مجتمع رجيمتجارب الرجيم الناجحة

قصة وصول للوزن المثالى

الصراحة 12:46 PM 05-07-2013


حبيباتى عضوات منتدانا الغالى
وجدت ه>ه التجربة المفيدة و الرائعة
أحببت كما أثرت في و أعجبتنى
أيما إعجاب
أن أنقلها لكم
البدايه
الصراحه انا من يوم ماصار عمري 6 سنوات وانا وزني يزيد يعني عندي سمنه من الطفوله

تختوخه بمعنى اصح

كل ما اكبر سنه ازيد في الوزن الى ان وصلت المرحله الخامس ابتدائي رحت الى احد المولات

واقيس وزني بجهاز وزن تضعي فيه ريال يطلع لك وزنك صراحه تفاجئت كان وزني وقتها 55 كيلو

طفله ماتجاوزت 11 سنه وزني كذا وبديت اكبر ووزني يزيد ووصلت المرحله المتوسطه وكان وزني
في الثمانينات
يتذبذب من 80 الى 87

وكنت اجرب ريجيم واترك ريجيم مافيه ريجيم ماجربته لين ماوصلت عمر25 سنه ووزني وصل

110
تخيلوا وانا ماعندي طول طولي مايتعدى 155 صراحه كان شكلي بالونه منفوخه جدا بشع الحمد الله

على الصحه

بس كنت مستاءه من جسمي الفتره الأخيره الي وصلت هاالوزن ماصرت اطلع ولا اقابل اي ضيوف

يجونا ولا مناسبات ولا اعراس

معتزله كنت اروح دكاتره تغذيه اقعد معاهم شهر اثنين ثلاثه انقص 10 وارجعهم 15 واخر مره

نقصت 15 كيلو

وشكلي فعلا تغير كنت فرحانه بطير من الفرح كلهم قالوا لي تغيرتي والي تطلب ريجيمي والي تسأل

وش فطوري وغداي وووالخ

وكنت طايره نزلت من90 الى 75 بس كانت شكلي انحف بكثير كنت امشي كثير بعدين تركت الدايت

وبظروف خاصه مريت فيها زدت

خلال سنه حوالي 30 كيلو وكأنك يابو زيد ماغزيت

وبدت الحرب النفسيه كنت معشعشه هنا في قسم السمنه والنحافه مابقى ريجيم ماجربته تمر ولبن

عصيرات زبادي وبرتقال 5 في 5

عدوا واغلطوا صرت حقل تجارب انقص 2 ارجعهم اربعه انقص في شهر 10 ارجعهم 15 عيبي ما

استمر ادور الحلول السريعه

لي عوده وللحديث بقيه في مراحلي الفاشله في حياتي والي تعلمت منها والضربه الي ماتقتلك تقويك

ومو مهم نفشل ونطيح والمفروض نجرب بدل المره الف ومليون ونوقف بعد كل طيحه لأن نتعلم من

اخطائنا ولو مافشلنا ماراح نعرف

طعم ولا قيمه النجاح

في جزئي المقبل راح تقرون

مراحل الفشل الاستسلام جر اذيال الخيبه اليأس الأحباط التخبط في اورقه الحميات كلها راح تقرونها



انتظروني


تخبطات في عالم الحميه

نعم لم الاقي انسب من هذا العنوان تخبط كنت في مرحله تخبط مثل الغريق الذي يبحث عن طوق النجاه

اسمع عن كريم اروح اخذه اسمع عن دواء اجيبه ضيعت فلوسي في ادويه التخسيس وبرامج الحميات



ودكاتره التغذيه مابقى دكتور مارحته


كتب ريجيمات من المكتبه اشتريت اوراق ريجيمات مطبوعه مقالات في النت عن التغذيه بصراحه

وبدون غرور صرت موسوعه في التغذيه وش ينزل الوزن وش يثبت الوزن وش افضل رياضه

صرت ازور اخصائيه التغذيه وانا عارفهه كل كلمه بتقولها صار عندي المام بكل الاكل وسعراته وش



ينحف
دكاتره التغذيه في


منطقتي اغلبهم زرتهم كلهم شافوا وجهي الكريم رحت واشتركت في نوادي رياضيه ماكمل حتى

شهر اكمل الريجيم اجيبه كل اسبوع من السوبر ماركت تنتهي صلاحيه الزبادي والدجاج الله يسامحني


ولا يعاقبني ووووو وانا باقي ما استخدمته والعباره الشهيره ببدء السبت لمن يشوفوني اهلي اكل

يقولوا لي يلا ريجيم اقول لا بكره


مر سبت وسبت وسبت ومازلت على ما انا عليه ويمكن زدت اكثر


وذا بكره ببدء ريجيم تشوفوا حاله استنفار في البيت كل شي اكل قبل يوم الريجيم كأن الأكل بيخلص

ولا يضيع علي


اكل اقول عشان بكره ما اشتهي شي اجرمت في حق نفسي كثير جسمي تدمر من الحميات العشوائيه



جبت سير واوربتراك كنت


احط اللوم على اخصائيين التغذيه الي اروح لهم كنت اقول هذا ماينفع وهذا ريجيمه معقد وهذا يبغى

طبخ وووو اعذار وحجج
واهيه كنت ما انحرق الا في الاعياد ولا لو فيه زواج احوس في السوق ما القى مقاسي لو ماحصلت


شي

بايخ يعني مو انا الي اختار اللبس هو الي يختارني انتي سمينه ماينفع لك الا هذا كنت اكره نفسي في

اليوم الف مررره وانام ودموعي على خدي احلى ايام عمري فتره المراهقه وبدايه العشرينات ماعشته

ا مالبست ولا تهنيت كنت اذا في مجلس وينذكر فيه طاري السمنه والريجيمات والحميات اذوب مكاني


ودي انهم يقفلوا الموضوع انحرج واحس اني انا المقصوده في الحكي وطبعا حتى تعليقات الأطفال

ماسلمت منها كنت مجروحه كل شي متوفر اقدر اسوي ريجيم اهلي الله يعطيهم العافيه ماهم مقصرين

بشي يتمنوا اليوم قبل بكره اني انحف امي ودها اني انحف

تعدد لي البنات الي بعمري شوفي فلانه وفلانه كيف في سنك وكيف اجسامهم كنت اتحسر واعزم

واقول بكره البدايه ويجي بكره ولو

فيني خير وكملت اسبوع او اثنين وبعدين اهجم على الأكل كأني ما اعرفه ومرت السنوات الى ان
وصل عمري 25 عام


