تميّزي في اختيار موديلاتك مع مصممة الأزياء "سهير مسعود"

مجتمع رجيم / الملابس و الأزياء
كتبت : mira
-
طبعا حلم كل بنت إنها تكون شيك، ولما تلبس حاجة الكل يقول لها الله عليكي جايبة الحاجة الحلوة دي منين ؟؟
أكيد طبعاً نفسك في كده
بس مش عارفة إزاي تحققي الحلم ده
وبما أننا دايما بنحاول إننا نحقق لك أحلامك
عملنا الحوار الجامد أوي ده مع مصممة الأزياء "سهير مسعود"
تعالي نشوف الحوار مع بعض



"سهير مسعود" 74913_01248464379.jp





تفتكري إيه السبب اللي مخلّي الموديلات الموجودة في المحلات دلوقتي كلها شبه بعضها، بالإضافة إلى وجود ملابس بخامات وألوان سيئة جداً؟!


بصراحة ده ليه أسباب كتيرة أوي: منها أن المحلات اللي في المناطق المتوسطة بيكون عليها إقبال كبير جداً من الناس نظراً لانخفاض أسعارها، وبالتالي الكل بيشترى منها... بالإضافة إلى أن أصحاب المصانع الصغيرة بيأخدوا موديلات وتصميمات من مصممي الأزياء في المحلات المعروفة ويصمموا نفس الموديلات دي لكن بخامات رخيصة جداً؛ وبالتالي بقينا نلاقي ان كل الموديلات بقت شبه بعضها.


في رأيك إزاي البنت تكون مميزة في لبسها؟



فيه كذا طريقة ممكن البنت من خلالها تكون مميزة في لبسها، زي مثلاً ..
  1. إن البنت تشتري المجلات الأجنبية الخاصة بموضة كل موسم وتشوف إيه الجديد اللي نازل وتحاول إنها تشوف خيّاطة شاطرة تصمم لها نفس الموديل ده مع إجراء تعديلات بسيطة علشان الموديل يناسب البنت اللي هتلبسه، بكده البنت هتلبس حاجة مش موجود زيها في المحلات، وفي نفس الوقت هتعمل حاجة مناسبة ليها.... وأنا عن نفسي -كمصممة أزياء- أي حد بيتعامل معايا بأوفر له كل شيء؛ القماش والتصميم وشكل واستايل الطرحة، كمان أنا متخصصة في تصميم ( أحذية )، وعلى فكرة كل القماش اللي موجود عندي باجيبه من دول أوروبية وعربية، وباحاول أكون مميزة، بالإضافة كمان إني بصمم ( البوت) الشتوي زي الموجود في محلات الأحذية.

  2. كمان ياريت كل بنت تنزل من وقت للتاني إلى المحلات علشان تشوف وتعرف إيه الجديد وتختار بإحساسها الموديل المناسب لها.

  3. مش لازم البنت تقلد أي حد في استايل أو موديل معين عجبها لأن كل بنت وليها اللبس المناسب ليها علشان كده لازم البنت تعتمد على إحساسها وهي بتختار لبسها.

  4. كمان الألوان بتلعب دور كبير في إن البنت تكون مميزة، فممكن مثلاً تلاقى بلوزة وجوب عاديين لكن ألوانهم غريبة وماشين مع بعض فبيكون شكلهم حلو ومميز.

  5. كمان بانصح أي بنت إنها تبعد عن التقيد باستايل محدد في اللبس، وعلى فكرة مش عيب إن البنت تلبس استايلات غريبة بس بشرط إن الاستايلات دي تكون مناسبة لمجتمعنا الشرقي وغير شاذة.
وإيه الألوان الغريبة اللي ممكن إنها تمشي مع بعضها؟!


• "البيستاچ" مع "الأصفر" و"البيچ" و"الأحمر" .
• "الموف" مع "البني".
• "الأزرق" مع "الأخضر الغامق".
• "البني" مع "البمبي".
• "الأبيض" مع "الأورانج" و"البيچ".
• "الأخضر" مع "الأحمر" لكن بدرجة معينة.
• "البيچ" مع" الأحمر الهادي".



"سهير مسعود" 74913_11248464379.jp





فيه دائماً مقولة منتشرة (إن البنت المليانة تلبس غامق) هل ده صحيح؟!

أنا ضد هذا الرأي، والبنت المليانة تلبس كل الألوان لكن تقلل من الأبيض أو تلبس أبيض منقوش.

إيه الجديد في موضة الجينز؟!

"البرمودة الجينز" موضة لغير المحجبات،كمان موضة البنطلون "الاستريت" رجعت تاني بعد ما كانت أختفت منذ فترة ،بالإضافة إلى أن البنطلون الجينز المطرز رجع موضة تاني وده بيكون مناسب للخروج بعد الظهر.

وأنا دايما بانصح اى بنت إنها يكون عندها لونين من الجينز لون فاتح ولون غامق لأن ده هينفعها وهتقدر من خلاله إنها تنوع في استايل لبسها .

طيب وإيه هي موضة البنطلونات القماش؟!

البنطلون "الاستريت" هو اللي موضة، وعلى فكرة الجيب بنطلون رجعت موضة تاني، ودي بتكون مناسبة للبنت المحجبة، وفي شكل تاني للبنطلون "الاستريت" بيكون عليه جوب طويلة بطول البنطلون ومفتوحة من النصف من فوق لتحت.




