المشكلة الحقيقية في نظري واللي مسببة معظم الازمات التربوية والاسرية اللي احنا شايفينها هي
ان اغلب الزوجات والازواج او المقبلين على الزواج لا هم فاهمين يعني ايه جواز ولا يعني ايه مسؤولية. ولا فاهمين حقوقي ايه في مؤسسة الزواج ولا واجباتي ايه
كتير بيتجوز فقط لان خلاص ان الأوان يتجوز. وعشان ما يفوتوش القطر وعشان ما يتقالش على البنت عانس وعلشان الراجل خلاص لازم يفتح بيت ويتلم
وطبعا بنفس المبدأ بتكون الخلفة في أحيان كتيرة. بنخلف عشان اتجوزنا وعشان المجتمع من تاني شهر بيسأل بمنتهى الحشرية وقلة الذوق المغلفة بالمحبة الزائفة. ايه مافيش حاجة في السكة!
لا الزوج عارف واجباته ولا عارف احتياجات الزوجة النفسية والروحية. ولا الزوجة عارفة حقوقها وواجباتها ولا عارفة تتعامل ازاي مع الزوج دا
وبنصرف على الفرح والنيش والفستان والحنة والتقاليع بتاعتها الجديدة اكتر ما بنصرف على كتاب واحد او دورة واحدة نحضرها نفهم اللي احنا مقبلين عليه دا هو ايه. دا احنا حتى ما بنصرفش وقت نحضر محاضرة من الاف المحاضرات على اليوتيوب
والنتيجة مآسي يدمى لها القلب لما كلا الطرفين يكتشف ان الجواز مسؤولية ومشاركة يا حرام
والطفل اللي جه الدنيا دا يتظلم في مشاكلنا وجهلنا بالتعامل معاه. ويزيدنا هم ونقتل روحه وطموحه ونربيه تربية كنا رافضينها
لو كل زوجة فهمت يعني ايه زواج وانها قوية وانها قادرة على الامساك بزمام حياتها. هاتكون اسعد. وما تنتظرش الزوج يسعدها او يتغير. هي تتغير وتتنور وتتعلم وترتقي وبالتالي الكون هايتغير معاها. بس تبذل شوية مجهود
لو الزوج فهم انه شريك في الحياة الزوجية ودوره اكبر بمراحل من انه يشتغل ويجيب فلوس وما يشاركش لا في تربية ولا اهتمام ولا حتى يفكر البني ادمة اللي اتجوزتها دي ليها حقوق ولازم احاول افهمها واسعدها.
لو فهمنا اصلا ربنا خلقنا ليه حياتنا هاتتغير
وارجو قبل ما تاخدو موقف دفاعي عن نفسكم تفهمو اني مش ضد حد ولا باتعالى على حد بالكلام. انا هدفي تفهمو وتحاولوا صادقين تتغيرو بينكم وبين نفسكم تكونو أمناء عشان تقدرو تعيشو
كلنا نتاج منظومة تعليمية وتربوية ومجتمعية فاشلة خاوية ضاعت فيها الاولويات والحقوق والواجبات. واصبح العيب والغلط المجتمعي يحكم اكثر من الحق والحلال والباطل والحرام.
منظومة تعليمية تحاسب الطالب اذا فكر ولا ترضى باقل من الاجابة النموذجية وتصنف الطلاب حسب درجاتهم ولو بالغش فاصبح الطالب واهله اشبه بالتور المربوط بساقية عمال يلف وبس لاهو شايف ولا هو عارف بيعمل ايه
كلنا نتاج الخواء الفكري. بيوت كتيرة مافيهاش مكتبة ولا كتي غير كتب المدرسة وممكن كم رواية وبس
لكن دا لا يعني الاستسلام. لا يعني اني اعيش واموت كالأنعام اكلت وشربت وتجوزت وخلفت ومت.
دا لا يعني اني خلاص هاعمل ايه يعني انا اللي هاغير الكون.
اه كل واحد فينا يقدر يغير الكون. لما يغير نفسه
ودايما افتكروا
(إن الله لا يغير ما بقوم حتى يغيروا ما بأنفسهم)
ولازم نفهم.. الجواز حاجة كبيرة اوي. ومسؤولية عظيمة. ومهم جدا نفهم نتعامل ازاي
مساؤكم قوة ارادة وعلم ونور
مع محبتي
منقولمناحديصفحاتالاستشارياتبمجال الاسره
