يا بنات والله ضايقه الدنيا فيني .. كيف اعامل هالانسانه

مجتمع رجيم / مسجات الجوال
كتبت : Diana Ali
آخر تحديث: 14 يونيو, 2021
السلام عليكم
والله يابنات صرلي تقريبا اسبوع لافه الدنيا فيني القصه بدأت لما سمعت سلفتي اني سويت استقبال لاهلي وما عزمتها طبعا .. اتصلت علي وقالتي انا بدي اجي عندك قلتلها اهلا وسهلا واجت تاني يوم وانا متل العاده مارح اقصر بشي لا بعشاء ولا بضيافه .. تاني يوم من اول ما وصلت اشتغلت الانتقادات اصلا لدرجه انو هي الانسانه مابتقدري تفتحي معها اي موضوع .. لانو على طول بتنهال عليكي كميه من النصائح الي انتي ما سالتيها عنها وكمان بتفرجيكي انو هيه احسن منك بكل شي (( بالغسيل بالطبخ بتربيه الاولاد .. حتى بالعلاقه الجنسيه مع زوجها )) المهم انو مقهوره مني وميته ليش ما اعزمها .. بلشت فيني (( شعرك مو حلو .. ليش هيك مصفره .. كرشك قدامك متر شلون بتلبسي هيك .. الناس شافوكي قالو عمرك بيطلع بال30 )) وانا بكل شي عم بسمع وعم برد على قد السؤال يعني ليش مصفره ؟؟ والله لانو عامله ريجيم على اساس هيه ناصعة البياض

الشغله التانيه فاتت فيا (( انو انا زوجي مو حابب شكلي وانو هيه جوزا بيجن عليها .. وانا زوجي لما قال لاهلو اخطبولي كانت طلباتو غير مواصفاتي تماما .. وانو حماتي قالت شو بدنا نعمل هادا الي صار يعني حماتي كمان مو رضيانه على هالجوازه مع انو صرلي سنه ونص متزوجه ))

الشغله التالته فاتت بموضوع مين عزمت على استقبال اهلي .. (( عزمتي ام فلان ؟؟ كيفها " بتأشر على الصدر لانو ام فلان صدرها كبير " وعزمتي ام فلان ؟؟ طيب عزمتي كنتها ؟؟ شو شايفه حالها وعلى شو مابعرف ؟؟ عزمتي فلانه ؟؟
ما بحب هالانسانه بحسها وقحه )) طبعا هدول كلهم معارف اهلي ومافي حدا بيقربها ))

انا كتير اتدايقت قلتلا ايه وجابو سيرتك وقالو انك شايفه حالك وانك انسانه تقيلة دم وانا صدقا صدقا صدقا ما الفت ولا كلمه كل الكلام هدول الناس قايلينو لانو حضروا عرس سلفتي بحكم انو زوجي بشتغل معهم واول ما انخطبت الكل قلي عندك سلفه (( هيك هيك))

المهم انو هيه انقهرت كتير وما خلت عليهم كلمه من سقطوا من عيني (( مين انتي ليش )) وكلمه غيرانين مني وهيه ما حدا بيغار منا صدقا على هالاخلاق الزفت وفلانه ليش تحكي عني
كمان جابت بسيرة ناس تانين وحكيت عليهن وقلتلا هدول الناس كمان قالو عنك هيك (( القصد لا تفكري حالك بس بتحكي ع الناس ترى الناس شايفتك متل مو شايفتيها)) وهدول الناس كانو قرايب بيت حمايي

بالاخير من كتر ما انقهرت مني قالتلي اتصلت علىي ((فلانه وفلانه وفلانه وحكيو عليكي )) طبعا يعني بنات حماي وسلفتي هنن الي اتصلو .. قلتلا شو حكيو ؟؟ قالت لاء مو حكيو قالو انو فلانه حكيت عليكي وقالت عنك خبيثه
المهم سكرت ع الموضوع

راحت على بيتها واتصلت فيني الساعه 1 بالليل قالتلي (( مافي داعي جوزك يعرف الكلام الي حكيناه ونحنا ااخوات )) قلتلها ماشي ولا يهمك
رجعت بعتت مسج بهذا الصدد

وانا حكيت لجوزي مو لشي لاني بعرف سلفتي كزابه كبيره ومجربتها بكتير شغلات مشان ما عاد تفتري على اخواتو
ومبارح بالليل .. بعتتلي فيو كلمتين :: الله يسامحك ::

ومارجعت سالتها ليش ونفسي اسالها على ايش يسامحني ؟؟ بشو غلطت معك
وانا متوقعه انو اتصلت على بيت حماي وسالتهم فعلا انو انحكي عنها هيك مع العلم اني والله العظيم حكيت كل كلمه انقالت عنها بحذافيرها بس برضو ماعندي دليل انو انحكى غير حماتي الي صار الحكي قدامها