قررت



الجمعه 18/10/1431
يوم مميز
يوم مصيري يوم غير مجرى حياتي يوم يختلف عن باقي كل ايام السنه

ما دري ليه هاليوم بالذات يمكن لان خارجين من عيد وكنت طول رمضان وانا ادور السوق وما القى

شي يناسبني

اخر شي رحت اشتري من المقاسات الكبيره

ويمكن لأني قلت خلاص الين متى وانا كذا متى راح اتغير لين متى وانا حبيسه جسم سمين

لين متى وانا اندس واستحي اقابل الناس الين متى وانا حابسه نفسي في البيت اسئله كثيره خلتني اقرر

هذا اليوم نقطه تحول في حياتي

اخذت وزني لقيته 108.4

اشتريت ميزان دقيق يحسب دهون جسمي وكتلته كانت كتله جسمي تقريبا 45يعني اصنف من الناس

البدناء جدا
والدهون فيه56 يعني تقريبا نصف وزني دهون

,ويمكن عشان انا كان نفسي انحف بس عشان اللبس والشكل وووو عمري مافكرت بصحتي كنت وانا

سمينه اتعب من اي مجهود اقوم فيه ماقدر امشي في الأسواق كثير نفسي ضيق الام اسفل الظهراصلي

وانا جالسه صعوبه في التنفس


وغير الدوره المخربطه الي ماتجي بمواعيد رحت عند دكتوره قالت لي نزلي وزنك


اي مرض كنت اشتكي منه ازور الدكتور يقولي انحفي انحفي انحفي


اتخذت الخطوه الحاسمه في حياتي


كل سنه وكل رمضان وانا اقول بأذن الله هالسنه غير راح يكون رمضان الجاي وانا نحيفه

كان كل شي يتوفر لي بس كان اهم شي يلزمني بدونه ماكنت اقدر اسوي اي شي

اكيد عرفتوه اساس نجاح اي شي في الحياه مو بس الحميه



يتبــــــــــــــــــــــــــــــع
الصراحة 12:49 PM 05-07-2013
الإرادة

عدنا
المره الماضيه تكلمت عن شي مهم وقلت انه اساس كل شي في الحياه وعلى قائمته الحميه

شي لو كان مو متوفر عندنا ماراح نقدر نخطي اي خطوه قدام

وهالشي مايجي بين يوم وليله هي قناعات وانتي تحفزي نفسك وتتعلميه شوي شوي

تسقيه مثل الزرع


ترى مو كل شي ينصب ويندرج تحت مسمى اراده مره قريت للدكتور فيل الأراده ماهي ميه بالميه

عليك

كمان المحيط الي انتي عايشه فيه لازم يخدمك ويساعدك

يعني فضي ثلاجتك واكلك من الأكل الي ممكن تتهوري امامه شوكلت شيبسات


حاولي اذا انتي متزوجه ان زوجك مايجيب مغريات واكل مطاعم اذا شفتيهم حطوا الأكل لاتقعدي

تناظري وتقولي انا عندي اراده لا خطأ واكبر خطأ اول مره بتقاومي والثانيه والثالثه


بعدين راح تضعفي اول مايحطوا سفرتهم

روحي غرفتك او جيبي وجبتك الصحيه او انشغلي بأي شغله ثانيه الا انك تقعدي معاهم لاتضغطي

على نفسك
يعني مو كل شي يندرج تحت مسمى عزيمه واراده فيه عوامل خارجيه تساعدنا كيفي نفسك
على نظام معين رتبي وخططي لاتمشي من غير اهداف

ايه العزيمه والاراده كمان لها دور فعال انا ماكانت عندي او بالأحرى كانت عندي بس وقتيه مدتها

ماتقل عن يوم او تزيد عن شهر ابتديت من هالتاريخ تركت اوراق ريجيمي ودولابي المكدس والمليان

من اوراق مطبوعه ركنت ادويه وكريمات التنحيف نفظت الغبار عن جهاز المشي المسأله مو سحر

كريم او دواء بينحفني المسأله اراده وعزيمه فقط واستمرار استمرار استمرار حطوا على كلمه



استمرار الف خط

نفس اليوم صليت وبكيت بحرقه بحرقه والم وقهر على كل عمري الي فات وانا سمينه وقلت خلاص

ماراح اسمح لنفسي ادمرها اكثر من كذا جسمي ونفسي وصحتي لها علي حق كنت انسانه حساسه

مرره واتأثر من الكلام حتى اهلي مايفتحوا معاي سيره الريجيمات كثير



جلست مع نفسي جلسه مصارحه قلت لا اخصائيين تغذيه بينفعوني ولا نوادي ولا حبوب

محد بينفعني اذا انا مانفعت نفسي لايغير الله قوم حتى يغيروا ما بأنفسهم

سنين وانا اجري من حميه لحميه ومن نادي لنادي ومن دكتور لدكتور وبعدين ؟ والنهايه وش الحل كل

الحلول فشلت

كنت احس اني يائسه ومحطمه

وماراح احد يساعدني اذا انا ماساعدت نفسي

في الحياه لايوجد اهداف من دون سعي مقوله جميله استوقفتني كثيرا

يعني اتوكل على الله مع الأخذ بالاسباب مو اقول يارب نحفني وانا اكل شيبسات ووجبات وشوكليت

ولا اقول يارب انحف وانا كل يوم مطيحه عالحلا والبيتزا والمكرونات الله سبحانه وتعالى قالنا نتوكل

عليه وندعي بس

نأخذ بالاسباب

والتسويف مو حل سوف اعمل ريجيم سوف امارس الرياضه سوف وسوف وسوف

ولي في هذا الحديث النبوي عبره جدا رائع من سنه نبينا وحبيبنا محمد عليه الصلاه والسلام

ما ملأ ابن آدم وعاءً شراً من بطنه.بحسب ابن آدم لقيمات يقمن صلبه،فإن كان لا بد فاعلاً فثلث لطعامه وثلث لشرابه وثلث لنفسه
قلت انا مو احسن منهم انا اجرمت في حق نفسي ووصلت نفسي لهالمرحله وانا الي راح اتعالج

شلت من بالي كلمه ريجيم وكان نظام حياه نمط معيشه صحي كنت قاعده بالبيت ماعندي شي اسويه
قلت خلاص انا راح اسوي لنفسي خطه

