الاعراس في مدينة الياسمين(دمشق الحبيبه )
مجتمع رجيم / الموضوعات المميزه فى العروسة
كتبت :
عود مسك
-
اول شي راح احكي بالسوري مشان افوتكو بالجو
ويلي ما راح تفهم علي تبعتلي على الخاص وانا بترجملها
اغلب الزواجات عنا بتكون عن طريق الاهل( وبنسميها شوفة اهل )
غالبا الحكي بيكون بين النسوان على التلفون واذا كان في قبول بتجي الأم مع حدا من بناتها او اقاربها
, وان صار في قبول بيجي العريس بالزيارة المقبلة وبيشوف العروس طبعا بحضور والدها او اخوها
, في حال ربنا تمم على خير يبدا التحضير للخطوبة الرسمية
, يتم الاتفاق بالبداية بين الرجال في زيارة بيسموها " فصل النقد " عن المتقدم والمتأخر وهيك امور ,
وبيعطي العروس مبلغ بيسموه " ملبوس البدن " مشان الجهاز .ومبلغ تاني للذهب
. بعض الأسر تعلن الخطوبة مجرد اعلان وبالتالي مابيقدر العريس يجي يشوف عروسته بدون حجاب
او لحالها , بعض الأسر بتعمل " كتاب شيخ " يعني عقد غير مسجل بالمحكمة
بتصير البنت زوجته شرعا وبيقدر يجي يشوفها لحاله ..
وبعد كم يوم بييروح العريس والعروس وامه وامها حتى يشتروا المحابس " خواتم الزواج "
, وبتصير كما العادة في كل مكان فترة الخطوبة العزايم والمشاوير والطلعات وبدا تأثيث عش الزوجيه
الخطوبه
وهون العاده تختلف من اسرة لاخرى منهم بكون تكاليف الخطبه على اهل العروس
ومنهم العريس بيتولى كل التكاليف (وعلى قولتهم يوووووه عاطينه بنت متل الورده وكمان ندفعلو مصاري)
المهم بنعمل الخطبه على الديق (بس اهل العروس والعريس المقربين )
وبتكون بصاله على قد الحال ازا كان العريس غير مقتدر ماديا ودائما النسوان لحال والرجال لحال
ممكن يفوتو الرجال شوي مع العريس مشان يشجعوه
اما عن اجواء الخطبه فبتعرفوا رقص وفقش واهم شي الزغاريد والمهاهاي (كلمه شاميه بحته )يعني اويهاااااا
اكيد شايفينها بالمسلسلات
وراح اعطيكو مثال يله يا بنات قولوا وراي
اووووووها ع الهشي الهشي
اوووووها وطبخنا المحشي
اوووووووها عروستنا حلوة
اوووووووها بيلبقلا كل شي
لوللولولولوليششششششششش
اوووووووووووها صلو عالنبي
اوووووووووووها وزيدو صلاتو
اوووووووووووها ويلي مابيصلي عليه
اوووووووووووها تطء مرارته
لوووووووووووووووووووليش
وبآخر الحفلة بيجي العريس شوي وبيلبسوا الخواتم قدام الحاضرين ..
وبروح العريس بيسهر و بيتعشى عن اهل العروس
وبضل رايح جاي متل مكوك الحايك (مثل سوري )على بيت العروس ويزق (يجيب )بالهدايا
والعروس تشتري لبس ومكياج وقمصان نوم الخ.........
