إيدي بإيدك رح ننزل ال 10 كيلو إن شاء الله

مجتمع رجيم / أرشيف رجيم

كتبت : فووفوو

السلام عليكم يا شلة العسل ..
وحشتنوني كلكم والله ..معلش سامحوني عالغيبة .. كده بقالي يومين بقرا في ردودكم عشان أعرف أرد عليكم ..مش عارفة الصراحة اليوم بقي يخلص بسرعة كده ليه ..الواحد عايز يوم يكون 72 ساعة عشان يلحق يخلص اللي هوه عايزه .. بس ساعتها بقه هناكل يجي 10 مرات على الأقل في اليوم ده غير السناكات هههههه
مش عارفة يابنات ايه اللي جرالي من بعد الرشيقة المثالية ووسام الخاسرة الأولى للوزن وانا مش عارفه احترم نفسي تاني .. وسيبت نفسي 4 أيام .. فكرتين يا زهووووورة باللي عملته لما بتقولي مكنش يوم تخبيص وخلاص كانو 4 .. والأسوأ من كده ان يوم التخبيص العالمي افتريت فيه فى الرياضه لدرجة اني تعبت مفاصلي زياده عن اللزوم ومبقيتش قادرة حتى أمشي .. لكن الحمد لله امبارح رجعت تاني امشي بس مش عارفة ليه كان في صعوبة برضه في المشي ..ومشيت على مهلى.. يالا معلش قلت لحد ما المفاصل تلين تاني .. الحمدلله على كل شئ
أنا غالبا كده مش هخبص يوم 20 ولازم أحترم نفسي شوية ومن يوم السبت ان شاء الله هبدأ رجيم الكربوهيدرات للي يحبو يبدأو معايا .. وده اللي بدأته أول ماعملت رجيم ..
مبروووووك وسام الحفظ المميز لميـــــــــــرنا .. أم البنات ..أنسيتم الجنة .. وعقبال ختم القرآن..
وشكرا لكل اللي باركولي لنزول الوزن وللفوز في المسابقة وعقبالكم كلكم تفوزوا في المسابقة الجديدة والكل يوصل للي هوه عايزه

ميــــــــــرنا .. حبيبة قلبي .. يا صاحبة الموضوع الجميل واللي بحسك جمعتي أحلى الوردات .. طبعا مش عايزين يأس ولازم نكمل المشوار للأخر حتى ولو الطريق صعب وبتقابلنا كبوات أكيد ربنا هيفرحنا في الأخر ونحصد ثمرة تعبنا .. وان شاء الله ميزانك يتحرك انتي وكل اللى وزنهم ثبت .. والحمدلله انك شوفتي موضوع التسجيل للمسابقة التالتة انا كنت ناوية انبه البنات له وجزاك الله كل خير .. لكن ده ميمنعش ان موضوعك ده يظل متميز واحنا هنا على اتفاقنا برضه نوزن كل 10 ايام + تخبيصة ( تخبيصة واحدة بس الكلام ده لي أنا اول واحده ) لأن فعلا زيادة التخبيص وقلة الرياضة بتجيب إحباط والإحباط بيزود التخبيص وكده مش هنخلص ..
بس يا ميرنا أنا كان ليه طلب عندك .. هوه يمكن هيتعبك شوية بس ربنا يقدرك عليه .. أنا شايفة ان كتير مننا حماسهم قل عن الأول .. و المشاركات مبقتش برضه زي الأول .. وعشان نصحصح النايمين .. ونوقف المخبصين عند حدهم تعمليلنا شارت جديد زي الأول لفتره زمنية محددة ولتكن شهر زمن المسابقة وكل واحده تكتب هيه عايزة تنزل أد ايه وتحاول تلتزم بيه ..تمام زي الشارت الأولاني ..انا واحده من الناس كنت حاطه الشارت ده عالديسك توب وكل يوم افتحه وافكر نفسي انا عايزه انزل أد ايه .. معلش أنا عارفه اننا بنحملك عبء لكن نعمل ايه بقه انتي عودتينا عالدلع ولك اسلوبك الخاص اللي بيخلينا نلتزم ونتحمس .. ولو في أي مساعدة نقدر نعملها قوليلنا مش هنتأخر وربنا يقدرك و يقدرنا ونكون أد المسئوليه ..
آه بالحق .. قوليلي ايه الفريز ده ؟ قصدك الكرز؟؟ والكتان المطحون ياترى طعمه ايه ؟ أنا جربته قبل كده حب مش مطحون على السلطة الخضراء وكنت لما أمغضغه أتضايق من طعمه فبقيت أحطه عالزبادي وأزلطه ههههههه بس بطلت استعمله من زمان ..أكيد مفعوله وهوه مطحون أكتر منه وهوه حبوب .. بس طعمه بقه ايه ؟؟ آه بيرو بتسلم عليكي كتير وعلى كل الوردات ..

