قصتي مع الحمل و مشكلة زوجي حيواناته المنوية صفر

قصتي مع الحمل و مشكلة زوجي حيواناته المنوية صفر

مجتمع رجيم / الحمل و الولادة
اترجـــــة
اخر تحديث
قصتي مع الحمل و مشكلة زوجي حيواناته المنوية صفر

قصتي مع الحمل و مشكلة زوجي حيواناته المنوية صفر
حيواناته o660slxjt7gcrehby4qj
السلام عليكم يا بنات ... انا فكرت كتير قبل ما اكتب موضوعي هنا بس لاقيت ان ده انسب قسم لكتابة قصتي عشان ابعث الامل لكل واحدة نفسها تخلف سواء العيب عندها او عند جوزها

بصوا بقى ان متجوزة بقالي تقريبا 4 سنتين و ربنا ما اردش اني اخلف عشان زوجي عنده مشكلة حيوانته المنوية صفر كنت هعمل حقن مجهري و خضعت للعلاج و الحقن و زيادة التبويض و استخرجه مني 9 بويضات بس عملو العينة من جوزي و بس للاسف مالقوش حيوانات منوية جوا الخصية يعني الامل اصبح تقريبا معدوم ....

الحمد لله انا وجوزي بنحب بعض و هوا بجد انسان بمعنى الكلمة عيبه الوحيد ده بس ماقدرش اقول عيب لان ده شئ مش في ايده دي ارادة ربنا و ربنا قال في كتابه ان في ناس ربنا خلقهم عقم ... سبحان الله انا بستغرب جدا من الناس و ارائها وكانها مش عارفة حاجة عن دينها و كلامهم فيه شرك خفي و العياذ بالله ...زي مثلا انتي هتضيعي عمرك معاها بكرة تندمي اقولهم يعني لو سيبتو هتضمنوا اني اجوز واحد بيخلف انتو عارفين الغيب و لو خلفت تضمنوا انه يكون سليم و لو طلع سليم تضمنوا انه ميطلعش عاق و اكره اليوم الي خلفته ....و هكذا

المهم انا قفلت ودني خالص عنهم حتى اقرب الناس ليا كنت باخد كلمهم يجرح و اتالم منه و كنت بكبر بس مانكرش ان اوقات كانت نفسيتي في الارض و اكون حزينة جدا ... انتو اكيد عارفين الناس و طريقتهم في التعامل مع موضوع زي ده .... مش محتاجة احكي و اضيع وقت في كتابيتها يكفي اقولكم ان أي جرح و او الم تحسي بيه بيكون في ميزان حساناتك عشان ربنا عالم بالي جواك و بغريزة الامومة الي خالقها جواك و الوجع الي بيتحسي بيه صدقوني ربنا رحيم قوي و كريم قوي و بيحب عباده قوي

