نادي الأمهات الجدد

مجتمع رجيم / الأمومة و الطفولة

كتبت : أم أنس2009

السلام عليكم و رحمة الله و بركاته

أخواتي في الله

فكرة النادي باختصار ان احنا عايزين نساعد الامهات الجدد من خلال تقديم نصائح لهن من خلال تجارب الامهات القدامى او اللي مش جدد اوي زي حالاتي

حنقسم مراحل الامومة الى اقسام و كل واحدة فينا تبدأ تقول نصائحها و ماذا تفعل الأم الجديدة و ماذا لا يجب أن تفعله...
و برضه الأمهات اللي عندهم أطفال بس رزقوا طفل جديد ممكن يستفيدوا إن شاء الله لأن مش كل طفل زي التاني
ربنا يرزقنا الاخلاص و ينفع بنا الاخوات إن شاء الله

كتبت : أم أنس2009

بسم الله الرحمن الرحيم

البداية ان شاء الله حتكون في المستشفى بعد ما قومتي بالسلامة و اكتسبتي احلى لقب فالدنيا ... أم ... دلوقتي في جزء منك جنبك معتمد عليكي تماما انت بالنسبة له كل حاجة ... انت بالنسبة له الامان و الحياة كلها ... و علشان الاحساس الجميل ده لازم تكوني عارفه انك حتقدمي بعض او كتير من التنازلات من راحتك، نومك، اهتماماتك، هواياتك، خروجك مع زوجك و جلوسك معاه، حتى قعادك في روقان تتفرجي على حاجة بتحبيها و تشربي كوباية نسكافيه، ... و غيره من كل الحاجات اللي اتعودتي تستمتعي بحياتك من خلالها ...

[line]-[/line]
دلوقتي انت على السرير و جابولك النونو الجميل علشان ترضعيه

أولا: نصيحتي ليكي هنا انك لو مكنش ليكي اخت بترضع مثلا او ليها اولاد رضعتهم قريب... اجعلي الممرضات يساعدوكي في معرفة وضع الرضاعة الصح علشان فالأول انتي بتكوني مش عارفة ترضعي النونو ازاي و هو مش عارف يرضع ازاي

[line]-[/line]
ثانيا: تحذير مهم جدا... اياكي ترضعي امام اي حد غير مامتك و زوجك و ممكن اختك لانك صعب مترضعيش امامهم... لانك و ان كان اي حد تاني حتى لو كان بيحبك جدا ممكن الحسد... حتى الانسان ممكن يحسد نفسه او ابنه فلازم و انت بترضعيه تقولي علطول ما شاء الله لاقوة إلا بالله و ترقيه و تنصحي امك و زوجك و اختك بكده... و من الاول لو في حد فالغرفة استأذنيه يطلع لو حماتك مثلا او صاحبتك لانك بتتكسفي ... علشان مينفعش ترضعي امامهم و بعدين تيجي بعد كده تقولي لهم بتكسف

[line]-[/line]

انا حكتفي بكده النهاردة و نكمل بكرة ان شاء الله

و ياريت كل الأخوات اللي عندهم نصائح ميبخلوش علينا بيها و اي أخت عندها سؤال تتفضل و احنا نرد ان شاء الله

ودمتم بخير
السلام عليكم و رحمة الله و بركاته

كتبت : أم أنس2009

بسم الله الرحمن الرحيم

نكمل ان شاء الله النصائح بالنسبة للمرحلة الاولى بعد الولادة

ثالثا: من اكثر الحاجات المتعبة اللي ممكن تقابلك بعد الولادة... اكتئاب ما بعد الولادة ... هو مش بييجي لكل الامهات بس بييجي لكتير منهم و هو نتيجة تغير في بعض الهرمونات فالجسم

اهم حاجة تعرفيها ان ده شىء عادي و مؤقت و حيروح علطول ان شاء الله ... فكري ان معظم الامهات بيجلهم الاكتئاب ده
ممكن تفكري ساعتها في حاجات وحشة كتير و ممكن تلاقي نفسك بتبكي بدون سبب ... و تحسي ان شكلك وحش و مش جذابة خالص ... كل ده طبيعي انك تحسي بيه

اولا بالنسبة لرعايتك لطفلك و كونها متعبة ..فكري انك مع الوقت حتتعودي و تنظمي حياتك على كده
بالنسبة لاحساسك انك مش جذابة.. فكري ان مع الوقت جسمك حيرجع لطبيعته بالتدريج و بطنك المترهلة حتتشد تاني بالذات لو عملتي التمارين اللي الطبيب ينصحك بيها و بلاش تفكري في اي ريجيم غير بعد 6 شهور على الاقل
و بالنسبة لاي حاجة تانية عملالك اكتئاب حتروح مع الوقت...

انا شخصيا بعد الولادة كنت حاسة ان الدنيا خلاص مبقاش فيها اي حاجة حلوة و كنت ببكي كتير جدا

نكتفي بكدة النهاردة و نكمل في وقت تاني ان شاء الله و ادعو الله ان اي حد يكون بيستفيد مني

السلام عليكم و رحمة الله و بركاته

نادي الأمهات الجدد

مجتمع رجيم / الأمومة و الطفولة

صور متحركة لقسم الاطفال

هي مجرد كتابات نملأ بها بياض الورق؟!