السلام عليكم ورحمة الله وبركاته
موضوعى عن ريجيم اللقيمات وان شاء الله هشرحه بطريقة بسيطة ومفهومة لان فى ناس كتير مش فهماه وانا كنت منهم بس قريت عنه كتير وفهمته الحمد لله وبدأت اطبقه من 4 ايام
والحمد لله مرتاحة عليه ومش محرومة من حاجة زى ريجيمات تانيه كتير
وان شاء الله هكتب لكم تقاريرى اليومية باللقيمات اللى اخدتها والوجبة المفرحة بتاعتى
وان شاء الله هصور بعض الاكلات اللى بعملها علشان نتشجع اكتر
واللى تحب تشترك معايا اهلا وسهلا بيها هتنورنى طبعا ويسعدنى تواجدها معايا
واللى هتشترك هتكتب وزنها وطولها وسنها وعايزة توصل للوزن الكام(هدفها)
وكل يوم ان شاء الله تكتب تقريرها ونتابع مع بعض
هكتب فهرس صغير للتعريفات اللى هستخدمها علشان اسهل عليكم
ك= كوباية
م.ص= معلقة صغيرة
م. ك= معلقة كبيرة
م.ط = معلقة طعام
ق= قطعة
س= الساعة
ولازم أأكد على حاجة مهمة جدا هى شرب الميه كتير لانها تبفرق كتير جدا وعن تجربة
هقولكم كمان على المشروب الحارق اللى انا بشربه لانه بيساعد اوى فى نزول البطن
وانا زودت عليه حاجات علشان تساعد على شد الجسم والرحم كمان منعا للترهل
1. م نعناع
1م. شمر
1م.قشر رمان مطحون من عند العطار
1م. كمون حصى
1 م. شاى اخضر
2/1 .م حنزبيل بودر ماشى ..فريش ماشى اللى موجود عندك
4/1.م قرفة
بخلط ده كله مع بعضه وبحطه فى برطمان وباخد منه معلقة على كوباية ميه مغلية واغطيها شوية علشان الزيوت الطيارة اللى فيها واشربها مرتين فى اليوم
هى طعمها مش حلو خالص وخصوصا انى بشربها من غير سكر لكن لو حبيتى تحطى لها سكر يبقى معلقة واحدة واللى عايزة توصل لهدفها تستحمل شوية
احنا اكلنا كتير وشربنا كتير وكانت النتيجة اننا تخنا جدا ومحرومين من اللبس الحلو وخفة الحركة ده غير الامراض ربنا يعافينا
دى كانت مقدمة بس للتوضيح وان شاء الله هكتب الريجيم فى المشاركة الجاية
ياللا مين هتتابع معايا؟