لمده سنه وراح اشوف كم انزل

عملت لي جدول عندي على جهازي عالوورد وحطيت الشهور والوزن كنت كل 10 ايام اقيس وزني

واقيس بالمتر محيط خصري

وحطيت لي هدف واقعي كنت اتمنى انزل من 4 الى 5 كيلو في الشهر

حميتي لا من نت ولا من كتاب ولا من دكتور

انا صممت حميتي بنفسي

نظام صحي وش يعني نظام صحي



يعني متوفره فيه كل العناصر الغذائيه بروتين نشويات فيتامنات خضار فواكه دهون كل شي وفرته

بنوعيه وكميه معينه

الفتره الي سويت فيها ريجيم طوووويله شهووور سنه كامله

كان بيني وبين وزني المثالي تقريبا 50 كيلو يعني مستحيل اتقيد بورقه او ريجيم معين

عالجت اسباب فشلي في المرا ت الاولى

وش الاشياء الي ماخلتني استمر في الدايت

عالجت موضوعي من جذوره عرفت اصل المشكله وين

قلت انا ليه كل ما ابدء ريجيم اخربه

لخصته في نقاط
تابعوني في جزئي المقبل وراح تشوفون اسباب فشلي في حمياتي السايقه ونجاحي وانتصاري في هذه
المره

عدنا
فشل......... يعقبه نجاح

كنت في المره السابقه قلت لكم راح اتكلم عن اسباب فشلي ونجاحي وراح الخصها في نقاط

اسباب الفشل في حمياتي السابقه
1 الريجيمات الحرفيه الي مكتوبه في ورقه
2 الريجيمات القاسيه
3 وضع هدف خيالي في نزول الوزن 15 كيلو في الشهر مثلا
4 اكل اشياء ما احبها واكون مغصوبه بزعم انها تنفع للدايت
5 رياضه عنيفه اكثر من طاقتي وحمل وزني لأني من ذوي السمنه المفرطه
6 الحرمان




الحرمان .. فقط وقت ضايعاخره خساره في كل شي إلا الوزن..
مقوله اختنا العزيزه سول او طيفي فعلا شعار الحميه الناجحه


7 النحف عشان ملكه فلانه او زواره فلانه او زواج اختي او عشان العيد او او او او
لا اخفي عليكم يابنات ادخل المنتدى في رمضان وخصوصا اخر ايام اشوف قسم السمنه والنحافه يعج بالمستغيثين معلن حاله طواؤئ الكل يبغى ينحف قبل العيد بأسبوع بالله بالمنطق والعقل احد ينحف في اسبوع
يعني ضاقت عليكي شهور السنه كلها ومالقيتي تحشري نفسك الا في هالاسبوع او العشره ايام واشوف ارقام خياليه الي تبغى تنحف 5 و7 و10 بس للعيد وطيب وبعدين وبعد العيد وش راح تسوين؟؟
كنت اشوف المواضيع واضحك واتذكر وضعي زمان كنت مثل البنات اذا قرب العيد ادور معجزه الاهيه تنقذني لكن هيهات
طول شهوري وانا مارحمت نفسي في الاكل ومعطيه نفسي هواها هذا اقل جزاء لي اني اطلع بالعيد بمنظر بشع وسمين
اسباب نجاحي هذه المره
1 توقع اقل من النتايج الي احققها يعني 3 كيلو في الشهر حلوين

2توقع فتره من الفترات ثبات الوزن وعدم نزوله

3عدم استعجال النتايج والتغييرات في الجسم يعني مو في ظرف شهر الناس بيلاحظوا اني نحفت خصوصا اني انا كنت
من ذوي السمنه المفرطه
4 يوم مكافاءه كل 10 ايام لو اشتهيت اي شي وقت الحميه بعرف اني راح اكله في اليوم الفري
5 كتم سر الريجيم الا على اهلي فقط يعني ما اروح انشر اني راح اعمل ريجيم
عشان كل العيون تتابعني وتجيني من التحطيمات الي انا في غنى عنها
نحفتي مانحفتي نزلتي مابين فيك ووووو غيرها من التعليقات الي تسم البدن

6قليل دائم خير من كثير منقطع هذا المثل ينفع جدا للريجيم سواء في الرياضه او نزول الوزن
7 انتظر الناس يقولوا لي نحفتي بعد اسبوع او شهر او انتظر تغييرات في جسمي سحريه


هذا من سبب عدم استمراري وتحطيمي وارجع اكل اكثر من اول زمان كنت امسك دايت امسك اختي او اي احد بعد اسبوع اقولهم ها يلا قولوا نحفت ولا لا؟
يقولوا لا مثل ما انتي اتحطم اقيس لبس بعد اسبوع احسه مثل ماهو عليه واقول هذا وانا مسويه دايت
صرت ما اسأل احد انا نحفت ولا لا حتى لو ما لاحظوا اول شهر بما ان وزني كبير وال 5 كيلو ترى ماتفرق على الناس
في الشكل كثير انتي فقط تحسي نفسك خفيفه الناس مايبدئوا يلاحظوا الا اذا فقدتي من 15 كيلو او اكثر
طبعا انا اتكلم البنات الي اوزانهم 100 او اكثر

8 ابتعدت عن الميزان كليا ما اوزن الا في اليوم المحدد
هذي الأشياء الي خلتني افشل في حميتي وتجنبتها
صممت لي برنامج خاص فيني
كنت اكل كل شي بس بكميه ونوعيه
يعني الأشياء الي احبها اسويها اكل خضار مطبوخه بطريقه حلوه
رز مكرونه بكميات معينه من غير ولانقطه زيت
اكل بطاطس مسلوقه اكل حمص اكل بيض مافي شي ما اكله و بسوي
ايدامات
بس انا اطبخها بطريقه صحيه
كنت استمتع وانا اطبخ لنفسي كل يوم اكله جديده وبكميه معينه

حبي الدايت وتفنني في الأكل دلعي نفسك ايه دلعي نفسك اشتري لك اكواب حلو شكلها للشاي وللحليب
وصحون مقسمه سوي لك فطور ملكي صحي حسي انك ملكه لاتحسسي نفسك انك في مرحله عذاب و
حرب او انتصار او ربح ولا خساره لا عيشي حياتك عادي صدقيني هذا سبب من اسباب الاستمرار

اقنعي نفسك ان الريجيم لذه واكل الريجيم لو تفننتي فيه يطلع مرره حلو ومايفرق عن اكل المطاعم
والاكل العادي
انتهى وولى
زمن المسلوق والماصخ واكل المستشفيات لاطعم ولا لون صار اكل الدايت لذيذ جدا ووصفات الحميه تملأ الانترنت
فجري هواياتك في الطبخ حبي نفسك وثقي من قدراتك انك قادره توصلي لهدفك عاجلا او اجلا

