخد حمام دافئ أو تمارس تمارين اليوجا لتخفيف التوتر والقلق.
قطعة صغيرة
مش هتقدر كل مره تقول لنفسك لا، أحيانا لو حسيت برغبة شديدة في اكل الشوكولاتة، تقدر تاخد قطعة صغيرة منها. ولازم دايما تراعي انك تاكل الكميه المناسبه من الطعام علشان متحسش بالجوع، أما لو كنت بتعاني من اضطرابات في الشهية لازم استشارة الطبيب.
