البسبوسة

السلام عليكم و رحمة الله و بركاته ..
النهاردة حبيت أقدم لكم تجربتي الشخصية في البسبوسة ..
زي ما باعملها بالظبط ..
و هي سهلة و بسيطة جدا جدا و المقادير مظبوطة ان شاء الله
ملحوظة : ياريت نستعمل نفس معيار الكوب في الشيرة او العجينة نفس الكوب.



مقادير الشربات ( العسل أو لقطر أو الشيرة)دي بالظبط المقادير اللي احنا محتاجينها للصينية دي .
.
2 كوب سكر

2 كوب ماء
عصير نصف ليمونة صغيرة
رشة فانيليا

طريقة الشربات :

نضع الماء و السكر في إناء على النار .. و لما يبدأ الغليان نضيف عصير الليمون و رشة الفانيليا ..
و نسيبها على النار حوالي 10 دقايق و نعمله قبل عجينة البسبوسة و نسيبه يبرد




مقادير عجينة البسبوسة :

2 و نصف كوب دقيق البسبوسة ( السميد الناعم )
1 ملعقة كبيرة دقيق أبيض
1 كوب جوز هند
1 كوب سكر
1 و نصف كوب حليب
4 ملاعق سمن أو زبدة طرية
2 ملعقة صغيرة باكينج باودر
طحينة

الطريقة

دقيق البسبوسة + ملعقة الدقيق + جوز هند + كوب السكر +الباكينج باودر
يتم خلطهم جيداً .
نضيف السمن .. و نخلط كل المقادير السابقة ..
نضيف الحليب تدريجياً .. و نخلط ..
نجيب صينية متوسطة و ندهنها طحينة في القاع و الجوانب .. أو سمن أو زبدة.
نضع الخليط و نوزعه في الصينية ..
و نحطها في فرن ساخن حوالي 180ْ نكون مشغلينه قبل وضع الصينية فيه بعشر دقائق
و نسيبها في الفرن من 20-25 دقيقة .. لحد ما نحس الجوانب بدأت في الاحمرار .
و بعدين نسويها من فوق لحد ما وجه الصينية يوصل للون الذهبي المعروف للبسبوسة .
أول ماتطلع من الفرن نسقيها بكمية الشربات اللي حضرناها كلها .. المفروض انها تكون بردت زي ما وضحنا قبل كدة .
و بعدين ندخلها الفرن تاني على نار هادية خمس دقايق بالظبط ..
و نسيبها تبرد ..
و بألف هنا ..