بعد ما فشلت عملية الحقن المجهري دخلت في حالة حزن و خصوصا ان ماكنش حد من اهلي عارف اني هعملها سبحان الله انا قولت بلاش اقولهم عشان لو ما لاقوش حيوانت منوية داخل الخصية ما بقاش ايدتهم الامل و بعدين ينصدموا و كمان عشان وضع جوزي قدامهم و كان الحمد لله قرار سليم لان لو كانوا شافوا الي مريت بيه و فشل الموضوع كانوا هيكونوا عبأ عليا انا هكون محتاجة الي يصبري مش الي يحسرني
من فترة كدة كنت شفت اعلان عن كفالة اليتيم في بيتي و كنا انا و جوزي حاطين الموضوع ده في دماغنا حتى لو خلفنا قلنا بردوه نكفل (طبعا ماكناش نعرف الاجراءات و ان انت لو مخلفة مش ينفع تكفلي ) خدنا بعضنا انا جوزي وبدأنا نزور دور ايتام و نشوف الاطفال و سبحان الله كان قلبي بيتقطع عليهم و اقول في نفسي حكمتك يارب ناس تتمنى اطفال و اطفال يتمنوا اهل كنت بشوف في عيون الاطفال الاسى و الاشتياق لحضن و حنان خصوصا الاطفال من سنة و سنتين لدرجة ان مرة طفل انا فاكرة اسمه مهند فضل حاضني و مش عايز يسيب حضني و انا ماشية فجت المشرفة تشدوا مني كان تقريبا عنده سنة و نص .... سبحانك يارب
المهم لفينا انا و جوزي اماكن كتير عشان نشوف انسب طفل للكفالة و استقرينا اننا نكفل بنوتة بس تكون رضيعة عشان تفتح عينها علينا و نبقى احنا كل الي ليها في الدنيا .... بس كان فيه مشكلتين قدامنا
المشكلة الاولي هي اجراءات الكفالة انتو طبعا عارفين بلدنا الجميلة و الاوراق الي بتاخد شهور على ما تخلص خدنا بعضنا ورحنا الشئون الاجتماعية عشان نعرف الاوراق المطلوبة و الشروط و كدة ...اسمها بالضبط ادارة الشئون الاجتماعية قسم الاسرة البديلة الي هي بتدي الموافقة و الاجراءات كلها بتكون عندها و بتكون حسب المنطقة الي انت ساكنة فيها ... نسيت اقولكم ان احنا شفنا بنت في الاورمان عندها 3 شهور و قلنا خلاص هنكفلها بس رفضوا يدونا أي موافقة من غير منخلص ورقنا لان البنت دي كانت اسرة تانية عايزاها فاقلولنا الاسرة الي بتخلص الورق الاول هي الي بتستلم و طبعا الاستلام بردو ليه اجراءات
المهم رحنا و كانت المسئولة في اجازة فقعدنا مع واحدة عرفنا منها الشروط المطلوبة و هي كالتي :
يكون الزوج و الزوجة ماعندهمش اولاد و يكون سننين الجواز مش اقل من خمس سنوات
الزوج يكون ليه شقة ملك او ايجار باسمه
الزوج يكون ليه دخل مادي يقدر انه يقيم اسرة
تحليل فيروس سي و ايدز للاب و الام
طبعا صور القسيمة و البطايق و كدة
فيش و تشبيه
صورة للزوج و الزوجة
و بعدين لازم مشرفة الشئون تعمل زيارة ليكي في محل اقامتك و تشوف البيت و ترفع تقريرها للجنة و كل الورق ده بيتعرض على اللجنة بعدها بشهر يانخد موافقة يا لأ
الحمد لله خلصنا ورقنا باسرع ما نتخيل و جت بعدها المشرفة البيت و اتكلمت معايا و قالتالي انت واثقة في الخطوة دي خالي بالك الطفل الي هيجي ده لو لا قدر الله حصل انفصال بينك و بين زوجك هناخده تاني لانه ما ينفعش نسيبه في عيلة مفككة ... هي قالتالي الكلام ده عشان شافتني صغيرة و حلوة افتكرتني يعني متسرعة في القرار و قعدت تحكيلي عن حالات عندها و كدة ... قلتلها بصي ان ربنا حرمني فده مش عشان ربنا مش عايز يرزقني طفل لأ ده عشان شايلي خير انا واثقة في الخطوة دي كفاية اني هنال شرف كفالة طفل و مرافقة النبي في الجنة ان شاء الله ... و قلتلها ان اللجنة موافقتيش علينا يبقى لاننا لسه مش على الدرجة الي نستحق بيها الخير ده ... بصراحة اتفاجات من كلامي و قالتالي لأ ان شاء الله تاخده موافقة .... و الحمد لله بعدها تقريبا بشهر و نص خدنا الموافقة و كان ايامها وقت الثورة و القلبة الي كانت في البلد خدنا الموافقة تقريبا نص فبراير