ام البنات .. كل سنة وبنتك الأمورة طيبة وربنا يسعدك انتي والعائلة يارب .. ويارب وزنك يتحرك .. يالا بعد عيد الميلاد عايزين الهمه ترجع أقوى من الأول والعزم حديد

سكوووون .. رجيمك هايل وان شاء الله هيجيب نتيجه لأني حاسة انه قاسي حبتين الله يعينك عليه وان شاء الله الميزان اللي قعد شهر ميتتعتعش ينزل وتبشرينا بالنزول .. ياترى ايه هيه مفاجأتك الحلوه؟ شوقتينا

كريستالة .. سلام خاص للقمر ومتزعلش يا جميل مننا منقدرش على زعلك .. وحمدلله على سلامتك ومتغيبيش تاني .. وان شاء الله ال 8 كيلو اللى نفسك فيهم ينزلوا بس همتك معانا .. بقولك ايه متسيبيش نفسك تجوعي كده لحسن الجوع بيجيب نتيجة عكسية ويخلي الواحد يهاجم أي حاجة قدامه .. عن تجربة ههههههه خلوا بالكم من كابتن فوفو ممكن لما يجوع ياكل أي حد ههههههه

بلوووووروووووز .. أنا آسفه حبيبة قلبي اني اتأخرت عليكم .. انا فعلا كان لازم أدخل أسلم على الأقل حتى لو مكنتش فاضيه ..وان شاء الله هعمل كده من هنا ورايح حتى لو مفضيتش أرد عليكم بس تعذروني ساعتها ..لكن مش هختفي تاني بإذن الله

دمعة أسى .. حمدلله على سلامتك ..ها استأنفتي الرياضة والا لسه .. مبروووك الكيلو وعايزين نزول أكتر شوية .. شدي حيلك ده انتي لسه في الأول وفرصة النزول بتكون أفضل

حلم الماضي .. مبروك الكيلو .. ايه انتو متفقين على كيلو انتي واختك .. نظامك حلو ومعقول جدا .. رجيم بدون حرمان مع تحديد الكميات .. ربنا يقدرك عليه .. ويقوي عزيمتك ..

ندى الأيام .. سلامة ضهرك يا قمر .. ومعلش كيلو برضه أحسن من مفيش .. وان شاء الله على يوم 20 يكون النزول أكتر ..

زهووووووورة .. خلااااااااص خلااااااااااااص .. أنا جيت ..وقفي تخبيص بقه .. أنا كمان لما غبت خبصت زيك 4 أيام وجالي احباط مبرووووووك الكيلو .. وشكرا على مجاملتك الرقيقة واحتفالك بي .. ها أخبار الألتزام ايه ؟؟ بجد عايزين ناخد عهد على نفسنا .. ده انا كل مافتكر ان انا وانتي أصحاب فكرة الألتزام كل 10 أيام دي وميرنا صاحبة التنفيذ ...بزعل أوي لما ألاقي اننا مكناش أد كلمتنا .. يالا بجد بجد بقه مفروض نلتزم ومنتحججش تاني .. مش كده يا دوك يا صغنن .. على فكره مش وحش 2 كيلو في 3 أسابيع ..ومبوظتيش قوي يوم ماكلتي موزايه والا بيض مقلى .. طالما بتحسبي سعرات .. متأنبيش نفسك قوي كده لأن تأنيب الضمير بزيادة عن اللزوم بيخلى الواحد يستعبط فيها ويقول ماهي خربانة خربانة..

