غير قدرك

بقالي يومين عمال أعصر دماغي عشان أصيغ البوست ده بطريقه مُختلفه ..
سألت نفسي .. هو القدر بيتغير ؟
- يعني ممكن : أنجح .. عُمري يزيد .. رزقي يبقي واسع .. أتجوز اللي قلبي بيتمناه ؟
- من فتره أمي كانت جايبه نوع صابون بتغسل بيه المواعين .. المُهم إنه كان بيسمَر إيديها وبيخلي جلد إيديها ناشف ومشقق .. لحد ما غيرت نوع الصابون فرجعت إيدها مع الوقت لطبيعتها ..
الحقيقه إن حياتك الناشفه المشققه من قلة السعاده ومسوده ممكن تكون سببها إنك مبتغيرش طريقتها .. بمعني ؟
ربنا بيقولك " وهديناه النجدين " ربنا قالك الشر أهو والخير أهو .. إختار بقي الطريق اللي يريحك .. قادر إنت دلوقت تقول " أستغُفر الله " و تاخد 10 حسنات وقادر " تسب الدين " وتاخد سيئه .. مفيش حاجه منعاك ..!
- نفسك تعيش كتير .. ممكن ترفع دلوقت تليفونك وترن علي خالتك .. ترن علي جدتك .. عمتك .. عمك .. وبكده عُمرك يطول لأن النبي قال : العُمر يزيد بصلة الرحم .. وربنا قال : لكل أجل كتاب " كُل إنسان له ميعاد هيموت فيه .. وبعدها قال : " يمحو الله ما يشاء ويثبت " ربنا قادر يمحي ميعاد موتك ويغيره بمُجرد إنك تصل رحمك وقادر يثبته لو إنت معملتش اللي أمرك بيه !
- نفسك تنجح ؟ تخلف ؟ ربنا يهدي نصيبك ؟ ممكن تقول دلوقت " يارب نجحني ومتفضحنيش " " يارب إرزقني ذريه صالحه " يارب إهديلي نصيبي .. وقادر إنك متدعيش وتسيبها زي ما تتيجي, والدُعاء بيغير القدر .. الدعوه قادره تشقلب حالك من فاشل لناجح .. من فقري لمُرزق ..
يبقي القدر عباره عن كورتين .. كٌل كوره في إيد الملايكه .. والملايكه متعرفش إنت هتلعب بأنهي واحده وتختار إيه .. كل اللي تعرفه إنك لو عملت اللي ربنا قالك عليه " دعيت .. طلعت صدقه .. إستغفرت و وصلت رحمك " إذًا كورة القدر الكويس هتدخل الشبكه وتبقي هدف ليك .. معملتش وطنشت يبقي كورة القدر المكتوب هتدخل وتبقي هدف فيك !
- ممكن يكون حد حبيبك ميت ويكون لا قدر الله بيتعذب في قبره وبمُجرد ما تقول " يارب إرحمه .. يارب إغفرله .. أو تطلعله صدقه " فورًا يتفرش قبره من عَفش الجنه ويبقي براح بالنسبالُه .. لأن الامام بن عثيمين بيقول " قد يكون الإنسان مُعذبًا في قبره فإذا دعيت له بالسلامه يُسلمه الله مما هو فيه .. إذًا قدره إتغير من عذاب لإرتياح بدعوه
- لو في كلب في شارع إنت ماشي فيه, وإنت عديت من جنبه بهدوء من غير ما تبينله إنك خايف منه .. ممكن يهوهو لحظتين ويسكت .. لكن لو جريت هيجري وراك ومُش هيسيبك غير لما يُقرمك ;d ! .. وده يثبتلك إنك لو تعاملت مع قدرك باللي ربنا امرك بيه كُل شيئ هيمر بهدوء ومن غير وَش, ولو طنشت القواعد ساعتها مشاكلك هتطاردك وتلاحقك في حياتك ومُش هتسيبك .. لما سيدنا عُمر جه يدخل بلد وعرف إن البلد دي فيها مرض بيقتل اللي يدخلها لف وشه ورجع من مطرح ما جه .. واحد قاله : تفر من قدر الله ؟ بتهرب من قدر ربنا ؟ قاله : أفر من قدر الله إلي قدر الله ! قدري الوحش إني ادخلها وقدري الكويس إني مدخلهاش ! يبقي متسلمش نفسك للمكتوب عافر ! .. بصدقه " قادر تشفي مريضك ورزقك يوسع .. بدعوه " قادر تنجح، وتحقق مرادك .. بمكالمه " قادر تطول عُمرك .. ها إيه قولك ؟ مهو إنت ماشوفتش البوست صُدفه كل حاجه مكتوبه وقدرك إن ربنا بيحبك وحابب يعلمك حاجه تنفعك وتريحك .. ولو عرف الكلام لغيرك هيبقالك نصيب من جمال بُكره بتاعه وقدرُه .. أنا بكتبلك البوست دلوقت و قدامي كوباية شاي .. كان ممكن اشربها من 10 دقايق وتبقي سُخنه زي ما بحب, وبإرادتي سيبتها لحد ما بردت وهرميها .. إعمل اللي عليك وأكيد ربنا هيراضيك .. ❤

#غير_قدرك ..💪

#أحمد_أيمن </ul>



</p>
<span id="twitter_btn" style="margin-left: 6px; ">

</div>