شو اعمل يا بنات كمان خايفه تتصل على بيت حماي وتالف عني كلام ما قلتو خايفه تساوي فتنه انا والله مو ناقصني وعلاقتي مع زوجي واهله كتير كويسه مابدي تخرب
ضايقه فيني الدنيا انصحوني
كتبت : flower1
آخر تحديث: 14 يونيو, 2021
صباح الخير اخت ديانا شوفي حبيبتي الي مثل سلفتك كثيرات عندنا او يمكن يقولو عنك انك حكيتي شي انت اصلا موعارفه عنه او بخشو بموضوع بعملو حالهم مصلحين اجتماعين حتى تفضفضيلهم او تغلطي بكلمه عشان يعملو قصه من وراها بس برضو الحق عليكي انت لازم ما حكيتيلها شو الناس بتحكي عنها لانها رح تورطك انت او تحكي عنك فتانه عشان هيك احسن طريقه لمعامله هالنوع هيه الاهمال اذا زارتك لاتدخلي معاها باي موضوع خاص خليكي بالمواضيع العامه او اذا حاولت تحكي على حدا حاولي تدافعي عنه او اذا حكتلك فلانه يتحكي عنك هيك قولي مش مشكله انا عارفه حالي او مو مهتمه برائيها يعني باختصار كل ماتجيب سيره الناس وقفيها عند حدها او مره على مره رح تبطل تفتح معك اي موضوع لانها بتكون عارفه انك مابتفتحيلها مجال
اسفه عالاطاله تقبلي رائي
كتبت : الطائر الوردي
آخر تحديث: 14 يونيو, 2021
[SIZE="7"]السلام عليكم اختي ديانا الي مثل سلفتك كثار والكل مثلك قلبه موجعه كثير من هالنوعيه من النسوان
الي فعلا مثل ما حكت اختنا فلور بتقعد عندك وبتعمل حالها قلبها عليكي وهي معلا بدها تنتهز الفرصه
حتى توقعك بالكلام وتقولك شي انتي مو قايلتيه عشان هيك احس طريقه للتعامل مع هالاشكال
التطنيش او الاهمال واتمنى لك حياه سعيده ولا تقلقي كثير بكلامها والله يهديها
[/SIZE]
كتبت : white rose
آخر تحديث: 14 يونيو, 2021
السلام عليكم ورحمة الله وبركاته


اختي دينا لا اقول الا حسبي الله ونعم الوكيل على هيك نوعيه من الناس اللي ما وراهم الا الحكي الفاضي

لكن منحكيلهم انو

من راقب الناس مات هما ومن الايمان ترك المرء ما لا يعنيه لانو الظاهر سلفتك من الناس اللي فاضيه للكلام الفاضي والقيل والقال

وهاي النوعيه من الناس انا بنصحك تجا هليها على قد ما تقدري وتتعاملي معها للضروره فقط وما تهتمي لا لكلامها ولا رأيها

لانو هالنوعيه هاي اصلا ما بتعرف شو بدها بالزبط الا انو تحكي اي اشي وبس
وبما انك عارفه حالك صادقه وصح لا تهتمي ابدا حتى لو حكت اشي عنك صدقيني انو الانسان الصادق والواثق من نفسو عندو قدره عجيبه على

المواجهه وما بيكون عندو خوف او رهبه
واهم شيء خلي ثقتك برب العالمين قويه لانو الله سبحانه وتعالى هوه الللي بياخد لك حقك
دائما هالنوعيه بسرعه بتنكشف وبتقع بشر اعمالها وزي ما بحكو الكذب حباله قصيره
وادعي لله انو يكفيكي شرها ويبعد كيدها عنك بكل صلاه وان شاء الله رح تكوني مبسوطه
الله يهديها هيه وامثالها ويهتمو بأشياء اكبر من هيك بكثير لانو الحياة قصيره وياريت لو نغتنمها بأشياء فعلا تفيدنا وتنفعنا
واحكيلك يا اختي انو الغيره اكبر الاسباب لهاي المشاكل وزي ما بيقول المثل ما بتنضرب بالحجاره الا الشجره العاليه او المثمره ما بعرف بالزبط صيغة المثل
ركزي اهتمامك ببيتك وزوجك لانهم الاهم وسيبك من كل الناس لانو زوجك هوه جنتك وهوه نارك اذا رضي عنك الله بيرضى عليكي واذا زعل منك شو فائده رضى الناس منك
اسفه على الاطاله لكن حبيبت اافيدك ولو بالكلام
اتمنى لك التوفيق والصلاح في الدنيا والاخره
اختك في الله وايت روز
كتبت : رقة زمان
آخر تحديث: 14 يونيو, 2021
ربنا يصبرك و يحببكم فى بعض لانها مهما كانت فى زوجة عم اولادك و اى خلاف بنكم هياثر على علاقة ولادكم مع بعض
كتبت : فطومة محمد
آخر تحديث: 14 يونيو, 2021
لاحول ولا قوة الا بالله

حبيبتي ربنا يهديها ويصبرك

وانا من رأي البنات ماكنتي تحكي معها

وكمان خدي بالك بعد كدة لانها سلفتك مش اختك

واحيانا بيحبو يوقعو بعض(السلايف يعني)

انا لما اكلم سلفتي اكلمها في مواضيع عادية رغم ان شخصيتي بحب الناس واحب اتكلم بس الصراحة بخاف من المشاكل
الصفحات 1 2  3  4 

التالي

مسابقه ركزى فكرى ... فتشى دورى

السابق

آه منك يا حماتي !!!

كلمات ذات علاقة
الدنيا , اعامل , بنات , يا , فيني , هالانسانه , والله , ضايقه , كيف