___________
طبعا اول ما اخدت الموافقة منها بالتليفون قلتلها خلاص اجيلك امتى اجيلك اخد الجواب عشان اروح الدار اخد البنت الى انا قلتلكم عليها كانت حبيبتي وقتها عندها تقريبا 5 شهور قالتالي الاربعاء عشان انا مش موجودة بكرة قلتلها خلاص طبعا ماستنتيش رحت تاني يوم على الدار اشوف حبيبة قلبي ريــــــتاج لاقيت المشرفة تحت بتقولي معلش ريتاج محجوزة قلتلها ازاي انتم قلتنا لما نخلص ورقنا هنقدر نستلمها لان احنا هنكون اسرة جدية قالتلي لأ ماهو بردو الاسرة الي عايزاها خلصت ورقها قلتلها طاب مخدوش البنت ليه سيبنها هنا المهم جوزي احتد عليهم رحت قلتله خلاص يا بابا مالناش نصيب فيها واضح ان الاسرة الي هتخدها واسطة و لا حاجة راحت المشرفة قالتالي لا احنا ماعنداش وسايط احنا ... و احنا .... قلتها خلاص الموضوع انتهى ... قالتالي عموما فيه بنوتة تانية لو تحبو تشوفوها قلتها ماشي طلعنا فوق نشوف الاطفال طلبت منهم يجيبولي ريتاج اسلم عليها جابوهالي و بعدين جابولي البنت التانية بس سبحان الله قلبي مش انفتح ليها يمكن عشان الصدمة الي خدتها منهم ... المهم شفنا الاطفال و مشينا انا جوزي و احنا بنصبر بعض و نقول معلش خير كله خير ....
كنت قلتلكم ان فيه مشكلتين قدامنا ... اقولكم الاول على المشكلة التانية و هي ان انا كنت ناوية اني لما اجيب البنوتة ارضعها من صدري خمس رضعات مشبعات عشان ابقى امها بالرضاعة و جوزي يبقى محرم عليها و كمان عشان لو ربنا كرمني بولد يبقوا اخوات ...
هتقولولي ازاي هقولكم ان كنت قارية عن الموضوع ده كتير على النت و كنت عارفة انه ينفع و انه عادي بدليل ان كان فيه مرضعات ايام الرسول صلى الله عليه و سلم كان مهمتهم انهم يرضعوا حتى لو ماعندهومش اولاد ... فرحت مكلمة دكتورة نساء على التليفون و قلت اسئلها ايه الدوا الي مفروض اخده و هنــــا كنت المفاجئة قالتالي ماينفعش قلتها ازاي قالتالي ماينفعش و انتم عارفين الدكاترة في مصر بدل ما يقولو مانعرفش يقولوا ما ينفعش المهم يفتوا و خلاص ...
طبعا انا انصدمت و زعلت لان كدة الوضع هيكون معقد ... انا عايزة البنوتة الي اجيبها تعيش حياة طبيعية معايا انا و جوزي تعامل جوزي ابوها تحضنه ..تبوسه تقعد قدامه كاشفة شعرها .. تنشأ في اسرة طبيعية زي باقي الاطفال و كدة
و هنا يرجع الفضل اولا لله سبحانه و تعالى ثم الى دكتورة شروق الهيتمي الي في قسم الرضاعة الطبيعية في منتدى فتكات بعتلها و سئلتها و الحمد لله ايدتني الامل و قالتالي ينفع بس الموضوع هياخد سنة و على العموم ايدتني رقم دكتورة في ابو الريش اسمها د امل الطويل ربنا يباركلها و يجعلها من اهل الجنة كلمتها في التليفون و رحتلها ابو الريش عشان توريني ازاي ادلك الثدي لتحفيزه لافراز اللبن و قالتالي على اسم دوا اخده و عدد الجرعات و اني لازم انتظم و استخدم الشفاط الكهرباني كل 3 ساعات يعني مش اقل من 8 مرات في اليوم لمدة ربع ساعة كل ثدي ... في الاول كان الانتظام صعب بس بعيدن و مع نزول اول نقطة حليب اتحمست و انتظمت ...
نيجي بقى لموضوع بنوتي القمر ... طبعا انا و جوزي (قبل ما ابدأ رحلة محاولة انزال اللبن من صدري ) رحنا كذا جمعية خيرية نشوف البنات و كمان الشئون الاجتماعية بصراحة مخلنياش و كان بحثنا على بنت و تكون في اقل سن ممكن عشان اعرف ارضعها ... البنات عليهم الطلب جامد في الكفالة الخارجية يعني صعب انك تلاقي بنوتة صغيرة رحمتك يارب...
المهم رحنا اورمان المهندسين مع ان لما كنا في اورمان الهرم كلموهم و قالولهم... قالوا لأ ماعنداش بنات انا كنت رايحة اورمان المهندسين عشان اسئلهم على الشفاط الكهربائي عشان كنت سمعت انهم بيأجروا و ماكنش في دماغي اني هلاقي عندهم بنات حتى كلمتهم في التليفون مارحتش و جوزي وهوا طالع من الشغل قلتله عدي عليهم بص عشان هوا شغله جنبهم ...
راح جوزي و هنا كان الخير الي ربنا شايلوا لينا ربنا بيقلنا توكلوا عليا بس خدوا بالاسباب و اسعوا و اتعبو و ساعتها ربنا يكافئك ... جوزي سئلهم من باب الفضول عندكم بنات قالولو اه بس انت معاك موافقة الشئون قالهم اه .... طلع فوق و شاف حبيبة قلبي بنوتي خديجة كان ساعتها عندها اد ايه ؟؟؟؟ تقولوا اد ايه ... اسبــــــــــــــوعين بس تخيلوا يا بنات لسه في اللفة و زي القمر ... زي ما تكون مستنيانا ... سبحانك يارب