كل يوم اكتب وش بفطر وش اتغدى وش اتعشى هذي الحركه مررره تفيد

لأن الواحد مايكثر اكل وكل يوم ودك تسوي انجاز ان بكره يصير اكلك اقل من اليوم الي قبله كنت



فرحانه ما استعجلت النتايج


ولا النزول السريع لأنه يحطمني قلت حتى لو انزل كيلو كل 10 ايام انا راضيه يعني 3 كيلو في الشهر

نزول ممتاز كنت لو بسوي ريجيم اول اهتم هالريجيم كم ينزل وانقص وارجع ازيد وقاعده ادور في

حلقه مفرغه اللحين 25 سنه سمينه ويوم جيت انحف احشر نفسي في مده محدده ليه ؟؟ وعادي





عندي ويوم ابغى انحف لازم انحف في ظرف شهرين او ثلاثه لا اكبر غلط يعني الدهون ماتخزنت بين
يوم وليله عشان تروح يبغى لها وقت
محد يركض وراي وكل شي تسوينه بتأني وعلى مهل
اعطيت نفسي سنه وانا ماشيه على نظامي
تأكدوا حرمان = فشل =ملل=عدم استمرار=رجوع للأكل اكثر من اول
قريت مقاله للعضوه طيفي الي نزلت ماشاء الله 75 كيلو من وزنها الحرمان اقصر طريق للفشل فعلا

مقولتها صادقه ميه بالميه
الانسان الذكي الي مايحرم نفسه من اي شغله بس مجرد تنظيم وجبات وكميات المسأله ابسط مما نتخيل

والله ثم والله ثم والله


بحكم تجربتي للريجيمات سنين وانا اتخبط من ريجيم لريجيم مافيه اسوء من الانظمه القاسيه سواء تمر


ولبن او كيميائي او سوائل او بروتين اوشوربه حارقه او صنف واحد او زبادي او او الخ مع احترامي


لأصحاب الحميات لأني جربتها تفرحك لحظات وترجعي تزيدي اكثر من اول مافيه مثل النظام


الصحي وتنظيم الوجبات والكميات اسلوب حياه هذي الريجيمات القاسيه كم راح نستمر عليها شهر


اثنين ثلاثه وبعدين رجعنا لعاداتنا في الاكل صدقنوني راح يزيد اكثر من الي انتم نزلتوا عليه شفت

تجارب ناجحه لهالحميات القاسيه ونحفوا قليل جدا جدا جدا للي قدروا يحافظوا وطريقه محافظتهم

امتناعهم عن الأكل يعني ياكلوا شي بسيط طول اليوم ببساطه عايشين في عذاب و حرمان تام حارمين

نفسهم من كل شي

ولو تركوا نفسهم على هواها يزيدوا كيلوات كثيررررره في فتره وجيزه

غير تساقط الشعر الفضيع وشحوب الوجه

وهالمره اقولكم التجربه خير برهان وخذوا الحكمه من افواه مو المجانين ولكن المجربين

وعلى قولتهم اسأل مجرب ولا تسأل حكيم

حميتي غيرت نمط حياتي كليا

اروح السوبر ماركت اخذ توست بر صامولي نخاله

اجبان قليله الدسم اسبريه الزيت الكانولا اطبخ فيه تلقونه في قسم الحميه في السوبر ماركات الكبيره
زبادي البان منزوعه الدسم حليب منزوع الدسم بسكوت دايجستف لايت تونه بالمويه فيليه وصدور دجاج كورن فلكس سكر دايت اشياء كثيره تنفع لنمط حياه صحي
عصيرات برتقال واناناس الي فلوسي كنت اضيعها في الشبسات والشوكلاتات والوجبات كل يوم اكل شكل عشان ما امل ولا اطفش كنت مرتاحه
ماتصدقوا قد ايه متعتي وانا اتجول في قسم الحميه في السوبر ماركت واخذ الأشياء المفيده والصحيه
عدلت نومي لأن السهر عدو الريجيم وانا نظامي اسمه نظام حياه مو ريجيم كنت كل 10 ايام اخذ وزني واخذ يوم فري
مكافاءه لي على مدى التزامي طول العشره الأيام الماضيه


سواء من مطعم او اكون معزومه او او او طول اليوم اكل الي احبه وهالطريقه تساعد ترى ان وزنك

مايثبت
كان يوم الميزان بمثابه الحافز لي ويوم جميل جدا احصد فيه ماجنيت طوال 9 ايام ماضيه ويتلخص في

رقم معين في الوزن
وارتحت مع هالنظام واحيان ترى تجيني لحظات ضعف اقول خلاص بترك ووقف بس اقوي نفسي

مجرد ساعات ويروح هالأحساس الحمد الله لك يارب


ترى يابنات مافيه شي يجي بالسهل انا نظامي كان صحي ومنوع بس بكميات بسيطه وكنت اجوع

واطفش وابكي
وتأكدي كل ماجعتي انك في الطريق الصح وراح تنحفي تراه جوع بسيط مو جوع قوي وهذا ما

اشعر فيه الا لمن اسهر عشان كذا اقولكم السهر عدو الريجيم بس مو الريجيمات الي كنت اول اسويها

اسمها ريجيمات انتحاريه ولا الريجيم الموحد زبادي طول اليوم فواكه طول اليوم جسم الانسان ذكي

اول شي يحرقه المويه السكر بعدين العضلات والبروتين اخر شي الدهون وهالريجيمات السريعه تنزل

مويه وعضل فقط مع نسبه ضئيله جدا من الدهون احيان

ووزني يثيت بس كنت احاول واحاول واحاول
كنت احيان اخبص بقطعه بيتزا او قطعه حلا او اخبص في غدا بس خلاص عادي اكمل يومي
الريجيمي عادي ولا كأن صار شي ما اتعشى او اكل زبادي وثاني يوم يكون اكلي خفيف جدا عن يوم
وامس الريجيم سلف ودين خبصتي في الغدا احذفي العشاء خربتي في العشاء خففي اكلك مره بكره
حاولي تسوي معادله وموازنه

زمان اوقات الفشل لو خبصت او خربت الريجيم اخرب طول اليوم واقول خلاص انا خبصت ببدءبكره

اكبر غلط نقع فيه
قلت ماراح ادخل 26سنه الا وانا نحيفه

صبرت وكافحت وتحملت واصريت وضعفت عند اكلات واجتماع الاهل كل اسبوع ضعفت عند الحلا
والسينابون والسمبوسه

ضعفت عند المكرونات والأندومي والشوكلاته ضعفت عند المعجنات والعشاء الجاهز بس كل ما
اضعف واحس اني بخرب

