خطيبتي متبلدة المشاعر

انا شاب عمري 23 سنة أعاني مشكلة عاطفية حادة من وجهة نظري مع خطيبتي البالغة من العمر 22 سنة

هي البنت تقرب لي بنت أبن عمي …وصحيح كنت أشوفها مرات كثيرة ولكن ماكان بيني وبينها أي أرتباط ولا أي كلام ماغير سوي شاي ونحوه

المهم بعد فترة قرروا موعد الزواج وهو بعد عيد الفطر القادم…وطبعاً البنت سافرت للخارج تدرس لغة وانا ادرس جامعة في البلد ….المهم عطوني اهلها رقم الواتساب حقها وبديت في التواصل معها للتهيئة …. البنت من النوع الخجول بشكل مميت ….خجولة لدرجة أنها ترفع الضغط وتقهر في نفس الوقت …

طبعاً بعد مرور 3 أشهر من التواصل بالواتساب “دردشة” خفت حدة الخجل في المواضيع العادية ,,,ولاكن في الرومانسية تصير قدامي صنم …تعرفون وش معنى صنم؟؟؟ صنم بالمعنى الحرفي

صرحت لها بعد مدة بحبي لها ولكن ياريتني ماقلت صرحت لها…زعلت وهجرتي يوم كامل ,,,وبعد ماعدنا قالت ياريت ماتقول لي اي شيء من الكلام السابق ولا نحوه

طبعاً انا زعلت بس مشيت الأمر ,,,,بعد فترة ماقدرت أتحمل لان الحب من طرف وأحد يقتلني صراحتاً وحياتي الواقعية صارت جداً صعبة بسببها …كل شيء يصير لي معها ينعكس في تصرفاتي في الجماعة وفي السوق وفي البيت مع الأهل ونحوه….صرحت لها أن لازم أترك التواصل معها على الوتساب حتى موعد الزواج لان الوضع صار لا يطاق …زعلت هي وقعدت تنتقد نفسها وانها هي السبب في خراب حياتي…صراحتاً انا احبها وماقدرت أتحمل لومها لنفسها فهديتها وصرحت لها عن حبي ولاول مره تصرح لي بحبها لي ..وقالت لي يومين ودي اقولها بس ماقدرت ,,,المهم في هي اللحظة كنت باطير من الفرح وصرت أسعد مخلوق,,,وبعدها بيومين جت الطامة الكبرى

شفتها رجعت لعادتها القديمة وصارت ماتتجاوب نهائياً مع الكلام الرومانسي ,,,قلت صارحيني وش صار تحبيني ,,,قالت مادري

تخيلوا يعني لعب بمشاعري ….قبل فترة قالت احبك وبعدها بكم يوم قالت مادري ….بالله وش رايكم.؟؟؟ طبعاً انا حساس درجة أولى …حساس أكثر من النساء نفسهن

صراحتاً ذاك اليوم غرست في قلبي رمح ساااام ….هجرتها ثلاث ايام ورجعت لها ….طبعاً هي مارسلت اي رسالة بحجه انها ماتبي تزعلني أكثر

وقالت انا ندمت اني قلت لك اني احبك آسف من أعماق قلبي ومن ذا الكلام ….يعني من الآخر ندمت انها قالت تحبني ,,,وقالت بدري على ذا الكلام ….بدري وش وحنا لنا اشهر نتواصل وموعد زواجنا قرب وبعد ماقلتي احبك

المهم ياجماعة هي بنت خجولة لابعد درجة وكذلك قنوعة بشكل فضيع….حتى غرف النوم يوم ارسلت صورها لها قالت اختر انت انا عادي عندي …طيب تبين هدية اي شيء شو تتمنين ..تقول الحمدلله مافكر في شيء

اي شيء اقوله لها تقول بكيفك او اللي يريحك لين اصر عليها

والله تعبت معها ومادريت هي تحبني او لا …وبعض الاحيان تتأخر في الرد على رسائلي

البنت من الآخر تبي تخاطبني كصديق مو خطيب …اي مواضيع رومانسية ماتتكلم فيها وتلتزم بالصمت وتقول وش تبيني اقول وانا استحي ومدري شو ..وقبل كان عادي

انا محتاج شوي رومانسية……أفكر اتركها لين موعد الزواج لان صرحتاً لازم انسها شوي ولا بتكمل على باقي حياتي