ايوة طبعاً حسنه و انا سيدك

مجتمع رجيم / النقاش العام

كتبت : سعادتى فى رضا ربى

السلام عليكم و رحمة الله و بركاته

إزي حضراتكم جميعاً
اتمنى يا رب تكونوا بخير

في موضوع يهمنى فيه رأيكم جداً بخصوص شوية امثله شريرة كنت بستخدمهم في محيط اسرتي و بيني و بين الصديقات المقربات على سبيل الدعابه
زي مثلاً

الغاوي ينقط بطايقته
....
اللى عاجبه على الكحل يتكحل
....
ان كان لك عند ( البوبى ) حاجه قول له يا سيدي
.....
لجل الورد ينسقي العليق
.....
و اخيراً حسنه و انا سيدك

يا خبر .. ياااااااا خبر...ياااااااااااااخبر

ايه اللى انا بقوله ده ؟؟!!؟؟؟؟
الحقيقه مأخدتش بالى خالص من الموضوع ده قبل كده
اللا لمّا لاقيت الناس واخدينها جد قوى و بينفذوا الأمثله الشريرة دي فعلاً
و بيعلموها لولادهم و ماشيين عليها كانها استغفر الله العظيم منزله
الكارثه بقى ان الإيمان بهذه الأمثله تسلل لساحة العمل الخيري في وقت من الأوقات و طبعاً الموضوع ده انا حاسه بيه من سنيين بس مكنتش فاهمه ليه او مش مجمعه
كنت الاقي مثلاً ان التاكسي اللى بتفق معاه على فلوس عشان ينقل حاجه من متبرع لجمعيه خيريه بيجي في موعده نوعاً ما
امّا التاكسي الوحيد اللى جالنا تطوع كنّا متفقين معاه على الساعه 8 صباحاً
و جاء لنا 10 صباحاً و هو مش شايف اصلاً انه عمل حاجه غلط و لا حتى اننا نستاهل منه رنه على الموبايل عشان يعتذر عن التأخير و رد رد ما معناه كتير خير الدنيا انى جيت و انتوا المفروض اللى محتاجيينني انتوا اللى تستنونى
ببساطه يعني كان فاضل يقول لنا هي حسنه و انا سيدك
ايوة طبعاً حسنه و انا سيدك
و اللا المهزله الحقيقيه لمّا طلعنا برده رحله لمدينة الأسكندريه و كانت المره الوحيده برده اللى وافقت فيها على فكرة ان الأتوبيس يجي لنا مجاناً عشان نوفر تكلفة النقل و الأطفال يستمتعوا بالأكل في مطعم شيك و بلاج نظيف و طبعاً رضخنا لإختيار الأستاذ صاحب شركة النقل و انتظرنا لليوم اللى هو اختاره عشان يكون اليوم اللى فاضي عنده خالص و مفيهوش شغل عشان منخسرهوش
و طبعاً جاء الأتوبيس متأخراً عن موعده بدل 7.30و جاء 9.30 برده من غير ادنى اعتذار وعلى ما الأطفال ركبوا و وصلنا البلاج في الاسكندريه الساعه 12 الظهر و بعدين خير اللهم اجلعه خير الساعه 3 العصر لاقينا اتصال من صاحب الأتوبيس بيدّعى انه فاكر اننا في الطريق من ساعه فاتت و شايف اننا اخذنا وقت كتير قوى
و بيتهيأ لى اننا لو وقفنا ال50 طفل اللى كانوا معانا على البلاج و شممناهم هواء البحر لمدة دقيقه و بليناهم شويه مايه لمدة دقيقه كمان عشان نثبت لهم اننا زرنا الأسكندريه برده مش حنلحق نكون الساعه 3 في الطريق و طبعاً احنا كان اتفاقنا اساساً في حالة اننا نطلع من القاهرة 7.30 او 8 صباحاً اننا نمشي من هناك
الساعه 5 المغرب و الحمد لله نفذت طبعاً الإتفاق القديم و اخذنا كمان بدل الساعه و نصف اللى اتأخرهم لكن هو كان عايز يستعبطنا و يوهمنا اننا احنا اللى غلطانين في الأول ليه عشان
كل الموضوع ان الأستاذ جاء له شغل على الأتوبيس رحله لشرم الشيخ الساعه 8 مساءً و محتاج على الأقل 3 ساعات يجهز فيهم الأتوبيس و قال يرجع في الخير اللى طلعه لله الفلوس اهم ..الخ الحدوته
يعني من الآخر كان عايز يقول لنا هي حسنه و انا سيدك
ايوة طبعاً حسنه و انا سيدك
و اخيراً و ليس آخراً لمّا احد المدامات الفاضلات قررت تطلع اكل لله و اتصلت بينا عشان نكون حمامة السلام بينها و بين دار من دور الأيتام المستحقه جداً و اشترطت علينا احتياج الأطفال للأكل جداً جداً جداً و في الآخر طلعت بواقي البواقي المركونه البايته في بيتها زي الخضار و الأرز و السلطه الباقيين من عزومه كان فيها لحوم و طبعاً اللحوم اتاكلت و الحاجات دي اتخزنت عندها يوم يومين تلاته مفيش امل لمّا باظت
فقالت مترميهاش في الزباله و تاخد بيهم ثواب احسن
و لمّا نصحتها و مرضيتش اتدخل لها في هذا الأمر لأن الطعام كان فاسد فعلاً