اجيب ورقه وقلم واكتب هالأكله راح اكلها في اليوم المفتوح حتى لو ما اكلتها هذي الحركه لاتستهينوا

فيها يابنات تساعد جدا انك
تلتزمي بالريجيم وانتي مرتاحه

وتقاومي الأكل

ايام اشتهي الأكل واطلع غرفتي وابكي بس خلاص لحد هنا ويكفي ضيعت حياتي وانا سمينه كنت اقول

لمن انحف راح اكلها وانا رشيقه ومو بمقدار ما كنت اكلها زمان راح اكل بحدود العقل والذوق وقريت

مقوله لأحد الاخوات هنا ان طعم اول لقمه مثل اخر لقمه نفس الطعم بس الدهون هي الي تتكدس اتعب

وانا امشي عالسير وابكي

بس اقول

استاهل هذا الي جنيته بيدي

وكنت اذا جربت اخبص اقول وبعدين وش بسوي برجع لنظامي السابق مكانك سر

ماراح اتقدم ولا راح اخطو اي خطوه قدام بل بالعكس راح ارجع لنقطه البدايه واقعد احسر نفسي الين
تنتهي فتره التخبيص والحمد الله يمر اليوم بسلام واقعد اسأل نفسي اسئله كثيره وتلقائيا تنسد نفسي
اذا حسيت اني برجع من اول الطريق

يعني على قولتهم طريقي ماكان مفروش بورد
ماراح تجيك الرشاقه على طبق من ذهب
كان فيه عثرات وتعب وجوع وحرمان مقابله كان في اصرار وعزيمه وحب في تغيير النفس وخلاص
لين هنا واستوب يكفي الي راح من عمري بس مو مثل الريجيمات القاسيه ولا يوجد وجه مقارنه

ماكنت اوصل لأكلي لحد مرحله الشبع اول شهر كان صعب علي كنت اجوع

هذا ماكان يشبعني لأن معدتي تعودت على الفاست فود والمقالي والأكل الدسم

كنت اصبر نفسي واشرب مويه كثيرررررررر مررره احسها تسد جوعي شوي

كنت كل ماجيت ابغى اخرب اتذكر الميزان واتذكر ان عندي يوم فري باكل الي يعجبني

وهذا كثير كان يريحني
او 3 شهور بحكم اني كنت من ذوات السمنه المفرطه كنت امشي فقط 30 دقيقه واتعب وانهج

لأني مو متعوده عالحركه دايم قدام الاب توب او التلفزيون والاكل تسليتي الوحيده

كنت احفز نفسي اشوف صور ناس قبل وبعد كنت اتخيل نفسي وانا رشيقه

كنت اتخيل ردات فعل الناس اذا شافوني وكيف راح ينبهروا خصوصا اني ولله الحمد ملامحي جميله
بس السمنه
عمرها مابينت هالملامح الي كانت غارقه في الشحوم

نحفت هالمره عشان نفسي مو لأن عندي مناسبه الشهر الجاي او بعد اسبوع او لأن عيد

او حفله بعد شهر او او او او كلها هذي اسباب وقتيه بمجرد ماتروح المناسبه ترجعي تاكلي اكثر من اول
قلت هالمره بنحف عشان نفسي عشان ذاتي عشان صحتي عشان لاقدر الله بكره ما اصاب بالأمراض

كانت اهدافي واقعيه كنت اتمنى انزل 3 كيلو في الشهر ولا الزياده ولا ان وزني يقعد مثل ماهو شهور
وسنين

كنت دايم ادعي ربي اللهم اعوذ بك من نفس لاتشبع

في جزئي المقبل راح اكلمكم عن التعليقات عن الشخص السمين والاحراجات الي انا مريت فيها واكيد
كل وحده تعاني من السمنه مرت فيها من مجتمع قاسي واناني منظوره الوحيد الشكل فقط

الصراحة 12:50 PM 05-07-2013
مجتمع لايرحم

تعليقات من مجتمع لا يرحم ولا يراعي من هم حوله ذنبهم الوحيد انهم يصنفوا من البدناء



1 كان عندي مناسبه زواج احد الاقارب رحت السوق دخلت محل فساتين اول مادخلت قالي صاحب


المحل تعالي هنا قسم المقاسات الكبيره صراحه مادري في هالوقت حسيت بصدمه وغليان لدرجه كان


نفسي اصرخ بأعلى صوتي واقوله خلاص يكفي تجريح




واخترت فستان وجالسه اشاور نفسي احترت بين مقاسين هو نفس الفستان ابغى اقيسه قال لا لا خذي

الثاني الي هو اكبر بمقاسين

يعني في نفسه يقول ترى الاول ماراح يجي قدك قهرني وقلت يعني هو يعرف مقاسي اكثر مني

ورجعت البيت وانا اجر اذيال الخيبه
وراي وقلت هذا ماجنته يدي خرجت من المحل بكل فخر بأكبر مقاس فستان



موقف خالي شافني وطالع فيني سوى حركه بيدينه انه خلاص وش هذا يعني
ان شاء الله وين ناويه توصلي خلاص يكفي انتهيتي بتنفجرين يكفي اعملي ريجيم


مره كنت رايحه السوق مشي وجيت اقطع الشارع الا وواحد راكب السياره وماشي يفحط بسرعه

خرج راسه من السياره

وسط الناس وقال بأعلى صوته يااااااااااااااااااااااااااااا ااادووووووووووووووووووبه


عيشوا الموقف وشوفوا كيف كان وضعي ساعتها حمدت الله اني متغطيه لأني


كنت ميته قهر وخجل شعور ممزوج باهانه
كيف يقدر يناديني بأعلى صوته وفي مكان عام الله يسامحه


ووووو المواقف كثير والاحراجات اكثر حتى الي مايتكلم بوجهك يبين وش يبي يقول


من نظره عيونه وتعابير وجهه لين متى هالنظره للسمين انه مهمش وماله هدف في الحياه لين متى

الناس تقاس بأشكالها واجسامها لين
متى مجتمعنا بيظل ظالم هذا الجسم السمين وراه قلب ينبض واحاسيس ومشاعر


يحس ويتألم ويتعب


كبروا عقولكم الضيقه السمين شخص من لحم ودم ليه تنظرون له بدونيه وكأنه شي مهمش في الحياه


وحده كانت تقول اصلا السمينه لو فيها خير ماتركت نفسها توصل لهالمرحله ولا لهالدرجه وعادي

تطلع وتنزل




انا لو زدت كم كيلو اتجنن الله يرحم حالكم بكل بجاحه وبكل قوه عين ووقاحه تقول هالكلام وماعرفت


