بتبتدى رحلة شقى …. عامية مصرية
الطوفان قدام عيونا
للأسف عمال بينذر بالهلاك
والجميع أدمن خلاص الارتباك
حتى اللى ساندك
واللي كان واقف معاك
عمره ما كان م الأولياء
ماطلعشي عنوان التعفف وارتقي
طلع الشيطان ماسك
في إيده المشنقة
أكاذيب كتير متصدقة
حتى الحقيقة تاه صداها
في العقول الضيقة
مستني إية ……..
تنشر قصايدك ع الورق
كل الورق مليان
خديعة وذندقة
***
ضحكوا عليك
بكلام عديم المنفعة
في بلاد أكيد مترقعة
قالوا القلوب من
بعدك أنت تعبانين
ف أوجاع كتير
في ليل حزين
مد إيدك
لملم قلوب متفرقة
***
صدقتهم والقلب كان
طيب برئ
سجلت أحزان قصتك
وفتحت للأوجاع طريق
سمتها قصه للميلاد
لبستها توب الحداد
فاستسلمت قدام رموز التريقة
***
كل اللي باقي في الحكاية
دقيقة واحدة فاعترض
صوتك مرض ….
من قبل مايقول أي
حرف في كلمته
والألم لساه بكامل صحته
بينك وبينه بتبتدي
رحلة شقى !
@@@ بتبتدى رحلة شقى للشاعر عصام سامي