السنيورا .. ايه الشعر الجميل ده ..أنا مقدرش على كده .. وانتي كمان وحشتيني موووووووت I miss u 2 .. حلو رجيم السعرات بتاعك ده ربنا يقدرك عليه .. خلاص انا مش هختفي تاني ..هدخل كل يوم حتى ولو سلمت في السريع بس متزعلوش مني..ماشي يا قمر؟

أنسيتم الجنة ..واحنا كمان اشتقنالك .. يارب يكون الإحباط راح وتكون نفسيتك أحسن دلوقت .. أخبار الوزن ايه فرحينا والا على يوم 20 .. مفيش مشكلة واعملى زي ما ميرنا قالتلك فعلا طريقة 100 % لهدوء النفس ورفع الروح المعنوية .. جزاك الله كل خير يا ميرنا
وحطيلنا كده كام مشاركة من مطبخك الجميل .. انا كنت عايزة أعرف شوية وصفات لصلصات خفيفة تنفع مع الرجيم يعني صوص كده يتاخد مع الدجاج .. أو الرز .. بس ياريت ميكونش فيه دسم خالص .. ياريت لو تقدري تساعديني .. جزاك الله كل خير .. ومتغيبيش عننا كتير كده ..أنا شايفة مشاركاتك قلت عن الأول .. زيي كده .. صدقيني البعد عن المنتدى هوه اللى بيجيب احباط ..دي حقيقة اكتشفتها ..

ليلى .. وانت كمان وحشتينا قووووي .. ألف سلامة على الوالد .. وألف سلامة على ابنك وعليكي .. طمنينا عليكي .. ويالا نرجع نشجع بعض ونبطل لخابيط ..

لولوش.. الله يسلمك يا قمر .. معلش النزول البطئ هتبان نتيجته أكيد يوما ما .. وهتبان مرة واحده زي ماسمعت من البعض بس انتي متيأسيش .. على فكرة وزننا متقارب وهدفنا واحد .. انا هبدأرجيم الكربوهيدرات من السبت بإذن الله.. تبدأي معايا ؟

الابندا .. يا سكر .. شكرا على التورتة .. بس دي اسفنجية صح كده ؟ عشان لاحظت ان مفيهاش دسم خالص 100% .. وتسلم ايدك يا جميل ..

ايمي .. فينك يا جميل ؟؟ مبرووووووك الكيلو .. طمنينا عليكي ..

طيف الغلا ؟؟ فينك يا قمر مختفيه ليه ؟ طمنينا عليكي ..

فتحية .. ازيك .. اخبار الرجيم معاكي ايه ؟ فينك من مدة مش مبينة .. متغيبيش عننا كتير كده

أهلا بكل الوردات الجداد وعلى رأسهم

خديجة فارسي .. حمدلله على سلامتك وسلامة ضهرك .. متيأسيش ونظامك حلو مع الرياضة .. بس خلى بالك برضه عشان ضهرك .. متجهديش نفسك في الرياضة خليها بالتدريج

العيون .. جوجو .. ام محمد .. الحزينة .. دائرة القمر ( الله معاك .. ربنا يقوي عزيمتك ياااااااارب ويعينك ) يويو6600 thalia فينك ؟ مينفعش مشاركة واحدة ,,ماقولتي وزنك كام ؟؟ ولا طولك كام؟؟ .. بخور مريم .. برضه فينك ؟؟ برضه مينفعش مشاركه واحده ..

سونا ..متأخرتيش ولا حاجة .. نور 14 الله يبارك فيكم وعقبالكم ..

يالا يا بنات سجلوا في المسابقة الجدية والرابط ميرنا حطيتهلكم في صفحة 179 وآخر ميعاد للتسجيل يوم 19 / 4

إلى لقاء قريب بإذن الله