ان لاتشمت في اخيك المسلم يرفع عنه ويبتليك


ماتدري هالسمينه وش ظروفها ليه سمنت هرمونات ولا علاج ولا غده درقيه ولا جسمها مايحرق

ماتدرين وش ظروفها

ولو قارنوا اكلها بأكلك يا النحيفه يمكن انتي تاكلين اضعاف اكلها بس هذي طبيعه اجسام ومعدل الايض

عندها يختلف عندك
خلاص الفتره الاخيره قبل ما انحف صار عندي تبلد الي يقول يقول والي يتريق والي يعلق وصلت


مرحله من الاه مبالاه والادمان على التجريح

وصلت لمرحله انا احب نفسي وراح انحف عشان نفسي وصحتي مو عشان فلان او فلانه

انحف عشان اعجب نفسي مو المجتمع

انحف عشان البس واكشخ واتمتع بشبابي

اعجبتني مقوله المستحيل ليس الشيئ المستعصي فعله بل له حل ولكن الى الان لم يوجد


حذفت من قاموسي كلمه مستحيل


كفايه البنت السمينه تظل نسبه زواجها او خطبتها ضئيله جدا وماحد اساسا يلتفت لها او يطالع لها


كل ام تبي تخطب لولدها تدور الشي الأساسي الشكل والجسم انا ماعمري انخطبت مثل البنات وفرحت

هالفرحه ببساطه لأني سمينه
لا اخفيكم سرا اخر الحلول كنت افكر في عمليات السمنه تحوير او تكميم كنت اقرأ قصص المتحورين



والمتكممين كانوا ينقصوا ماشاء الله عشرات الكيلوات في شهور بسيطه بس حاولت مع الاهل وجاء

الرفض سيد الموقف خصوصا
ان اهلي يتخوفوا كثير من العمليات ويسمعوا عن حالات الوفيات في عمليات مشابهه



يعني فقدت الامل انهم يوافقوا


وقلت امري لله مالي الا الحميه
وعسى في الأمر خيره
والخيره فيما اختاره الله
رحلتي الدايتيه كانت جميله ممتعه متعبه روتينيه فيها من كل بحر قطره عانيت وتعبت الى ماوصلت


عليه الان
ثقي بالله وانطلقي اطلقي العنان لقدراتك وارداتك وعزيمتك الاراده مالها حدود الى مالا نهايه



ودام عندنا صحه وخير ولله الحمد مانشتكي من اي امراض راح نوصل لكل شي والتفاؤل اهم سبب من

اسباب النجاح ثقي ان القادم اجمل
والريجيم يبغى له صبر وطوله بال واراده شي كدستيه في سنين مو بيوم وليله يروح انا استغرب اقرأ


مواضيع في المنتدى سويت ريجيم ونقصت كيلو اووووف قهر ليه ؟؟ وكثير من التساؤلات وانا وحده

منكم انقهر زمان اذا نزلت كيلو

اللحين اقتنعت بأن الكيلو شي طيب مشكلتنا نظرتنا ماهي طويله المدى يعني كيلو فوق كيلو فوق كيلو

في الشهر=4
شهرين=8
ثلاث شهور =12
شي ممتاز شفتوا كيف هذا الكيلو الي مو عاجبنا وش سوى الريجيم زي النبته او الزهره اهتمي فيها


وارعيها واسقيها بتعطيك


افضل ثمار كل ما اخلصتي بريجيمك والتزمتي وكنت صادقه صدقيني كله راح يظهر على الميزان

مشوار الألف ميل يبدء بخطوه


في القسم الجديد راح احكي لكم عن رحلتي الريجيميه التي استغرقت عام كامل

ماذا واجهتني من متاعب ومراحل مرت علي

كيف نظامي واكلي ؟

كل رياضتي ؟

رحلتي الدايتيه
الثلاث شهور الأولى كنت مثل ماقلت لكم امشي 30 دقيقه فقط عالجهاز ويادوب اكملها من ثقل وزني

احس نفسي ينقطع وملتزمه بحميتي الي من تصميمي يارب لك الحمد ومرتاحه عليها

نظام اكلي كنت اخذ في الغدا 7 ملاعق رز او ربع خبز مع بروتين او خضار

او بيضه مقليه وصامولي نخاله او سلطه تونه او حمص وخبز خيارااات جدا كثيره في الاكل

وفطوري توست وجبنه وشاي او عصير برتقال او كورن فلكس وحليب منزوع الدسم

او 3 قطع بسكوت وشاي

او 3 تمرات ولبن قليل الدسم او 3 ملاعق فول وربع خبزه

وايام ادلع نفسي اخذ 2 توست وجبنه شدر كرفت ملعقه كبيره مبشوره مع ملعقه مربى واحمصها امممم
لذيذه
العشاء احيان زبادي واحيان لو جوعانه خبز وجبنه

خيارات كثيره بس كلها بنوعيه صحيه وكميه معينه

بين الوجبات حبه فاكهه خيار زي كذا

العب في السعرات احسب السعرات تقريبيه يوم 1000 يوم 1400 يوم 1200 يوم 800

يوم اخربها واخذ 1500

ما اخلي جسمي يمشي على وتيره وحده اغير في وجبات الفطور والغدا ما اثبت على اكل واحد انوع

التنويع مطلوب عشان الوزن يضل في نزول مستمر


مايتكيف على سعرات معينه او وجبات معينه ويبطل ينزل


وكل 10 ايام يوم مفتوح كنت اشرب مويه كثير تقريبا لتر ونصف الى لترين



ايام التزم بالثلاث وجبات

فقط
وايام اخذ سناك وجبه ولا اثنين خفيفه مع ثلاث وجبات رئيسيه ما اخلي جسمي على نفس نمط

الدايت

واستخدمت حبوب عباره عن الياف وصفتها هنا بنت الله يسعدها تساعد مره على القضاء من

الأمساك اسمها كولون كير مررره حلو تلقونها جي ان سي تاخذي حبه بعدا الغداء مباشره وعلى طول

الله يكرمكم على الحمام تسهل حركه الأمعاء وهي الياف ومكمل غذائي مامنها خطوره ابد



انتهت رحله الثلاث شهور الأولى ويارب لك الحمد اصبح وزني عباره عن رقمين بعد معاناه مع