والعريس بجهز البيت من مجاميعه (كل الاغراض الازمه)
العرس
قبل العرس بكم يوم بيجو اهل العروس بياخدو الجهاز وبتروح ام العروس واختها وخالتها
مشان يعلقوا الثياب ويرتبوا الاغراض الخاصه بالعروس
وهون بكون حاضر عدد كبير من اهل العريس مشان يتفرجوا على الجهاز
وطبعا كل قطعه والها طريقتها بالعرض والها زغاريد خاصه فيها
وبيعملو حفله صغيرة دق وغنى (بحموو للعرس )
وليلة العرس اهل العروس بيعملو حفله صغيره بسموها التوديعه لانها اخر يوم للبنت ببيت اهلها
واهل العريس بيعملو سهره للشباب بقولولها التعليله وتنصب الاضواء والكراسي بالشارع
وتقام الاغاني والدبكات اما ام العروس واخواته بروحو لحفلة العروس وبيعملوا الحنه وبدقوا وبيرقصوا
يوم العرس بتاخد العروس حمام سخن غيرررررررررر شكل وبتروح للكوافيره
اما العريس فبيكونو رفقاتو هرووو دعك بالليفه وعم يحمموا وبنقلها التلبيسه لانو الشاطر
يلي بلبس العريس والشاطر يلي بدو يعطره ويزبطه
وبس تخلص بترجع لبيت اهلها بتستنى اهل العريس يجوا وياخدوها
وما بياخدوها كيف ما كان لا بجيبوا سيارات كتيررررررررر و بسموها الفارده
بزينوها احلى زينه بالبالونات والورد الطبيعي
وبصيرو يزمرزووووو وبيصرعوا الدنيا مشان الكل يعرف انو اجوووووووو
وماالكو بطول السيره بتركب العروس وبتروح على الصاله
وهون ................... تطفى كل الانوار ما عدا ضو واحد بكون موجه على الباب يلي بدها العروس تفوت منه
بينفتح الباب شوي شوي بطل العروس باحلى ابتسامه تدخل شوي شوي وطبعا قدامها في اربع بنات صغار
لابسين ابيض وحاملين شموع بوصلو للاسكي (الكوشه)تجلس العروس وتضاء الانوار
ويبدأ الرقص والغنا والفرح وهيك لما يجي العريس زافينه اصحابه لباب الصاله
ولا ننسى العراضه هاي لازم بكل عرس بتكون اللعب بالسيف والترس واستعراض النار
والعراضه الشاميه هي من التراث الشامي القديم وبتقول العراضه
صلــــــــوا
على محمد
مكحول العين
نير وغضير
والعادينا وهيييييييه
أول مانبدا منقول
صلوا على طه الرسول
أول ما بدينا
على النبي صلينا
يا صلاتك يا محمد
والصلاة بالصوت صلوا
ياصلاتك يامحمد
والصلاة صلوا عليه
وعلينا وعليه
وعلى من زار قبره
وعلى من حج إليه
حجيت الحجاج لاجله
انشق القمر بنص الليل
من هيبة رسول الله
لا إله إلا الله
محمد رسول الله
===
في وحدة تانية :
شنكليلة شنكليلة
الله يعينه على هـ الليلة
من هالليلة صار له عيلة
الى آخر من هنالك من العراضات ..
بهاد الوقت بتروح العروس لباب الصالة استعدادا لاستقبال العريس اللي بيدخل بمرافقة والده
اول مايشوف العروس بيرفع عن وجهها الطرحة وبيبوسها وبيتوجهوا على الاسكي ,
بيلبسها الدهب و بيبدلوا مكان الخواتم من الايد اليمين الى اليسار , وببيسلموا على الناس
وبيرقصوا عادي وبيرقصوا slow , وبعدين بيقطعوا الكيك وبيتصوروا
وهون بتيجي الضيافه واكيد كلكوا الايمع (البوظه العربيه بتتكون من حليب وقشطه معجونه بالفستق الحلبي
ازا كان العرس بالصيف اما ازا بالشتاء بتكون الضيافه محلايه (او شكك الفقراء)عباره عن مهلبيه
وعلى وجها كريمه ومكسرات وطبعا مع الكيك يلي قطعوا العرسان
متوسطيا بتخلص الاعراس حوالي الساعة 12 او 1 , وفي اعراس بتضل للاربعة الفجر تقريبا ..
بنهاية العرس بيطلعوا العرسان بالسيارة المزينة ووراهم سيارات الاصدقاء والاقارب
وطبعا التزمير شغال وبروحو لفه بدمشق مثلا على جبل قاسيون
وبعدين بيوصلوهم على الأوتيل او على البيت
, ان كانوا رايحين على البيت من العادات القديمة
انه مستحب بيدخلوا معهن على البيت اول شي مصحف وسجادة صلاة
ويحطوا اعند الباب نبات اخضر ( باعتبار النبات رمز الخصب والحياة ) .
وفي ناس بجهزو عجينه لازم العروس تلزق العجينه على حيط الباب قبل ما تدخل
مشان تلزق ببيت زوجهاوما تطلع منه والمشكله ازا العجينه ما لزقت بضل العروس تحاول لحد ما تلزق
تاني يوم الصبح في ( الصباحية ) والتحية المعروفة فيها ( صباحية مباركة )
بيجوا امهات العروسين بيزوروهن وبيباركوا الزواج ..
وطبعا ممنوع العروس تزور اهلها الا ازا عملولها عزيمه كبيرة وبسموها ردة رجل
بعد الزواج بفترة قصيرة ام العروس بتعمل " مباركة " للعروس ,
وكمان بيجوا بنات العائلة والصديقات بيعملوا بالبيت حفلة صغيرة ..