راحت من ورايا و النتيجه 220 طفل اتعرضوا لأعراض متفاوته للتسمم و الحمد لله ربنا انقذهم
و طبعاً هي ايامها كانت شايفه ان اللى بنتكلم فيه ده غباء
هو يعني حسنه و انا سيدك ؟!؟
ايوة طبعاً حسنه و انا سيدك
الحقيقه انا بحكي لكم حواديت دي من ارشيف ذكرياتى الخيريه يعني الحمد لله بقالى سنتين و نصف على الأقل لم اتعرض لمثل هذه المواقف نهائي و هذا لسببين
اولهم ان الحمد لله الوعي زاد للعمل الخيري و اصبح المتطوعين غايه في الجمال يعني بيقدموا الأحسن و الأطيب و الأفضل و الأروع و الأكثر لأنهم عارفين ان هذا العطاء يوضع اولاً في يد الله
و السبب التاني ان الناس الوحشين الحقيقه علموني استخدم بقوة المثل القائل
هين قرشك و لا تهين نفسك فبيقت بتجنب المواقف
اللى ممكن تجمعنى بيهم تاني لا قدر الله
بس برده لأننا كتير فمش معنى انى معنتش بقابلهم انهم خلاص مبقالهمش وجود
فى لسه ناس بيتعاملوا مع الآخرين في الحياة بنديه مؤلمه في العطاء الحقيقه مش بس في عمل الخير و لكن على الصعيد الإنسانى
يعني فلان بيرن على محمولى عشان عايز خدمه كبيرة منى خلاص بقى شئ متعارف عليه ان لازم فلان اللى عنده ازمه و محتاج الخدمه هو اللى يتصل بيّا و هو اللى يغرم المكالمه مش كفايه حخدمه .. ايوة بنقول كده لنفسنا و اللا لأ ؟؟؟؟
طيب ما نبتدي الخدمه مثلاً بإننا نوفرعليه مكالمة موبايل حتى لو كان قريبنا او زميلنا
مش شحات و لا عابر سبيل و لا لابس هدوم مقطعه
صدقوني الخير برده يجوز عليه و لو كان الواحد نيته لله حياخد ثواب المعامله الكويسه اضعف الإيمان مش حياخد ذنب يعني لو قفل الموبايل و ابتدى هو بالإتصال حتى عشان يشيل من قلب طالب الخدمه رهبة زل السؤال
و ربنا بجد يا رب ما يحوج حد لده
و الاقي فلانه بتقول لمامتها اصل صاحبتى عندها امتحان بكره و عايزه الآله الحاسبه بتاعتى عشان كده حتجي لى كمان نصف ساعه تاخدها او فلانه عايزه ورق الدرس و كانت عايزه تقابلنى في مكان بس انا قلت لها تعالى خديه من البيت حنزلهولك في السبت او اسيبه مع امن العماره
هو يعني لازم لحد باب البيت ؟؟.. تصوري بقى انك تطلبى من والدك او اخوكي لو ظروفك تسمح انهم يوصولكى لغاية بيت البنت و تندهي عليها من تحت الشباك مثلاً و تطلبى منها تاخد ورق الدرس .. متخافيش مش حيوصفوكي بالجنون انك روحتى لغاية بيتها رغم انها هي اللى محتجالك
ده الرسول صلى الله عليه و سلّم قال ( كان الله في عون العبد ما دام العبد في عون اخيه ) الدنيا بجد رحله قصيرة مش عارفه ماسكين فيها المتر و ماشيين نقيص خطواتنا في الخير ليه
ده احنا محتاجين نتقي الله على اد ما نقدر عشان لمّا نقابله يكون في حاجه واحده عدله في الصفحه بتاعتنا
و انا مش الشيخه منار و ربنا عارف انى زيكم و اقل منكم و ناس كتير يعرفوني انى لسه بتعلم لسه بحاول لسه بحبى في طريق الله
انا بس لاقيت الموضوع اللى بكلمكم فيه النهارده ده سهل و قلت خسارة نزعل مننا ربنا اد كده
او للدقه نزعل ربنا علينا اد كده لأنه قال في كتابه العزيز ( ان احسنتم احسنتم لأنفسكم و ان اسأتم فلها ) فالله غنى عن كل ما نقدمه
يعني لو رجعنا بقى للموضوع نفسه
حسنه و انا سيدك حنلاقيها كده فعلاً الناس الى بيطلبوا مننا المساعده دول باللغه الدارجه المتعارف عليها شعبياً ( اسيادنا و تاج راسنا ) وعشان محدش بس يقول لى اللفظه دي حرام و لا سيد اللا الله انا اقصد المضمون المعنوي و ليس اللفظي و طبعاً خجلانه من نفسي انى مش لاقيه كلمات بديله
المهم تخيل انت واحد يطلب منك مساعده عشان تقدمها له يقوم ربنا سبحانه و تعالى يديك ثواب و كمان يعوضك كل اللى انت اديته ليه لأنك لمّا اديته كنت بس مؤتمن على اللى اديتهوله لكن في الحقيقه انت منحته من عطاء الله يعني مش من جيبك
و اخذت تمن التوصيله بس جنه عرضها السماوات و الأرض
و محبة الله و ملائكته و العباد
فكروا في الموضوع و حاولوا تدوني رايكم
اشكركم
اللهم اجلعنى خيراً مما يظنون و اغفر لى ما لا يعلمون و ارحمنى يوم يبعثون
اتمنى لكم الخير
عجبنى فنقلته لكم