الثلاثه ارقام لمده سنتين

ابتديت خطه الثلاثه شهور الثانيه زودت المشي بما اني صار عندي البعض من اللياقه

قللت شوي في اكلي شوي بس يعني الرز كنت اخذ 7 ملاعق خليتها 5

2 توست خليته 1 زي كذا بس ماوصلت نفسي لمرحله التجويع

وبكذا اكون خلصت 6 شهور تغير شكلي كثير وحسيت بفرق واضح وكل الي حولي حسوا بالفرق

وجت رحله ال 6 شهور جديده وانا على نظامي نفسه من دون حرمان وبكميات نوعا ما صغيره

زودت المشي ايضا صرت امشي مايقارب ساعتين مشي سواء على السير او خارج المنزل

مرت سنه
12 شهر بحلوها وبمرها
ماشيه على نفس النظام ا وماشاء الله تبارك الله صار عندي لياقه بس طبعا عارفين اخر شهور الدايت

يصير الوزن ينزل بالقطاره وببطئ شديد

وانتهت السنه على خير على قوله المثل ختامها مسك

وبشكل جديد ونفسيه جديده

الصراحة 12:53 PM 05-07-2013
الميزان يوم


الميزان وما ادراك مالميزان ومؤشراته وارقامه المخيفه

احيان يضحكني واحيان يفرحني واحيان يبكيني واحيان يقهرني لدرجه ودي


اكسره نصفين كان يوم الميزان بمثابه عيد عندي افرح بهاليوم احس بنشوه قبلها بيوم تصدقوا مايجيني

نوم ان بكره يوم الوزن كأن فيه بكره اختبار ومتشوقه اعرف النتيجه كان شي مهم عندي استعد له

وادعي الله ان يعطيني نتايج تفرحني على قد مجهودي وتعبي



1. على كل نزول احمد الله واشكره



2.
( لَئِنْ شَكَرْتُمْ لَأَزِيدَنَّكُمْ صدق الله العظيم




قبل الميزان بيوم اكون اخذه ملين اكرمكم الله عشان يعطيني وزني القراءه الصح بدون عوامل تأثير من


امساك او غيره اخذ وزني


الصباح عالريق بملابس خفيفه كنت انتظر هاليوم بلهفه وشغف اشوف وش حققت واروح ادون الوزن

في جدولي واشوف مقدار التقدم


ماتصدقوا هالنتيجه كانت تعطيني دافع للأستمرار وتعطيني طاقه اني العشره الايام الجايه احقق نتيجه

احسن انا كنت اتوقع اقل من المتوقع هذا الشي جدا يفيد لأن مايصيبني بأحباط واحيان الوزن يثبت ايام

وايام وايام صح اتضايق بس مجرد ما اجيب المتر واشوف مقاساتي نازله احس بنشوه والفرحه

تغمرني احس القياسات تطفئ غضبي لأن القياس عمره مايكذب والوزن يمر بمرحله ثبات لو صبرنا

على هالمرحله يرجع ينزل


اتذكر كلام دكتور تغذيه كنت اراجع عنده زمان لمن وزني ماينزل كنت ازعل كان يتعامل بالوزن

والمقاسات وتكون مقاساتي نازله واسأله واستفسر يعصب هههههههه يقول هو ايه موش هدومك

وسعت ومئاساتك نازله عاوزه ايه تاني اهم شي الشكل مش كل الي حيشوفك حيقولك يلا عالميزان

حيشوفوا شكلك مش حيكون مكتوب على جبينك وزنك اد ايه ههههههههههههه دخلت جو مع اللهجه

المصريه احبها
وهو


صادق فعلا اهم شي الشكل والوزن مسيره يجي له وقت راح ينزل

احيان شهر كامل الوزن ثابت مايتحرك ولا جرام واحيان زياده نصف كيلو الوزن يتأثر بأشياء كثيره

وعوامل مثل الدوره والامساك وووو ونظامي مثل ماهو بس بالعكس اكمل ولا احبط نفسي وعارفه ان

مانزل هالمره المره الجايه او الي بعدها او ان شاء الله بعد شهر اهم شي ينزل انا متفرغه لجسمي


ووزني ووراه وراه هالوزن ماعندي شي ثاني الا حميتي ونظامي ومهما ثبت تأكدوا يابنات انه

مصيره راح ينزل

الميزان الشي الوحيد الي مايكذب ولا يجمل لك الحقيقه ولا يجامل لمن تخبصي تظهر نتايج تخبيصك


عليه وكل ما التزمتي

تلقين احلى نتيجه وما انكر ان احيان يخذلني ويمر بمرحله ثبات عجيبه كنت اتحداه واقول راح انزل

المره الجايه يا انت يا انا

برغم هذا عمري ماكرهت ميزاني

الجزء ماقبل الأخير وهو اليوم الفري او المفتوح وش كنت اسوي فيه وش اكل وش ما اكل

كله راح تعرفوه في هالجزء

اليوم المفتوح free day


اليوم المفتوح وما ادراكم ماليوم المفتوح كنت انتظره بلهفه كل ما اجوع ايام الدايت اتذكر يومي العزيز


كنت احتار وش راح اكل فيه هو

كان يوم مفتوح اكل الي نفسي فيه فطور وغدا وعشاء


كان وحلا يعني اشبع وبيني وبينكم


طول فتره ايام الدايت اكون جوعانه واصبر نفسي باليوم المفتوح بس سبحان الله نفسي تنسد هاليوم


اكل ماراح اقول لكم ما اكل بس معدتي تصير تعورني لأني اليوم المفتوح يكون عباره عن اكل جاهز

او مقالي الأكل


الي انا احبه وانا اكون متعوده على أكل اصحي
كنت اخذ وجبه دسمه عشان جسمي مايتعود عالنظام الصحي والي مافيه دهون ويبطل ينزل وبكذا راح

ينزل ومنه يتفاجئ الجسم ويستمر


في نزوله ومنه

ضروري اكل شي دسم وحلا وووو كل شي محرومه منه الأيام الي فاتت


منه اضمن ان وزني العشره الايام القادمه يستمر في نزوله ومنه اكون ماحرمت نفسي من شي


وكمان احد الأسباب ان الجسم مايتفاجئ من نوعيه الاكل الي اكلها في اليوم المفتوح بكره اذا خلصت من

الدايت ووصلت للمثالي وجيت اثبت وزني


يزيد الوزن بعد اليوم المفتوح يزيد يزيد ترى هذا موضوع مااحد الأفيه نقاش


زياده بسيطه ووهميه بحدود 500 الى 700 جرام مجرد ثاني يوم ماترجعي لنظامك ترجع

تنزل خذوها نصيحه مني لاتقيسوا وزنكم بعد ثاني يوم من يومكم الفري لأنه راح يزيد راح

