مشكلة شخصية ارجو الدخول للمساعدة

السلام عليكم ورحمة الله وبركاته

ازيكم ياوردات عاملين ايه

انا انهارده جاية اشكيلكم همى
انا كانت حفلة تخرجى امبارح وانبسط فيها الحمد لله بس انبسط عشان انا عاوزة انبسط برغم كل الظروف الى حوليا

واهم الظروف هى خطيبي
بقاله20يوم من اول رمضان بالظبط وماسمعتش منه كلمة تبل ريقى زى مابيقولوا ولمااكلمه واساله ع اى حاجة تخصه زى مامتعودة يزعقلى ويقولى مالكيش دعوة وجيت ف يوم قولتله انت بتعمل كده ليه انا عايشة ف نكد مستمر مارد عليا

من يومين فاتحته ف موضوع الشغل وخيرنى وقالى يانا يالشغل قولتله بس انت وفقت ع الشغل من قبل كده قالى ده قرارى النهائي انا ماقبلش ان مراتى تشتغل ولما قولتله بس انا لسه مش مراتك وان كونى ان بحترمك ده مايدكش حق انك تتحكم فيا انا لسه مش ع زمتك قالى مالم تسمعه اذنى ف يوم ولا حتى ف المسلسلات العربي

المهم روحت حفلتى وانبسط مع امى واخواتى واصحابي لانى بجد نفسي انبسط بقالى زمن ماانبسطش

ولما روحت كنت فرحانة وقعدت احكيله ع الى حصل واقوله ع الى البنات عملوه والكاترة وشباب الدفعة (انا مالى كلام مع الشباب بس اعرف الى كانوا موجودين ف الحفلة اسماء خاصة ان دفعتى مافيها غير 5شباب فمعروفين بالاسم)
المهم زعقلى وقالى تعرفى شباب وانتى مش صينانى وكلام الافلام ده قولتله انا ماعرفهمش تعامل انا اعرفهم اسماء انت عارف ان مافى شباب بدفعتى
المهم قعدت اتكلم واحكى وهو مابيرد وانادى عليه يرد عليا ويقولى افندم اقوله مابتتكلمش ليه انا لو كنت بكلم حيطة كنت رديت
قالى هو كده وقفلت بعدها كلمته والله بحاول اراضيه وفتحت معاه موضوع الشغل وقولتله احنا مش كنا متفقين انى اشتغل ف مدرسة انا حشتغل في واحدة
قالى خلاص يبقى انتى اختارتى اصلك انانية مش بتفكرى غير ف نفسك وخلاص مش مهم الى معاكى قولتله ماانت كنت موافق ووالدك قالك لما تكون ف بيتك بتقعدها من الشغل وانا موافقة قالى لاخلاص انتى اخترتى قولتله طب عاوزة اشوفك بكرة بعد محايلة طبعا وافق
لما نزلتله بيكلمنى عادى ولا فى شئ ولما بجانا كلمنا قعد يقولى عاوزة تشتغلى واهلك موافقين كمان انا اهلى مش موافقين ع شغل اختى وهى الى نازلة من دماغها من غير رضاهم قولتله البيوت مش زى بعضها قالى اهلك مش بيخافوا عليكى قولتله ليه مش مجتمع الشغل زى مجتمع الكلية هى هى الا لو كنت مش واثق فيا قالى وانتى لسه عرفانى اه انا شكاكك
وقعد يزعق والله مارديت عليه وقالى قوليها يلا انك عاوزة تشتغلى عشان تقلعى دبلتى وارميكى برا العربية واتف عليكى وامشي
انا ماتسبش انا اسيب بس بطريقة شيك انا حنهيهالك بطريقة حلوة وانا مابرد عليه والله قالى وانتى ف البيت اتكلم وانتى ماتردى عليا انا اقولك غورى ف داهية انتى طالق مارديت والله ف الاخر قالى حتفضلى خارصة قوتله مش قادرة اتكلم نزل من العربية ووقف برا وانا فضلت جوا وقعدت اقرا قران رجع قالى مش كنتى حتخلصى ورق ف الكلية انزلى وخلصيه وارجعى قولتله لا روح انت انا بروح لوحدى زعق وهلل طبعا المهم نزلت وروحت خلصت ورقى ورجعت قعد يتكلم ببرود وحتروحى فين قولتله اروح
المهم قعد يغلس عليا وانا ما بديله اى وش وقالى صافى يالبن قولتله لا قالى مش حتصلحينى يعنى قولتله مش انا الى مزعلاك قالى براحتك وانا ف السكة قولتله انا فهمت انت ليه كنت بتقولى ع الشغل اه يعنى هو الشغل مستنينى ع الباب لما تبقى تتخرج بقى يبقى يحلها ربنا بس ياخسارة الشغل طلع فعلا مستنينى ع الباب قالى بصراحة اه وبعدين سالته هى الحياة الزوجية بالنسبة لك ايه
قالى واحدة محترمة تصونى وتصون بيتى وتراعى جوزها وبيتها وعيالها وتدلع جوزها وتغسل وتمسح ......................
قولتله جارية يعنى قالى جارية ؟؟؟؟؟؟؟؟؟؟؟؟؟؟؟؟
قولتله اه دى مواصفات جارية الحياة الزوجية يعنى مشاركة عارفها ولا ماسمعتش عنها وسبته وطلعت البيت
انا من جوايا خلاص والله انا مابقيت عوزاه بعد الكلام الى قاله ده يابنات سعدونى ادخل اهله ف الموضوع ولا اعمل ايه ولا هى خلاص من بعد الى اتقال والله عيونى وارمة من كتر العياط وامى تتحايل عليا عشان اقولها مالى ماقولت قولتلها تعبانة وعاوزة انام ساعدونى ارجوكم

