ان كبر ابنك او بنتك تعالي شوفي معايا نعمل ايه
مجتمع رجيم / النقاش العام
كتبت :
عبير ورد
-
بنفرح دايما لما ربنا يرزقنا باطفال
هم فعلا زينة الحياة الدنيا
رزق جميل ربنا وهبه لينا
بتمر فترة الطفوله بجمالها وشقاوتها ودلعها ومشاغبتها
بندعي ربنا يكبروا بسرعه عشان نرتاح ههههه
نبدا مرحلة جديده مختلفه وتبدا معاها مشكلات
اختلاف الاجيال والتفكير والاسلوب والتعامل
لازم هنا نعمل وقفه ونتعلم سوا
كلام مهم من اهل الاختصاص والخبرة ونستفيد سوا
معاملة المراهق كطفل وانتقاد شكله، صوته، ريحته ، لبسه ، اخلاقه ، أصحابه ..
اتهامه بالصفات السلبية، انت كذاب، انت شخصيتك ضعيفة وبتقلد صحابك الفاشلين، ما بتذاكرش ومش هتنفع، مقارنته بإبن عمه ولا بنت خالته ....
من أهم أسباب تمرده وعناده معانا ولجؤه لأصدقاء السوء وتقليد افعالهم المنحرفة والانتماء ليهم ، لانهم بيتقبلوه ويحترموه ويفهموه ويحبوه بدون شروط ويمكن يعتبروا عيوبه دي ميزات ويبقى كبيرهم ومستشارهم العظيم كمان ...
احتضن ابنك/ بنتك وصادقه وخد دور الصديق في المرحلة المهمة دي من حياته عشان ينضج وهو سوي نفسياً من غير عُقد وكلاكيع وتراكمات نفسية ..
يعني ايه تصادقه تعامل معاه زي ما بتتعامل مع أصدقائك بنفس الذوق والرقي والاحترام في التعامل وزي ما أصدقائه بيتعاملوه معاه ..
وصله مفهوم انك بتحبه بدون شروط مش لازم يبقى متفرد ومثالي في كل حاجة عشان تحبه يعني انت بتحبه عشان هو ابنك، حتة منك لكن بترفض الأفعال الغلط اللي ماترضيش ربنا مش بترفضه هو شخصياً ..
تعاطف معاه ومع مشاعره مهما كنت شايفها تافهة او مبالغ فيها (هو لِسَّه لم ينضج بشكل كامل ، لِسَّه فيه رواسب طفولة)
يعني ايه تتعاطف معاه يعني توصله مفهوم أنا حاسس بيك جدا وفاهمك كويس ولو محتاج اي مساعدة مني أنا معاك وجنبك دايماً ..
اقضي معاه وقت تسمعه باهتمام وتحكي معاه عن نفسك وتطلب رأيه ووجهة نظره وتناقشه فيها بهدوء وبدون ندية او عصبية .
شجع اي تصرف ايجابي او صفة إيجابية فيه وتغاضى وتغافل عن السيء لحين يتم توجيهه بشكل غير مباشر...
د. فاتن_عمارة