وبتبلش الناس تروح تبارك للعروسين وبياخدو معاهم الهدايا
او بيعطو العريس مصاري شان يكمل يلي ناقصه بالبيت
وكل الاهل والاقرباء بيعزموا العرسان على الغدا وبضل ينعزموا شهر كامل
وهيك بتنتهي قصة العرس الشامي
بتحبو احكيلكم عن قصة الحمل والولاده ولا بكفي هيك ..........
كتبت :
LOVELYWIFE
-
ودامت الافراح حليفة دياركم العامرة
لا خلص حبيبتي بكفي الحمل والولادة قسم ثاني وحفلة ثانية اكيد
موضوع حلو يسلمو
كتبت :
um rawan
-
اووووووها ع الهشي الهشي
اوووووها وطبخنا المحشي
اوووووووها عروستنا حلوة
اوووووووها بيلبقلا كل شي
لوللولولولوليششششششششش
ماشي الله ما احلي الزواج السوري
بارك الله فيك حبيبتي
عن جد استمتعت بالموضوع والفرح الشامي
ربي جعل ايامك كلها افراح يارب
واحلي تقيم لاحلي حبيبه
اوووووها وطبخنا المحشي
اوووووووها عروستنا حلوة
اوووووووها بيلبقلا كل شي
لوللولولولوليششششششششش
ماشي الله ما احلي الزواج السوري
بارك الله فيك حبيبتي
عن جد استمتعت بالموضوع والفرح الشامي
ربي جعل ايامك كلها افراح يارب
واحلي تقيم لاحلي حبيبه
كتبت :
Coeur de Rjeem
-
انا جيت باله اعملو طريق ههههههههههه
انا جيت وجبت احلى وسام واحلى تقييم لاحلى الاء
تسلمي حبيبتي
انا عندي طلبين اول شي وين المالح احنا شفنا الحلو بس
تاني شي لما تروحي سوريا ويكون فرح ابعتيلي بطاقه دعوه
اووووووها ع الهشي الهشي
اوووووها وطبخنا المحشي
اوووووووها عروستنا حلوة
اوووووووها بيلبقلا كل شي
لوللولولولوليششششششششش
انا جيت وجبت احلى وسام واحلى تقييم لاحلى الاء
تسلمي حبيبتي
انا عندي طلبين اول شي وين المالح احنا شفنا الحلو بس
تاني شي لما تروحي سوريا ويكون فرح ابعتيلي بطاقه دعوه
اووووووها ع الهشي الهشي
اوووووها وطبخنا المحشي
اوووووووها عروستنا حلوة
اوووووووها بيلبقلا كل شي
لوللولولولوليششششششششش
كتبت :
ام البنات المؤدبات
-
اووووووها ع الهشي الهشي
اوووووها وطبخنا المحشي
اوووووووها عود الحلوة
اوووووووهاابدعت هون
اوووووووها وتستحق التقييييم
لوللولولولوليششششششششش
عشنا معك حفلا رائع رغم انه دخل العرس التقليدي على العصري بس الاجواء التقليدية تحفة
لك ودي
اوووووها وطبخنا المحشي
اوووووووها عود الحلوة
اوووووووهاابدعت هون
اوووووووها وتستحق التقييييم
لوللولولولوليششششششششش
عشنا معك حفلا رائع رغم انه دخل العرس التقليدي على العصري بس الاجواء التقليدية تحفة
لك ودي
كتبت :
عود مسك
-
حبيبتي نهوله شكرااا كتير على التقيم والوسام
بس للاسف ما بنقدم مالح في اعراسنا
وان شاء الله في فرح اخوي بالصيف اكيد كل المنتدى معزوم
بس للاسف ما بنقدم مالح في اعراسنا
وان شاء الله في فرح اخوي بالصيف اكيد كل المنتدى معزوم
مواضيع مميزة قد تهمك
التالي
السابق
المواضيع و التعليقات المنشورة لا تعبر عن رأي مجتمع رجيم ولا نتحمل أي مسؤولية قانونية حيال ذلك (ويتحمل كاتبها مسؤولية النشر)
الخصوصية وشروط الاستخدام حقوق النشر والتأليف الاتصال بنا
Powered by vBulletin® Version 3.8.7, Copyright ©2000 - 2024, Jelsoft Enterprises Ltd.
Content Relevant URLs by vBSEO 3.6.0
LinkBack |
LinkBack URL |
About LinkBacks |
Bookmark & Share |
Digg this Thread! |
Add Thread to del.icio.us |
Bookmark in Technorati |
Tweet this thread |