ومن راح قله رافقتك السلامه

{}

ياراسي اللي فيه مثل الدناميت
مرت ثمان ايام مدري علامه

مدري من الايام والناس مليت
والا لحقني من زماني ملامه

ودي بسجه مع خويٍ ليا جيت
كني بعينه من شيوخ اليمامه

محزم ظفر ومن الرجال المناعيت
قرمٍ شقرديٍ خواله عمامه

وان مالقيته جلستي داخل البيت
ابرك ولا شوفة خطاة الهلامه

الرجل مايتبع دروب السرابيت
عن خوة الرديان يرفع مقامه

ومهما فعلت من الفعايل وسويت
الطيب مايغني عن الاستقامه

يارب ياللي فوق عرشك تساويت
يا واحدٍ بامرك تقوم القيامه

يارب سامحني ليا مني اخطيت
عبدك ضعيف وفيه طيش وغشامه

ويارب ترحمني ليا مني اقفيت
في ساعةٍ ماعاد فيها ندامه

ويارب تجعلي مع اهل الوفاء صيت
يشبه لصيت اهل السمُو والفخامه

العمر رحله والليالي مواقيت
و المنتظر لابد ياتيه .. زامه

اعمارنا راحت بقطع السباريت
واحلامنا مربوطةٍ في حمامه

الحزن خلانا نشوف التوابيت
والضيق طلعنا براس العدامه

وان نسنس الشرقي وصرنا عفاريت
مانغبط اللي في قصور المنامه

احلامنا شتى وحنا تشاتيت
والطيب اللي مايغير نظامه

العام كنت اقول ياليت ياليت
واليوم يارب الستر والسلامه

بعض الضروف تخلي الحي كالميت
ماهيب لحية طيب والا رخامه

(( العفن لاتنصاه لو انه ابخيت
والمحترم يكفيك منه احترامه

من جاك رحبه وياسع له البيت
ومن راح قله رافقتك السلامه ))


{}



{}