ليبيا حره اخيرا ^^

بسمـ الله الرحمنـ الرحيمـ
.
.
,
ليبيا حره واخيرا

الله اكبر الله اكبر

ولله الحمد على كل شي لو ربي مكانش معانا مكناش انتصرنا على الطاغي

فى سؤال لما تسال اي حد علاش اتحب معمر وتبيه ؟؟ ايجاوبك :- انتم طلعتم بالسلاح من بدايه الثوره لو طلعتو سلميه مكانش حيكون فى قتل!!!

معقوله

حنقوللكم
احنا فى ليبيا طلعنا سلميه كيف سوريا واليمن سلميه سلميه لاكن هوا جي لبنغازي بالدبابات و الميم طاء هذا تصرف غير انساني لناس عزل زي ليبيا فى بدايه الثوره من ايام 15 -16-17-18-19-20 ليوم عشرين بعدين تسلح الشعب الليبي وحظر الطيران جي متاخر بعد تهديد زيف الاحلام (سيف الاسلام) انه حيقسم ليبيا قطعه قطعه وتصبح حرب اهليه ..... والخ , فانا هنا نب انقول لكل مؤيد ( منبيش انقول طحالب لان احنا ثوره عادله منبوش نأذو حد) لكل مؤيد للقذافى القذافى خلاص مات القذافى شن مزال تبو اكثر من هكي و سيف وشدوه وعبد الله السنوسي فلهذا السبب لازم اتفيقو وتنسو كل شي ونبدو صفحه جديده من دون ماضي معمر لان معمر طمس كل الحقائق

وتوا انتم حتقولو انتى شن تعرفى على تاريخ ليبيا باش تتكلمى

انا عندي جواب لسؤالكم هذا

اول شي احنا كان عندنا حضاره اسمها الليبو و فى جنوب ليبيا جبال اسمها (جبال الاكاكوس) لو تمشو غادي تلقو فى رسوم لزي فراعنه مصر لاكن ليبيين و هلبا هلبا حاجات

المهم احنا توا نبو ننسو عهد معمر ونبدو حياه جديده بدون ظلم بدون دكتاتوريه بدون حقد بدون بغضاء بدون كراهيه

احنا فى ليبيا توا لما تمشي فى الشارع وتلقى واحد فى الشارع مسكين فى موقف ومحتاج للمساعده ايساعده بكل مايملك لان توا خلاص معاش فى دكتاتوريه

وقصه الزنتان خنبو هذي كذب و فتنه منتشره فى ليبيا من قبل الطابور الخامس لانه هو اللى يخلي في الليبين يكرهو بعض

لاكن احنا نقولو (لاشرقيه ولا غربيه ليبيا وحده وطنيه) الله اكبر الله اكبر على كل من طغى وتجبر

نب تفاعلكم معاي لتوعيه المؤيدين ومتقولوش عليهم (طحالب) لانهم ناس فى النهايه و ربي يهديهم وانشاء الله تكون ليبيا احلى بلد

والسلام عليكم ورحمه الله وباركاته

وربي ينصر كل الشعوب العربيه و بالاخص سوريا لان عندهم دكتاتور كيف معمر

واحنا معاكم يا شعب مصر والله اكبر الله اكبر شكرا على كل مساعدات العرب لنا وشكرا


اختكم .. حرائر راس حسن



الله اكبر

أشكرك أختي حرائر على مشاعرك الدافئة التي وصلتني وأوقدت في نفسي حب بلادنا الغالية ليبيا ... تحيتي لكِ من مدينة بنغازي إلى مدينة طرابلس وإلى كل مدن ليبيا .. أختك المقدسية