مجتمع رجيمالنقاش العام

شويه نصايح كده علي الماشي




أرمي كل الأزايز والبرطمانات والكوبايات المكسره
والأكياس البلاستيك المقطعه وأي حاجه ملهاش
لازمة في المطبخ ومكركباه وخلاص

كل يوم أغسلي فوط المطبخ ولو حتي بشويه
صابون وأنتي واقفه علي الحوض وأنشريها ودخليها
تاني يوم الصبح هتبقي نضيفه وملهاش ريحه

خلصتي وغسلتي مواعين العشا حطي حله ميه
بتغلي وفيها ليمونه وشويه خل هتخلي ريحه
المطبخ نضيفه جدا

عودي ولادك يلموا اللعب بعد أما يخلصوا لعب
وأعمليلهم باسكت كبير أو كرتونه للعب ولو
مسمعوش الكلام لميهم أنتي وحطيهم في مكان
عالي يشوفوه ولما يطلبوهم منك قوليلهم لأ عشان
مش بتلموها وسيبيهم يزنوا شويه عشان يتعلموا
لما يخلصوا يلموها

رتبي الدولاب أول بأول قبل ما تدخلي الهدوم
عشان ميتكركبش

لو عندك بيبي خلي دايما جنبك فوطه صغيرة
عشان تمسحي بيها أول بأول أيده قبل ماهو يمسحها
في الملايات والكراسي

أوعي تحطي حلل في التلاجه فضي الأكل بعلب
بلاستيك عشان تحافظي علي نظامها ونضافتها

لو عندك بنوته علميها تلم التوك في علبه وليها
غطا عشان الكركبه وعلميها تدخل التواليت لوحدها
وراقبيها من بعيد وخلي دايما معاها فوطه تنشف
بيها بعد الحمام وتغير البانتي بتاعها مرتين في
اليوم علي الأقل

لو عندك بيبي أقل من أربع سنين شيلي كل الأوكر
بتاعه الإدراج والدواليب عشان ميعرفش يفتحها
ويطلع اللي جواها وتيجي انتي تصوتي وفي الأخر
تقعدي تلميها طول اليوم

هاتي مفرش جلد حوالي مترين وحطيه علي السفرة وقت الأكل عشان تحافظي عليها وبعد الأكل
تمسحيه بقماشه وشويه ديتول

عودي نفسك أنتي وولادك تشربوا كوبايه ينسون
كل يوم عشان تحافظوا علي صحتكوا

خلي عندك دايما لبان وشيكولاته وبالونات ولما
ولادك يسمعوا كلامك أديهم وفرحيهم عشان يسمعوا
كلامك دايما

قبل ما تنامي رشي شويه صابون أو شاور أو
معطر في قاعده الحمام

لو في يوم حد من ولادك تعبان أو مأريف تقعدي جنبه مش مهم تروقي وتنضفي وتطبخي اليوم ده

أفرشي مشمع فوق الدواليب عشان التراب

عودي ولادك وجوزك دايما يشوفوكي في أحسن
شكل حتي وأنتي في المطبخ عشان يبقوا زيك
وتبقي نفسيتك أحسن وبلاش ربطه سعديه في
المطبخ والشراب المعفن الفرده وفرده

واخيرا مهما حصل في يومك من مشاكل
وحوارات وشغل كتير وعصبيه ولادك وزنهم
وطلباتهم اللي مبتخلصش أرمي كل ده ورا ضهرك
وبلاش تتعصبي وتزعقي وفي الأخر انتي بتعملي
كل حاجه يبقي إن جالك الغصب خوديها بجميله
وفرفشي وأنتي بتشتغلي عشان نفسيتك ترتاح
وتخلصي بسهوله



كلمات ذات علاقة
شويه , نصايح , كده , علي , الماشي