رجع جوزي من الشغل بعد ما كان صورها على الموبايل صورة عشان يوريهالي و قالهم هنجيلكوا انا و مراتي بكرة و معانا جواب المختوم من الشئون..
نسيت اقولكم فيه حاجة عن الاورمان هما مش بيسلموا الرضع قبل اربع شهور ده نظامهم حتى لو خلصنا كل حاجة مش نستلم قبل 4 شهور بس سبحان الله لما رحت تاني يوم اشوف بنوتي لاول مرة.. اتكلمت مع المشرفة و استعبط و قلتلها امتى ممكن اخدها و كانت المفاجئة .. قالتالي بمجرد ما نخلص ليها الورق بتاعها استلميها !!!!!! يعني بمجرد ما يطلعوا شهادة الميلاد بتاعتها اقدر استلمها و شهادة الميلادة قدامها بتاع اسبوعين ... سبحان الله
طلعنا انا و جوزي و احنا مش مصدقين نفسنا مش عارفين نفرح و لا نحزن يعني مشاعر كدة ملخبطة بين الفرح و بين كلام الناس طاب اهلي اقولهم ايه طاب الاقارب طاب موضوع الرضاعة انا لسه ما بدئتش فيه يا ترى هعرف ارضعها و لا لأ ؟؟؟ ميت سؤال و مشاعر ملخبطة ابتدى جوزي يهدني و يقولي واحدة واحدة احنا قطعنا شوط كبير و دلوقتي وقت الجد اول حاجة لازم نروح نشتري الشفاط الكهرباء عشان ابدء التحفيز صدري ينزل لبن و طلعنا علطول جبناه و بداءت يومها علطول في خطوات الي الدكتورة قالتلي عليها و الحمد لله بعد تقريبا عشر ايام ابتدى ينزل نقط بسيطة بس بالصبر و المثابرة ابتدت النقط تزيد و كنت بعمل حاجة بقى كنت بحوش الي بينزل في مكعبات تلج في الفرزير عشان اقدر اكون رضعة يعني 120 ملل و انا محتاجة خمس رضعات يعني كمية
المهم ابتديت امشي في الموضوع واحدة واحدة بس ما بتديش تحويش غير قرب معاد ما اخد خديجة .... حصل بقى حاجة غريبة المعاد اتاجل مرتين يعني استلمتها بعد شهر و نص من يوم ما شفتها ... بس كنت خلال المدة دي اروح ازورها مرة كل اسبوع .... استلمتها يوم ما تمت بالضبط شهرين يوميها رحت معايا شنطة الاطفال و لبس الاطفال و اللبن بتاعها و كان شعور غريب و انا رايحة اخدها و حتى بعد ما اخدتها زي ما تقولوا كدة مش مصدقة نفسي هي كانت يا حبيتبي صغنونة قوي كانت 3.300 جرام يعني كانها لسه مولودة ... طلعنها بيها يومها علطول على اهل جوزي الي عيطوا من الفرحة و حبوها جدا جدا جدا .... بالنسبة لي مامتي كانت مسافرة عند اخويا برة مصر بس وصلها الخبر بس رد فعلها ماكنتش مبسوطة اصلا هي كانت معارضة الفكرة و ماكلمتنيش ... المهم انا ما همنيش دي حياتي و انا حرة فيها انا في الاخر الي بفرح او بتالم ماحدش بيشيل هم حد كل الناس بتتكلم و خلاص محدش بيحس بالي جواك غيرك انت ... انت عارفة ايه الي يسعدك اعمليه طالما يرضي ربنا ... الحمد لله بمجرد من اخدتها في خلال شهر كنت رضعتها اكتر من خمس رضعات مشبعات و بقيت انا امها بالرضاعة ... اللهم لك الحمد و انا بكتبلوك هي نايمة على السرير جنبي زي الملاك ربنا يخليهالي و يعيني على تربيتها تربية صالحة يارب ..
دلوقتي هي عندها 4 شهور و نص و الله حاسة ان بقالها سنين معاانا بموت فيها و جوزي بيموت فيها حتى والدتي الي كانت معارضة الفكرة حبيتها و كل الي يشوفها يحبها و يتعلق بيها ... وازاي ما يتعلقش بيها و ربنا تعهد انه يأوي اليتيم و تعهد بحفظه لانه مالوش حد في الدنيا ربنا جعلنا سبب ليها عشان يأويها دايما بقول هي مش بتاعتنا دي بتاعت ربنا
كلمة اخيرة عايزة اقولها للزوجات الي نفسهم يكونوا امهات ..و دي من واقع ما مريت بيه ... الامومة مش حمل وولادة لأ و الف لأ ... الامومة حب و حنان و رعاية و سهر و تعب و تعلق بالشئ الي بيكبر قدام عينيك ... الزرع الي انت بتهتمي بيه و بيكبر قدامك هي دي الامومة و دليل على كلامي اننا بنسمع عن امهات كتير بيخلفوا و يرموا و لادهم او حتى يموتوهم اول ما تولده ده لانها لسه ماحستش معاه بالامومة و الحب ....
انا كتبت قصتي ليكم بالتفصيل عشان تستفيدوا منها و مش طالبه منكم غير انكم تدعو ان ربنا يباركلي في بنتي و جوزي و يعيني اني اربيها تربية صالحة و ان ربنا يعز بيها الاسلام نفسي احفظها القرآن و تكون من اهل القرآن يارب
و أي سؤال انا حاضرة


