السلام عليكم ورحمة الله وبركاته
موضوع جميل يا جوجو
كنت لسه داخلة عشان اعمل موضوع للمغتربات في السعودية لقيتك سبقتيني ودايما سباقة بالخير
انا عايشة في الخبر
افضل اماكن الخروج والفسح طبعا الكورنيش بس لما يكون الجو حلو ومافيش رطوبة بتكون قعدة الكورنيش مافيش اجمل منها
بالنسبة لاماكن الشراء زي ما فطومة قالت الهرم بلازا وطابا بس مش دايما بتلاقي فيهام حاجات متميزة وكمان اسعارهم بتكون غالية شوية .. طابا بنشتري منها بس القمصان الرجالي والبدل .. وفيه كمان العبيدي
افضل الاسعار لشراء الهدايا بتكون في بيت الاسعار المخفضة وبيت التخفيضات والوسام بالحياة بلازا بالدمام بجد بلاقي دايما حاجات جميلة واسعارها هايلة ومش ممكن تصدقي انها بالاسعار دي لدرجة ان ممكن تلاقي بنطلون جينز بناتي او صبياني ب10 ريال ومش تفرقيه عن البنطلون الغالي .. وكمان القمصان الحريمي القطن انا دايما بجيب من هناك كل الهدايا تقريبا وكمان لبس البيت بتاعي
وفيه محل السعر المنافس وسينا بالدمام برضه في الغالب بيكون فيهم حاجات حلوة للبيبيهات والاطفال الصغيرين .. والسعر المنافس الدور التاني بينزل حاجات باسعار مخفضة شوية ممكن تلاقي بناطيل حريمي في حدود 15 ريال او اقل .. وطبعا سما في الدمام بالحياة بلازا وبالخبر بس في فترة الاوكازيون غير كده مش بيكون فيه حاجات اد كده .. وفي الغالب برضه بنشتري منه القمصان الرجالي ... بالنسبة لمحلات العبايات انا دايما بشتري من محلات العبايات بالحياة بلازا .. وبالمناسبة مش عايزة انسى رامز في الحياة بلازا برضه فيه كل حاجة من الابرة للصاروخ زي ما بيقولوا من اول مستلزمات المطبخ لغاية السجاد واللحاف والسواريهات ههههههه بس مش اد كده يعني (السوريهات طبعا) ... وفيه كمان محل جديد اسمه برافو في الحياة بلازا برضه معقول بس انا شايفة انه غالي شوية بالنسبة للمحلات اللي قلت لكم عليها قبل كده
بالنسبة بقى لطلبات البيت عندنا هنا في الخبر هايبر بنده بمول جرير .. وهايبر بنده بمول الظهران مكان جيان .. وبنده الكبير .. وكارفور .. والمزرعة .. ولولو وطبعا السيفواي
اتمنى اني اكون قدرت افيدكم وجاهزة لاي سؤال