لا حول ولا قوه الا بالله
حبيبتي والله انو حكايتك بتحزن يعني يوم التخرج يحصل كل ده
اولا حبيبتي ممكن ردي يكون قاسي شويه واتمنى تتقبليه
انتي ممكن تعذري خطيبك لو كان تصرفو ده لانو عنده مشكله عويصه عايشها و انتي مش عارفاها وممكن تعرفي ده من اهلو
وكمان خلي الموضوع لبعد رمضان و اقعدي معاه تاني و تكلمو
وحطو النقاط على الحروف
لانو حبيبتي ما ينفعش يقولك كلام بذيء و انتو يا دوب مخطوبين وفهميه كده لانو الزواج حبيبتي مش لعبه ممكن نزهق منها ونغيرها ولو عزنا نغيرها احنا النساء الي بندفع الثمن من اعصابنا و نفسيتنا و صحتنا
ولازم تتكلمو منيح في امور الزواج الي ليكم والي عليكم عشان تكونو واضحيين وما يكنش فيه خداع
و اهم حاجه حبيبتي اعملي صلاه استخاره و ادعي ربنا
و الان بقولك الف الف مبروك على النجاح و التخرج حبيبتي افرحي بنجاك لانو نتاج سنين من الدراسه من اول سنه اولى ابتدائي ولانو جا من تعبك انت واهلك افرحي و خليهم يفرحو واجلي الكلام في مشكلتك لبعد رمضان ان شاء الله يراجع نفسو ويطلب العفو
لكن صدقيني الزواج عشان ينجح لازم الوضوح في كل الامور و من الاول
وفقك الله و وابعد عنك الحزن و ان شاء الله خطيبك ربنا يهديه
تقبلي مروري

اهلا سماء

ماشاء الله عليكي يانهول ارائك بتعجبني كتير

بصي حبيبتي سماء مافي اتنين مخطوبين ومابيحصلش بينهم مشكلة دي سمة اساسية هههههههه

وطبعا هما بيغلطو واحنا بنسامح من اول الخطوبة لحد بعد الزواج وزي مانهلة قالت كلو بيبقي علي حساب نفسيتنا وصحتنا صدقتي يانهلة والله العظيم

باختصار حبيبتي عشان مااطول عليكي اذا كنتي بتحبيه وحاسة ان ايجابياتو اكتر من سلبياتو هتسامحيه لان الحب بيغفر كل شئ وانتي اللي تقدري تحددي هالشئ طبعا

ولما حبيبتي يقولك الزواج في نظرو زوجة تصونه وتتدلعه وتمسح وتطبخ هذا مامعناه ابدا انك جارية بالعكس هي دي وظيفتنا الاساسية

ولعلمك بقي الرجالة بيمووووووتو في الدلع بس فين الحريم اللي عندها طولة بااااال هههههههههه

واولا واخيرا مافيش راجل كامل وانظري مثل ماقلتلك لايجابياتو وسلبياتو وكمان مقدار حبك ليه

هديكي مثال عشان تفهمي قصدي انا مثلا كنت مخطوبة قبل كدة واول غلطة ليه اتصلت ع بابا الله يرحمو وقلت له تعااااااااالي انا مش عايزة الشخص ده وغلطته انو كان كلم امي باسلوب مش كويس وانا كنت متعودة انو محترموبيحترم امي وقالولي فكري كويس قلتلهم فكرت وقررت وبعد ماديناه الدهب بتاعه ونزل قعت ازغرط من كتر الفرحة والله العظيم وكنت حاسة ان هم وانزاح من ع قلبي والله

اما زوجي حاليا غلط فيا واحنا مخطوبين لان وصلو اني بشتغل من وراه الله يسامح اللي كان السبب وانا كنت مظلومة وقالي كلمة رخمة جدا وبعدها ماتصلتش عليه وقلت ان احنا كدة خلاص سبتا بعض لقيته بيتصل عليا بعدها باسبوع وبصراحة كنت منفعلة جدا لكن عشان حبيته من اول ماتقدملي سامحته صحيح مش ناسية الموقف طبعااااااااا لكن مايمنعش انو انسان كويس يارب اكون افدتك بذكري لتجاربي ههههههه واكون قدرت اوصلك اللي عايزة اقولهولك