يزيد من نصف كيلو الى احيان توصل الزياده 2 كيلو وتجنبا للأحباط ابعدوا عن الوزن الا



في اليوم المحدد
الجزء الأخير الي الكل متشوق يسمعه كم كنت انتم عارفين كم كنت بس كم صرت هذا

الي راح تعرفوه في اخر جزء لقصتي الجميله وكيف تغيرت مقاساتي كم كنت البس وكم

صرت البس ؟
ردات الفعل من الناس؟

شعوري واحساسي بطعم الرشاقه الي ماذقته طول عمري؟

كل هذا واكثر راح تعرفونه بالجزء الأخير من قصتي

انتظروني






ماعادت رشاقتي حلم النهايه

اللحين وصلنا لاخر قسم حصد الثمار ههههههه غلبتكم لين وصلتكم لهالنقطه بس سامحوني في النهايه

ابغى لكم الفايده وفصلت حميتي لكم بالتفصيل الممل

كل شي في الحياه وله نهايه وانا نهايه قصتي بدايه بدايه انطلاقه امل وحياه جميله
كانت بدايه وولاده لشخص اخر حسيت اني هاللحين بالذات انا عايشه صح

شعور يجنن رائع ماراح يحسه الا الي جربه

الرشاقه لذه لذه لذه مالها وصف ومالها مثيل يكفي انك تروحي السوق وكل الي يعجبك قدام عينك وتقدري تشتريه

يكفي في العمر تكوني نازله 10 سنين يكفي تحسي نفسك بنوته وصغيره وكيوت

تحسي بخفه وحياه كأنك طايره مثل الفراشه

يكفي ان الكل يهمس وش سويت؟

واااااااااو شوفوا كيف تغيرت؟

يكفي نظرات الغيره والقهر من الحاقدين من غير اي تعليق بس نظرتهم فيها الف كلمه وكلمه ولله الحمد هذي عينه قليله صادفتها يكفي

اني مرتاحه بنومي وصلاتي وحركتي ومشيي شعور يجنن يجنن يجنن لو يخيروني بين ملايين هالدنيا واني ارجع سمينه والله اني

اختار الرشاقه كان حلم واصبح حقيقه عشتها ولمستها بيدي

يكفي نظرات الناس وكأنك انسانه قويه وعظيمه تحديتي نفسك ووصلتي يكفي انك كنتي 2 وصرتي 1

يكفي انك تمشي بثقه وسعاده وتلبسي كل الي تحلمي فيه شعوووووور رائع الله لايحرمه لأحد

يكفي لمن الكل يساألك كيف ريجيمك وكيف نظامك؟

وش تسوي بالتفصيل الممل

وكأن الأمر معجزه يكفي اني شفت رقم عالميزان ماشفته من 10 سنين يعني من يوم كان عمري 12 سنه

يكفي من الحاقدين والحاسدين الي قبل وانا سمينه يعطوني نصايح وحميات وريجيمات ويوم نحفت ولا حتى نصف تعليق انلجموا

وبروده ونظره قهر

يكفي اني كنت احب الشوبينق بس ماكنت اشتري لنفسي كنت انسق للي حولي لبسهم وفي نظرهم انا ذوقي رفيع بس للاسف ما اقدر
اشتري ولا البس الشي الحلو لأنه ببساطه مايجي قدي

يستشيروني في لبسهم وطلتهم واكسسوارتهم انزل معاهم السوق وهم يختاروا وانا اقعد بحسرتي لا والله مو حسد بس غبطه ودي كمان

البس واشتري مثلهم المخصر الله وهبني ذوق رفيع في اختيار الملابس والأكسسوارت نفسي اطبق هالشي على نفسي انا

يكفي اني احس نفسي انثى ملكه
كل الي اتمناه احصله
وما توفيقي الا بالله

وقبل ما اكتب لكم كم كنت وكم صرت اسألكم بالله يابنات كل وحده تذكر الله وتقول ماشاء الله تبارك الله لأن العين حق


ورد ذكرها في القران والحديث ولو كان شيء سابق القدر لسبقته العين
واحيان الام تحسد بنتها من شده الاعجاب واحيان احنا نحسد انفسنا ولنا في قصص العين والحسد عبره

وهالشي ماجى الا بعد صبر وكفاح وجهد يعني ماغمضت عيني وفتحتها ولقيت نفسي نحيفه

سنه كامله وانا ملتزمه بنظام ورياضه وهذا انا حصدت الي جنيته اللهم لك الحمد ويارب كل بنت

تحس بالفرحه الي حاستها

وماكتبت هذا الموضوع الا للفائده ولكم يابنات حواء عشان تعرفوا ان مافي شي مستحيل


18 شوال 1431
108.4

وفي يوم الجمعه
25شوال 1432
بعد مرور عام وبضعه ايام
اصبح
ماشاء الله تبارك الله
55.3
يعني تقريبا نصف وزني نزل

كنت البس 22 واحيان 20
والان
12
ومن ثلاثه اكس واحيانا اربعه

صرت البس بين ميديم وسمول

الموضوع ماهو سحر ولا معجزه الموضوع ابسط مما تتخيلوا انا حطيت هدف براسي

مجرد تنظيم اكل ومشي واكل صحي واستمرار سنه كامله مو يوم او شهر او شهرين ووقفت لا انا واصلت

واستمريت لين حصلت على هالنتيجه

وسألتكم بالله الي تستفيد من موضوعي تدعي لي الله يوفقني ويحقق كل امنياتي

وان شاء الله اكون بموضوعي هذا عطيتكم دفعه من الحماس والأراده

واعرفوا ان مافي شي مستحيل ابدا

اختكم
ام مهند

أرجو أن نتعض من أختنا صاحبة التجربة
لسبب واحد و بسيط أننى إلتمست الصدق فى كل حرف و فى كل كلمة
بارك الله فيها و بارك الله لها و دم عليها هذه النعمة
و أرزقنا بمثلها
ما شــــــــــــــــــــــاء الله لا قوة إلا بالله
o.O (ام سلطان) O.o 01:20 PM 05-07-2013
......رائعه

كلام سليم ميه بالميه


يعطيج العافيه
ملكة الرومانسيه 01:21 PM 05-07-2013
فعلا ارادة قوية مو اي حد بيقدر يعمل هيك بس انا تشجعت كتير كتير هلا انا حامل وعم حاول امشي ع نظام صحي حتى ما زيد كتير ورح زيد النظام بعد الولادة حتى اوصل لوزني المثالي
1 2  3  4 
كلمات ذات علاقة
للوزن , المثالي , نزول , قصة