"سهير مسعود" 74913_21248464379.jp




إيه الحاجات اللي بتشوفي إن البنات بتلبسها لكن شكلها مش حلو ؟!

في حاجات كتير زي مثلاً: ساعات بالاقي بنت جسمها مليان وعندها كرش ولابسة بنطلون وسطه ساقط وعليه بادي؛ طبعاً شكل زي كده بيكون مش حلو،كمان في شكل سيء جداً وأصبح منتشر أوي وهو البادي الضيق وعليه دريل بحمالة، ده بطل خلاص وبقى دريل بكم أو ثلثين ،وياريت البنت لو حابة إنها تلبس دريل حمالة تلبس تحت شيميز.

إيه رأيك في البنطلونات الضيقة وفوقها جيبة قصيرة؟!

الشكل ده كمان بطل والأنسب أنها تلبس جيب بنطلون أو بنطلون ضيق قوى أستريت وعليه حاجة واسعة طويلة أو ضيقة وطويلة.



"سهير مسعود" 74913_31248464379.jp





كل الجوبات دلوقتي بقت شبه بعض، إزاي البنت تجدد في شكل الجوب اللي هتفصلها ؟!

في حاجات كتير ممكن البنت تلجأ ليها علشان تجدد في شكل الجوب زي مثلاً إنها تغير في شكل الوسط بتاع الجوب؛ فتصمم من القماش نفسه كمر عريض أو تعمل منه حزام قماش وتوكة على جنب.. أو تعمل رباط طويل على الجنبين من نفس قماش الجوب، وتعمل فيونكه عريضة، وده بيكون شكله حلو على بلوزة قصيرة.

لو البنت لبسها كلاسيك إزاى تجدد في لبسها؟!

لو كانت البنت بتلبس بدل كتير ياريت تخلّي لكل جاكت بنطلون وجوب في نفس الوقت لأن البنطلون له أوقاته اللي ممكن أنه يتلبس فيها، والجوب ليها أوقاتها اللي ممكن أنها تلبسها فيها ...
وممكن كمان إنها تغيّر من شكل البدلة وتصممها بطريقة روشه عن طريق إنها في مرة تلبس قميص ملون تحت جاكت البدلة، ومرة تانية تلبس قميص سادة.




"سهير مسعود" 74913_41248464379.jp





هل الشنطة والحذاء لازم يكونوا من نفس ألوان اللبس؟!

طبعاً كل حاجة بقت غالية دلوقتي، والبنت مش هتقدر تلبس وتجيب شنطة وجزمه لكل طقم؛ فممكن تجيب الألوان اللي تمشي علي أى لبس والألوان دي زي "الذهبي "أو" الفضي" أو "الأسود" بس لازم الشنطة تكون لون الحذاء.

البنات بتحتار في اختيار الطرحة خاصة مع اللبس الكاجوال العادي؟!

لازم البنت تبعد عن الطرحة اللي فيها ترتر أو ساتان في الصبح، وتلبس طرح قطن أو شيفون، وأهم حاجة تركز عليها في اختيار الطرحة إن لون الطرحة يكون مناسب إلى لون بشرتها ..
وأنا بانصح البنت المحجبة إنها تلتزم بربط الطرحة بالشكل الملائم للحجاب الإسلامى وتبعد عن اللفات اللي بيكون فيها الرقبة ظاهرة أو جزء من الشعر ظاهر ..


"سهير مسعود" 74913_51248464379.jp





إزاي البنت تجدد في أفكار وشكل الاستايل بتاع لبسها؟!

في أفكار كتير أوي ممكن تساعدها على تجديد استايل لبسها زي مثلاً إنها تلبس فساتين قصيرة زي بتاعة "سعاد حسني" اللي كانت موجودة في الستينات والسبعينات، وتلبس معاها بنطلون وبادي تحت الفستان ده لو كانت محجبة.

كمان ممكن لو عندها جاكت تحاول تجيب كوفيّة شيك في الشتاء وتلبسها مع الجاكيت ده، أو بلوزة بكرانيش فوق بعضها وتلبسها تحته الجاكيت وبكده شكلها هيكون في منتهي الشياكة.
كمان ممكن أنها تلبس شيميز وعليه كرافت بدل من الإكسسوار..

كمان ياريت البنت تهتم بالإكسسوارات بتاعتها وتراعي إنها تكون متناسقة مع لبسها ومع لون الطرحة.
منقووووووول

كتبت : بسمه امل
-
[motr]
شـكــ وبارك الله فيك ـــرا لك ... لك مني أجمل تحية .
موفق بإذن الله ... لك مني أجمل تحية .
[/motr]
كتبت : ◕‿◕β.Ő.Ṩ.Ϋ◕‿◕
-
كتبت : بنتـ ابوها
-
كتبت : ~helwa~
-
كتبت : قويق
-
الصفحات 1 2  3 

التالي

مجموعة اخري من العباءات

السابق

كاتالوج عبايات خليجة عربية أكثر من رائعة

كلمات ذات علاقة
مسألة , مع , موديلاتك , الأزياء , اختيار , تميّزي , سهير مسعود