كتبت : jannah1

اختي سعادتي في رضى ربي
كلامك في محله جدا
كلنا عباد الله وفقراء اليه سبحانه
وكل خير او رزق هو من فضل الله عز وجل علينا
وما نحن الا امناء وقتين عليه
والله من محبته لينا يجعل لنا اسباب للمساعده والصدقه
حتى تحسب لينا حسنات في الموازين
ولازم لما نقدم اي اي خير او عمل خير نحسن النيه لله
ومدام هذا العمل لوجه الله لازم نعمله على احسن وجه وحال
يعني من انا اقدم صدقه وبفكر في وجبة غداء
خليني افكر ان تكون الوجبه هذه مناسبه لكي اكلها انا
يعني لا اقلل من مستوى الصدقه
بل اقدم افضل ما عندي
واشكرك يااختي موضوع مميز ومفيد واتمنى الكل يقراءه
جعله الله في ميزان اعملك
ورزقكي من الخير احسنه

كتبت : طبعي ذبح غيري

مــــــــوضوعك حلو والله ماني عارفه إيش أقولك

ننتظر جديدك حبيبتي ............

كتبت : سعادتى فى رضا ربى

شكرا ام تاره وطبعى ذبح غيرى على مشاركتكم وردودكم الجميله
الف شكر

كتبت : بحر الجود

مووووووووووضوووع رائع..
أشكرك على هذا الموضوع الراااااائع ..
يعطيك ألف عافية...
الله يحميك ويحفظك من كل شر ..
والله لا يحرمنا من مواضيعك الحلوة

كتبت : فرفوووشه

سلمت يمينك حبيبتي سعادتي وهذه الامثلة موجوده وكما لو ان الرزق بيدنا ونحن من نجلبه

الصفحات 1 2

مواضيع مميزة قد تهمك

صنادل شييك شوزات وصنادل هاى هيلز روعه 2013

بلح الشام يممممممممممممممم ... بالصور طبعاً