ام مارى
انا مبسوطه انى اول واحده ارد عليكى بجد دمعت لما قريت كلامك يارب يبارك للك فيها وتفرحى بيها فعلا الامومه معنى كبير قوى ميحسش بيه الا الى بيتمناه ربنايتم عليكى النعمه والخير وتفرحى وتتهنى معاها انا عندى مريم دنيتى كلها وحياتى واختى وصديقتى كنت بتمناها والحمد لله ربنا اعطهانى وفعلا ربنا كريم قوى وبيحس الى فى القلب والى بيطلع من القلب وبكره تفرحى وتلعبى مع خدديجه وتفرحى بيها يارب يوم فرحها
أميرة كل النجمات
الله يخليلك ياه ويخليلك زوجك
الله يسعدكن وان شاء الله تربوها احسن تربية
موضوع اكتر من رائع والله بيسرلك اكيد كل تاخيرة فيها خيرة عنجد
سبحان الله
♥♥♥..تـرتيـل ..♥♥♥
الله يسعدك ويحميكي وينصرك يارب
ويباركلك ببنتك وتربيها احسن تربيه حبيبتي
وعسى الله ان يجعل قصتك هدا دواء لكل وحده محرومه وتهوني عليها وتصبيرها
وتكون لك اجر وثواب في الدنيا والاخرة
شكرا لك حبيبتي وموفقه يارب
تقبلي مروري
كلمة صدق
ربنا يبارك لك انت وجوزك ان شاء الله يا ام خديجة
بجد انا مش كنت متخيلة النهاية الرائعة دي

ياريت كل اللي بيمروا بنفس ظروفك يفكروا زي مانت فكرت ويتصرفوا بنفس تصرفك الرحيم

ربنا يقدرك على تربيتها تربية صالحة وتفرحي بيها وهي عروسة ان شاء الله
شذى العبير
السلام عليكم ورحمة الله وبركاته

الأصالة والحنان والحب الكبير ظهر عليك عندما قلت انك لم تتخلّي عن زوجك رغم كلام الناس الذي لا ينتهي ابدا


اللهم بارك في خديجة واجعلها من الابناء الصالحين يا رب العالمين وبارك في ام خديجة وزوجها يا ارحم الراحمين



تقبلي مروري........ ولا تنسي تبوسيلي خديجة الحلوة مباشرة بعد ما تقرئي ردّي
الصفحات 1 2 

التالي

تمارين للحوامل و ما بعد الحمل من تصويرى (حملة سماء الابداع)

السابق

الحمل - الصح والخطأ في مخاوفك مهم لكل حامل

كلمات ذات علاقة
مشكلة , مع , المنوية , الحمل , حيواناته , صفر , زوجى , قصتي